Read fon Ɖɛhan 71 Bible Online

Ɖɛhan 71 - fon bible

Ɖɛhan 71

¹Mawu Mavɔmavɔ, hwi wɛ un hɔn wá su, ma nú un ɖu winnyá gbeɖé ó.

²Xɔ mì ɖo hwɛjijɔ towe mɛ; ɖe mì sɔ́ nyi te. Đǒtó mì bó hwlɛ́n mì gán.

³Mawu Mavɔmavɔ, nyǐ só e glɔ́ un ná nɔ́ hɔn hwlá cí é, só e glɔ́ un ná nɔ́ yi hwebǐnu é, a zin alɔ dó akɔ́n ɖɔ émí ná hwlɛ́n mì gán, nǔgbó wɛ, hwi wɛ nyí só ce, hwi wɛ nyí ahohó ce.

⁴Mawu ce, hwlɛ̌n mì ɖo mɛdídá sí, hwlɛ̌n mì ɖo mɛ nyanya, dǎkaxotɔ́ ɔ́ sí.

⁵Đó hwi wɛ un ɖo nukún ɖó wɛ, Aklúnɔ Mawu Mavɔmavɔ, hwi wú wɛ un ɖeji dó sín dɔ̌nkpɛ mɛ,

⁶sín nɔ ce xomɛ ɔ́, hwi wú wɛ un gán jɛ, hwi wɛ ɖe mì tɔ́n sín nɔ ce xomɛ, hwi wɛ un nɔ ɖo susu kpa ná wɛ hwebǐnu.

⁷Mɛ gěgé nɔ́ mɔ mì dó mɔ lɔ̌jɔ́, hwi wɛ ka nyí bibɛtɛn ce fí e nǔɖé má nɔ wa mì ɖe ǎ é.

⁸Han towe ní nɔ́ ɖo nu ce tɛgbɛ; susu kpa nú we sín han ní nɔ́ ɖo nu ce; lě e a d'agba sɔ é sín han ní ɖo nu ce ayǐhɔ́ngbe ayǐhɔ́ngbe.

⁹Un jɛ kpikpoxɔmɛ hǔn, ma ɖe alɔ sín kan ce mɛ ó. Hwenu e hlɔ̌nhlɔ́n ná vɔ ɖo wǔ ce ɔ́, ma jó mì dó ó.

¹⁰Đó kɛntɔ́ ce lɛ́ɛ ɖo xó ce ɖɔ wɛ, mɛ e ɖo wu tɔ nú mì wɛ bó ná hu lɛ́ɛ ɖo kpá yi wɛ;

¹¹yě nɔ́ ɖɔ: “Acɔnkwín! Mawu jó e dó, mi jɛ gǔdo tɔn. Mi wlí i. Mɛ ɖěbǔ ɖe bó ná hwlɛ́n ɛ gán ǎ.”

¹²Mawu ce, ma nɔ zɔ nú mì ó. Mawu ce, wǎ gɔ́ alɔ nú mì; ma lín ó; yǎ wǔ.

¹³Mɛ e ɖo hwɛ dó mì wɛ lɛ́ɛ ní ɖu winnyá, yě bǐ ní kú. Mɛ e ɖo nyanya ce lin wɛ lɛ́ɛ ní ɖu winnyá bó ɖu hɛ̌n.

¹⁴Nyɛ ɔ́, un ka ná ɖo te kpɔ́n we tɛgbɛ, un ná kpa susu nú we, bó ná nɔ́ lɛ́ kpa susu nú we.

¹⁵Ayǐ hɔ́n tɛgbɛ ɔ́, hwɛjijɔ towe kpó hwlɛngán towe kpó nyí han bo ɖo nu ce, yě sukpɔ́ bó gégé, un sixú xa bǐ ǎ.

¹⁶Aklúnɔ Mawu Mavɔmavɔ, un ɖo azɔ̌ ɖaxó ɖaxó e a wa lɛ́ɛ ɖɔ wɛ dó han mɛ, bó ja gɔ̌n towe; un ná flín hwɛjijɔ towe, hwɛjijɔ towe ɖokpónɔ wɛ un ná flín.

¹⁷Mawu ce, a kplɔ́n nǔ mì sín dɔ̌nkpɛ mɛ, bɔ káká wá jɛ égbé ɔ́, un ɖo azɔ̌ ɖagbe ɖagbe e a wa lɛ́ɛ jlá wɛ.

¹⁸Mɔ̌ ɖokpó ɔ́, Mawu ce, hɛn mì káká yi kpikpo hwenu; hwenu e ɖa e ɖo ta ce ɔ́ bǐ ná nyí hwa ɔ́, ma jó mì dó ó; énɛ́ ɔ́, un nǎ ɖɔ lě e a ɖǒ hlɔ̌nhlɔ́n sɔ é nú din ví lɛ́ɛ, un nǎ ɖɔ lě e a kpé nǔ wú gbɔn é nú mɛ e ná wá jɔ sɔ lɛ́ɛ.

¹⁹Mawu ce, nǔ wa ɖó sɛ́n jí towe d'agba lóóo. A wa azɔ̌ ɖaxó ɖaxó lɛ́ɛ. Mawu ce, mɛ̌ è ka sixú jlɛ́ dó wǔ towe?

²⁰A sɔ́ nǔ xlɛ́ mì: adǎn gbo mì, awě xo mì, amɔ̌, hwi jɛ́n ná lɛ́ ɖe mì sín mɛ. A nǎ wá ɖe mì tɔ́n sín do gɔngɔn mɛ.

²¹Sɔ́ mì su. Lɛ̌ vɔ́ dó gbɔ nú mì.

²²Nyɛ ɔ́, un ka ná xo kanhún dó kpa we. Mawu ce, un ná kpa we ɖó a ɖo gbejí. Un ná mlá we kpódó agǐdigbo kpó, Mɛ mímɛ́ Izlayɛ́li tɔn.

²³Un ɖo xó lómílómí ɖɔ dó han mɛ dó sɔ́ we su wɛ, un sɔ́ nu ce dó ɖo mlǎmlá we wɛ, bɔ lǐndɔ̌n ce e a hwlɛ̌n gán é ná nɔ́ ɖo mlǎmlá we wɛ.

²⁴Đɛ̌ ce lɔ ná nɔ́ ɖɔ lě e a nɔ wa nǔ ɖó sɛ́nxwi jí gbɔn é, ɖó mɛ e ɖo nyanya ce lin wɛ lɛ́ɛ ɔ́, yě ɖu winnyá, wi yětɔn kɔ́n.