Read fon Ɖɛhan 49 Bible Online

Ɖɛhan 49 - fon bible

Ɖɛhan 49

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ.

²Togun lɛ́ɛ mi, mi bǐ mi ɖótó xó élɔ́! Mi mɛ e ɖo gbɛ ɔ́ mɛ lɛ́ɛ bǐ ní ɖótó te bo se!

³Gbɛtɔ́ nukúnɖéjí kpó gbɛtɔ́ kpaa kpó ní ɖótó! Dɔkunnɔ ní ɖótó, bónú wamamɔnɔ lɔ ní ɖótó!

⁴Un ná kɛ nu bɔ nǔnywɛ́ ná tɔ́n sín mɛ, xó jɔ xó kɛ́ɖɛ́ wɛ ɖo ayi ce mɛ.

⁵Un nɔ ɖótó nǔ e nǔnywɛ́tɔ́ lɛ́ɛ nɔ́ kplɔ́n mɛ é; è nǎ ɖo kanhún xo wɛ, bɔ un ná tínmɛ d'é mɛ.

⁶Aniwú xɛsi ka ná ɖi mì azǎn nyanya gbe? Aniwú xɛsi ka ná ɖi mì hwenu e awlinmɛdan lɛ́ɛ ná lɛ́ lɛ̌ dó mì é?

⁷Yě ɖeji dó dɔkun yětɔn lɛ́ɛ wú, bó nɔ́ ɖo ajɔ̌ jlá wɛ.

⁸Gbɛtɔ́ sixú xɔ gbɛ nú mɛɖé ǎ; é ká sixú xɔ gbɛ nú éɖée ɖo Mawu sí ǎ.

⁹Akwɛ́ e ná xɔ gbɛ nú gbɛtɔ́ ɖokpó ɔ́ ná sukpɔ́ dín, mɛɖé sixú kpé wú bó sú ǎ kpowun bɔ xó fó.

¹⁰Yě vɛdó ɖɔ émí ná nɔ gbɛ káká sɔ́yi ma yi yɔ wɛ a?

¹¹Gbeɖé kpɔ́n! Mɛ bǐ wɛ tunwun. Yě ná yi yɔ mɛ, nǔnywɛ́tɔ́ ná kú, xlonɔ kpó gɔgɔnɔ kpó lɔ ná kú. Yě ná kú bó ná jó dɔkun yětɔn lɛ́ɛ dó nú mɛ ɖěvo.

¹²Yě wlán nyǐkɔ yětɔn lɛ́ɛ ɖó ayǐkúngban yětɔn lɛ́ɛ jí, yɔdo wɛ ka nyí xwé yětɔn; xwé énɛ́ gbe wɛ yě ná nɔ káká sɔ́yi.

¹³Gbɛtɔ́ ɖo susu xɔ wɛ mɔ̌ có, é ná kú gbe ɖokpó kanlin ɖɔhun.

¹⁴Nǔ e ɖo te kpɔ́n xlonɔ énɛ́ lɛ́ɛ é ɖíe; mɛ e nɔ yí wǎn nú xó yětɔn tɔn sise lɛ́ɛ ɔ́, nǔ e ɖo te kpɔ́n yě é ɖíe: Agbɔ̌n

¹⁵Gbɔ̌ ɖɔhun wɛ è nǎ dó kan kɔ nú yě bó dɔn yi kútomɛ, abaɖaxwéjɛsú ná nɔ́ nyi yě kanlin ɖɔhun. Zaanɖé din ɔ́, gbɛtɔ́ hwɛjijɔnɔ lɛ́ɛ ná nɔ́ tɛ afɔ yě jí; agbaza ko cá nɛ́; kútomɛ kó húzú xwé yětɔn nɛ́.

¹⁶Lo ɔ́, Mawu ná xɔ gbɛ nú mì ɖo kú sí; Mawu ná hwlɛ́n mì nǔgbó. Agbɔ̌n

¹⁷Nú mɛɖé jɛ dɔkun, bɔ dɔkun tɔn ɖo jijɛ jí wɛ hǔn, ma lin kpɔ́n ó,

¹⁸ɖó é ɖo ɖě ná zé yi kú wɛ ǎ; dɔkun tɔn ná xwedó e byɔ́ yɔdo mɛ ǎ.

¹⁹Hwenu e é ɖo gbɛ ɔ́, é nɔ́ mɔ ɖɔ nǔ nyɔ́ nú émí, é ná nɔ́ sɔ́ éɖée su ɖɔ nǔ nyɔ́ nú émí.

²⁰É ká ɖó ná wá yi to e mɛ tɔ́gbó tɔn lɛ́ɛ yi é, to e mɛ yě yi bó má sɔ́ ná wá gbeɖé ǎ é.

²¹Gbɛtɔ́ e nɔ́ ɖo susu xɔ wɛ, bó má ka ɖó nǔnywɛ́ ǎ ɔ́, é tunwun ɖɔ émí ná kú gbe ɖokpó kanlin ɖɔhun ǎ.