Read fon Ɖɛhan 67 Bible Online

Ɖɛhan 67 - fon bible

Ɖɛhan 67

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji bó nɔ́ xo kanhún d'é mɛ.

²Mawu ce, ɖe xomɛnyínyɔ́ towe xlɛ́ mǐ, bó xo ɖɛ dó mǐ jí. Nukún towe mɛ ní hɔ́n dó mǐ jí; Agbɔ̌n

³énɛ́ ɔ́, è nǎ tunwun lě e a nɔ wa nǔ gbɔn ɔ́ ɖo ayǐkúngban jí, akɔta lɛ́ɛ bǐ ná tunwun ɖɔ hwi wɛ nɔ́ hwlɛ́n mɛ gán.

⁴Mawu ce, togun lɛ́ɛ ní kpa we, togun lɛ́ɛ bǐ ní kpa we.

⁵Akɔta lɛ́ɛ ní j'awǎ; yě ní ji han dó ɖe awǎjijɛ yětɔn xlɛ́, ɖó a nɔ ɖɔ hwɛ xá togun lɛ́ɛ ɖó sɛ́nxwi jí, bó nɔ́ xlɛ́ ali akɔta lɛ́ɛ ɖo ayǐkúngban ɔ́ jí. Agbɔ̌n

⁶Mawu ce, togun lɛ́ɛ ní kpa we, togun lɛ́ɛ bǐ ní kpa we.

⁷Ayǐkúngban ná jinukún tɔn lɛ́ɛ, Mawu dó nú mǐ, Mawu mǐtɔn dó nú mǐ.

⁸Mawu ní dó nú mǐ, bónú wɛ̌kɛ́zo ɛnɛ lɛ́ɛ bǐ ní ɖó sísí n'i.