Read fon Ɖɛhan 65 Bible Online

Ɖɛhan 65 - fon bible

Ɖɛhan 65

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

²Mawu, é jɛ xá ɖɔ è nǐ kpa susu nú we ɖo Sinyɔ́ɔ, toxo towe mɛ. É jɛ xá ɖɔ akpá e è dǒ nú we lɛ́ɛ ɔ́, è nǐ ɖe.

³Hwi wɛ nɔ se ɖɛ, énɛ́ wú ɔ́, gbɛtɔ́ lɛ́ɛ bǐ ná wá gɔ̌n towe.

⁴Hwɛ e un hu lɛ́ɛ hú gǎn mì. Amɔ̌, hwɛ ɔ́, a nǎ súnsún hwɛ sín kɔ nú mì.

⁵Nǔ nyɔ́ nú mɛ e a sɔ́, bó dɔn dó wǔ, bɔ é ná nɔ xwé towe gbe é. Mǐ ná ɖu nǔ ɖagbe e ɖo xwé towe gbe lɛ́ɛ sín gbɛ. Mǐ ná ɖu nǔ mímɛ́ e ɖo nɔtɛn towe lɛ́ɛ sín gbɛ.

⁶Mawu Mɛhwlɛ́ngántɔ́ mǐtɔn, a nɔ wa nǔ ɖagbe ɖagbe lɛ́ɛ nú mǐ ɖo hwɛjijɔ towe mɛ, dó yí gbe nú ɖɛ mǐtɔn. Hwi wú wɛ gbɛtɔ́ e gbɔn agěwají xuwa jí é bǐ gán jɛ.

⁷Hlɔ̌nhlɔ́n towe wɛ a zě dó hɛn só lɛ́ɛ ɖó te. A dǒ gbli bɔ é vɛ́ jlɛ́.

⁸Xu lɛ́ɛ ɖo adǎn jí ɔ́, a nɔ hwíhwɛ́ yě. Xu lɛ́ɛ ɖo mlǐmlí wɛ kpó adǎn kpɔ́ ɔ́, a nɔ hwíhwɛ́ yě, bó nɔ́ hwíhwɛ́ togun e ɖo adǎn jí lɛ́ɛ.

⁹Mɛ e ɖo ayǐkúngban ɔ́ jí é bǐ ɖo xɛsi jí káká yi fí e gbɛ ɔ́ kponu ɖó é, ɖó nǔjíwǔ e a nɔ bló lɛ́ɛ wú. A nɔ dó xomɛhunhun nú gbɛtɔ́ lɛ́ɛ, sín zǎnzǎn hwe jí káká yi gbada hwe jí.

¹⁰A nɔ kpé nukún dó ayǐkúngban ɔ́ wú, bó nɔ́ hú sin ná, bɔ é nɔ́ kpé. A nɔ ná dɔkun wɔ̌buwɔ́bú ayǐkúngban. Tɔsisa hwi Mawu ɔ́ tɔn ɖo gǐgɔ́ jí tɛgbɛ. A nɔ bló ayǐkúngban ɔ́ ɖó nú jinukún lɛ́ɛ.

¹¹A nɔ hú sin nú gle lɛ́ɛ. A nɔ jíjé ayǐkúngban ɔ́. A nɔ sɛ́ jǐ gbó dó, bɔ é nɔ́ ja, bɔ ayǐkúngban nɔ nu sin bɔ é nɔ́ kpé lan tɔn mɛ. A nɔ dó acɛ nǔ e nɔ́ wú sín lan tɔn mɛ lɛ́ɛ jí.

¹²A nɔ ná ji bɔ é nɔ jɛ, bɔ xwe ɔ́ nɔ́ fó dó ɖagbe jí. A gbɔn fí ɖé dín ɔ́, dɔkun nɔ sa tɔ.

¹³Gbětótló mɛ bǐ wɛ ama zɔ́n gbɔn kpɛɛn. Só kpɛví kpɛví lɛ́ɛ ɔ́, awǎjijɛ wɛ nyí gǒjíblánú bɔ yě sin.

¹⁴Kanlin ɖo amagbo mɛ winnini. Jinukún wɛ nyí avɔ bɔ tɔdo lɛ́ɛ cyɔ́n. Nǔ bǐ ɖo han ji dó kpa we wɛ.