Read fon Ɖɛhan 5 Bible Online

Ɖɛhan 5 - fon bible

Ɖɛhan 5

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ kún kpete d'é mɛ.

²Mawu Mavɔmavɔ, ɖǒtó xó ce, se azɔn e wɛn wɛ un ɖe é.

³Axɔ́sú ce, Mawu ce, ɖǒtó xó e sú ylɔ́ we wɛ un ɖe é. Hwi ɖɔ xó ná wɛ un ɖe.

⁴Mawu Mavɔmavɔ, zǎnzǎn ɔ́, a nɔ se gbe ce, zǎnzǎn ɔ́, un nɔ ɖɔ nǔ e ɖo ayi ce mɛ ɔ́ bǐ nú we, bó nɔ́ ɖo te kpɔ́n we.

⁵Đó Mawu wɛ a nyǐ, a yǐ wǎn nú dǎka ǎ. Nǔ nyanya nɔ́ nɔ gɔ̌n towe ǎ.

⁶Ayimasɔgbenánɔ lɛ́ɛ nɔ́ nɔ te nukɔn towe ǎ. A gbɛ̌ wǎn nú nǔnyanyawatɔ́ lɛ́ɛ bǐ.

⁷Hwi Mawu Mavɔmavɔ ɔ́, a nɔ sú mɛ e ɖo adingban te lɛ́ɛ kún dó. A gbɛ̌ wǎn nú gbɛtɔ́ e nɔ́ kɔn hun kɔn nyi ayǐ é, gbɛtɔ́ e nɔ́ ɖó sísɛ́ nukɔn nú mɛ é.

⁸Amɔ̌, nyɛ ɔ́, ɖó xomɛnyínyɔ́ towe má ɖó jlɛ̌ wǔ ɔ́, un nɔ yi xwé towe gbe, un nɔ kpan nukɔn nɔtɛn mímɛ́ towe, un nɔ́ ɖe kɔ́ nú we kpó sísí e jɛ xá we ɔ́ kpó.

⁹Mawu Mavɔmavɔ e, kɛntɔ́ ce lɛ́ɛ tɔ wu nú mì; kplá mì gbɔn ali towe, hwɛjijɔli ɔ́ jí. Gbǐgbá ali towe ɖo nukɔn ce.

¹⁰Đó è sixú gán jɛ xó e yě nɔ́ ɖɔ lɛ́ɛ wú ǎ, xójɔxó ɖěbǔ ɖo nu yětɔn mɛ ǎ. Dǎka kɛ́ɖɛ́ wɛ ɖo xo yětɔn mɛ. Gbego yětɔn ɔ́, yɔdo wɛ bó ɖo nuvo, ɖɛ̌ yětɔn ɔ́, mɛ jɛ́n é nɔ́ klɔ́.

¹¹Mawu ce, hɛn yě ɖó hwɛhutɔ́ lɔ jí. Wě e ɖe wɛ yě ɖe lɛ́ɛ ní zin yě dɛ́. Nya yě tɔ́n ɖó hwɛ yětɔn wɔ̌buwɔ́bú lɛ́ɛ wú, ɖó yě fɔ́n gǔ dó jǐ towe.

¹²Lo ɔ́, mɛ e hɔn wá su we lɛ́ɛ bǐ ná nɔ́ j'awǎ, xomɛ ná nɔ́ ɖo yě hun wɛ tɛgbɛ, a nǎ nɔ́ cyɔ́n alɔ yě jí. Mɛ e yí wǎn nú nyǐkɔ towe lɛ́ɛ ná nɔ́ hun xomɛ ɖó hwi wú.

¹³Đó Mawu Mavɔmavɔ, hwi wɛ nɔ xo ɖɛ dó hwɛjijɔnɔ jí, a nɔ zé xomɛnyínyɔ́ towe cyɔ́n n'i gǎglónú ɖɔhun.