Read fon Ɖɛhan 59 Bible Online

Ɖɛhan 59 - fon bible

Ɖɛhan 59

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Hwenu e Sawúlu sɛ́ mɛ dó Davídi xwé gbe ɖɔ è nǐ yi cɔ́ ɛ káká bó hu i ɔ́ wɛ Davídi ji.

²Mawu ce, hwlɛ̌n mì ɖo kɛntɔ́ ce lɛ́ɛ sí, cyɔ́n alɔ jǐ ce ɖo mɛ e sí te dó jǐ ce lɛ́ɛ nukɔn.

³Hwlɛ̌n mì ɖo acɛgbatɔ́ lɛ́ɛ sí, hwlɛ̌n mì gán ɖo mɛhutɔ́ lɛ́ɛ sí.

⁴Mawu Mavɔmavɔ, kpɔ́n; yě tɔwu nú mì, bó ná hu mì. Gǎnhúnǔtɔ́ lɛ́ɛ ɖo gbě ce blá wɛ, un ka wa nǔɖé nyi do ǎ, un ka hu hwɛ ɖé ǎ.

⁵Un wa nǔɖé nyi do ǎ; yě ká ɖo wezun jí ja; yě sɔ́ nǔ bó ná tɔ́n ahwan mì, Mawu Mavɔmavɔ, fɔ́n bó wá káká gɔ̌n ce bó wá dó alɔ mì.

⁶Mawu Mavɔmavɔ, Mawu Nǔbǐwúkpétɔ́, Mawu Izlayɛ́li tɔn, sí te bó dɔn tó nú akɔta lɛ́ɛ bǐ; ma kú nǔbláwǔ nú nǔ mɛdídá, mɛsaɖutɔ́ nɛ́ lɛ́ɛ ɖěbǔ ó. Agbɔ̌n

⁷Gbadanu tɛgbɛ ɔ́, yě nɔ́ lɛ́ kɔ wá, yě nɔ́ ɖo nǔ hó wɛ avǔn ɖɔhun, bó nɔ́ ɖo lɛ́ lɛ̌ dó toxo ɔ́ wɛ.

⁸Kpɔ́n, nu yětɔn nɔ́ nyɛ afúntúnkplɔ̌. Hwǐ wɛ ɖo nu yětɔn mɛ; xó e nɔ́ tɔ́n sín nu yětɔn mɛ ɔ́, mɛ̌ ká sixú se?

⁹Amɔ̌, hwɛ Mawu Mavɔmavɔ ɔ́, a ɖo yě ko wɛ, a ɖo slǎmɛ ɖɔ akɔta e nyí akɔta ɖěvo lɛ́ɛ bǐ wú wɛ.

¹⁰Hwi mɛ e nɔ cyɔ́n alɔ jǐ ce ɔ́ gɔ́n wɛ un nɔ kpɔ́n; Mawu, hwi wɛ nyí ahohó ce.

¹¹Mawu ce xomɛnyɔ́tɔ́ ɔ́ nɔ́ wá gɔ̌n ce bó nɔ́ gɔ́ alɔ nú mì. Mawu ce nɔ́ zin kɛntɔ́ ce lɛ́ɛ dɛ́, bó nɔ́ sɔ́ xlɛ́ mì.

¹²Aklúnɔ, ma hu yě din tlóló ó, togun ce táá wɔn lě e a kpé nǔ wú gbɔn é. Aklúnɔ gǎglónú mǐtɔn, zě hlɔ̌nhlɔ́n towe dó dán yě bó zin yě dɛ́,

¹³ɖó yě kɛ nu ɔ́, hwɛ jɛ́n yě nɔ́ hu dó we. Goyíyí yě ɖésúnɔ tɔn ní nyí mɔ nú yě jɛ mɛ. Đó nu dó mɛ wɛ jɛ́n yě nɔ́ ɖe, adingban ɖó wɛ jɛ́n yě nɔ́ ɖe.

¹⁴Nɔ xomɛsin jí bó sú kún yětɔn dó. Sú kún yětɔn dó bónú yě ní ma sɔ́ tíin nyǐ ó. È nǐ tunwun ɖɔ hwi Mawu ɔ́ wɛ kpa acɛ ɖo Izlayɛ́li, bó kpa acɛ káká yi fí e ayǐkúngban ɔ́ kponu ɖó é. Agbɔ̌n

¹⁵Gbadanu tɛgbɛ ɔ́, yě nɔ́ lɛ́ kɔ wá, yě nɔ́ ɖo nǔ hó wɛ avǔn ɖɔhun, bó nɔ́ ɖo lɛ́ lɛ̌ dó toxo ɔ́ wɛ.

¹⁶Yě nɔ́ ɖo dǐndán kpé wɛ, bó nɔ́ ɖo nǔɖuɖu ba wɛ. Nú yě má gɔ́ xo ǎ ɔ́, yě nɔ́ jɛ nǔ hó jí.

¹⁷Nyɛ ɔ́, un ná ji han dó kpa hlɔ̌nhlɔ́n towe. Ayǐ hɔ́n tlóló ɔ́, un ná jlá lě e a nyɔ̌ xomɛ gbɔn é, ɖó ahohó wɛ a nyǐ nú mì. Hwi wɛ nyí bibɛtɛn ce, fí e un nɔ hɔn hwlá cí adǎngbomɛzán gbe é.

¹⁸Mawu, hwi wɛ un ná ji han dó kpa susu ná, ɖó hwi Mawu ce ɔ́, hwi Mawu xomɛnyɔ́tɔ́ ɔ́, hwi wɛ nyí ahohó ce, hwi wɛ nyí hlɔ̌nhlɔ́n ce.