Read fon Ɖɛhan 50 Bible Online

Ɖɛhan 50 - fon bible

Ɖɛhan 50

¹Asáfu sín han. Mawu Mavɔmavɔ, Mawu Nǔbǐwúkpétɔ́ ɔ́ kɛ nu; é ylɔ́ ayǐkúngban ɔ́ bǐ kplé sín zǎnzǎn hwe jí káká yi gbadahwe jí.

²Sín Sinyɔ́ɔ, toxo e nyɔ́ ɖɛkpɛ bɔ nǔ vɔ ɖ'é wú ɔ́ mɛ dɔ̌n wɛ Mawu ɖe bó ɖo kínkɔ́n wɛ.

³É ja, Mawu mǐtɔn ja, é ɖo xwíí bó ja ǎ. Myɔ ɖaxó ɖé ɖo nukɔn tɔn, jɔhɔn ɖaxó ɖé lɛ́ lɛ̌ dó e.

⁴É ylɔ́ jǐnukúnsin sɛ́ dó jǐ aga, bó ylɔ́ ayǐkúngban, bɔ yě ná ɖo te bɔ é ná ɖɔ hwɛ xá togun tɔn.

⁵É ɖɔ: “Mi kplé mɛ e ɖo gbejí nú mì lɛ́ɛ, yě mɛ e sá vɔ̌ dó jɛ akɔ xá mì lɛ́ɛ nú mì!”

⁶Énɛ́ ɔ́, jǐxwé ɖo ɖiɖɔ wɛ ɖɔ Mawu ɔ́, nǔ jlɔ́jlɔ́ wɛ é nɔ́ wa; Mawu wɛ nɔ́ gbo hwɛ. Agbɔ̌n

⁷“Togun ce, ɖǒtó mì má ɖɔ xó nú we; Izlayɛ́li, un ná dó hwɛ we, nyi wɛ nyí Mawu, Mawu towe.

⁸Vɔ̌ e a nɔ sá nú mì lɛ́ɛ wú wɛ un ɖo hwɛ ná ɖɔ xá we wɛ ǎ. A nɔ xwlé vɔ̌ e è nɔ dó zo ɔ́ mì tɛgbɛ.

⁹Un ná yi sɔ́ nyibúsú ɖo xwé towe gbe ǎ, un ka ná yi sɔ́ gbɔ̌sú ɖo gbɔ̌kpó towe mɛ ǎ,

¹⁰ɖó kanlin e ɖo zungbó mɛ lɛ́ɛ bǐ wɛ nyí ce. Kanlin e ɖo só maxamaxa lɛ́ɛ jí é bǐ wɛ nyí ce.

¹¹Un tunwun xɛ e nɔ gbɔn jǐ lɛ́ɛ ɖokpó ɖokpó. Lan e ɖo gběhan mɛ é bǐ wɛ ɖo alɔ ce mɛ.

¹²Nú xovɛ́ sin mì ɔ́, é byɔ́ ɖɔ má ɖɔ nú we ǎ, ɖó gbɛ ɔ́ bǐ wɛ nyí ce, bɔ nǔ e ɖo gbɛ ɔ́ mɛ ɔ́ bǐ nyí ce.

¹³Nyɛ ɔ́, un nɔ ɖu nyibúsú sín lan wɛ a? Un nɔ nu gbǎgbáhun wɛ a?

¹⁴Vɔ̌ e a nǎ sá nú nyɛ Mawu towe ɔ́ wɛ nyí ɖɔ a nǐ tunwun nǔ e bló nú we wɛ un ɖe ɔ́ nú mì. Đe akpá e a dǒ nú nyɛ Mawu Ajalɔ̌nlɔn lɛ́ɛ.

¹⁵Adǎn gbo we hweɖěbǔnu hǔn, ylɔ̌ mì. Un ná hwlɛ́n we gán, bɔ a nǎ kpa susu nú mì.”

¹⁶Mawu ɖɔ nú mɛdídá ɖɔ: “Étɛ́! A nɔ ɖo sɛ́n ce lɛ́ɛ xa wɛ, akɔ e un jɛ xá we ɔ́ nyí han bó ɖo nu towe.

¹⁷Hwi mɛ e un gbɛ́ nǔɖé ná ɔ́, a ma nɔ se ǎ é! Hwi mɛ e nɔ se xó ce dó tó gúdo é!

¹⁸A mɔ ajotɔ́ ɖé ɔ́, a nɔ dó gbɛ̌ tɔn; mɛ e nɔ lɛ aga lɛ́ɛ wɛ a nɔ zun xɔ́ntɔn xá

¹⁹Xó nyanya kɛ́ɖɛ́ wɛ nɔ tɔ́n sín nu towe mɛ. A kɛ nu ɔ́, mɛ jɛ́n a nɔ blɛ́.

²⁰A nɔ jínjɔ́n ayǐ bó nɔ ɖɔ nɔví towe nú. A nɔ dó hɛ̌n nɔví towe, nɔ towe xomɛ ví.

²¹Nǔ e a nɔ wa é nɛ́, bó nɔ ɖɔ nyi ma kɛ nu d'é wú ó. Towe ɖɔhun wɛ un ɖe wɛ a vɛdó a? Nǔ e a dǒ sin lɛ́ɛ bǐ nu wɛ a nǎ ɖó akɔ́n; nǔ e a dǒ sin lɛ́ɛ bǐ sín tó wɛ un ná dɔn nú we.

²²Mi mɛ e nɔ wɔn nyɛ Mawu lɛ́ɛ ɔ́, nǔ e mi ná tunwun é nɛ́, é má nyí mɔ̌ ǎ ɔ́, un ná vúnvún mi, mɛ e ná yí mi sín así ce ɔ́ ná ɖe ǎ.

²³Mɛ e sá vɔ̌ dó tunwun nǔ e un wa n'i ɔ́ nú mì ɔ́, mɛ e sɔ́ mì su é nɛ́; mɛ e nɔ zán gbɛ ɖagbe ɔ́, un ná ɖe xlɛ́ ɛ ɖɔ nyi wɛ nyí Mɛhwlɛ́ngántɔ́.”