Read fon Ɖɛhan 74 Bible Online

Ɖɛhan 74 - fon bible

Ɖɛhan 74

¹Xó lómílómí Asáfu tɔn. Mawu ce, nɛ̌ ka gbɔn bɔ a jó mǐ dó bǐ mɔ̌? Nɛ̌ ka gbɔn bɔ a ɖo xomɛ sin dó lɛ̌ngbɔ́ e ɖo wutó towe mɛ lɛ́ɛ wɛ mɔ̌?

²Flín togun towe, togun towe e a sɔ́ ɖ'ayǐ xóxó bɔ é nyí towe é; Flín akɔta e a hwlɛ̌n gán é; é wɛ nyí akɔta towe. Flín Sinyɔ́ɔ só ɔ́, Sinyɔ́ɔ fí e a sɔ́ nɔtɛn towe ɖó é.

³Sɔ́ afɔ towe bo wá kpɔ́n fí ɖěɖě è gba, bɔ é kpo ɖo mɔ̌ káká jɛ din é. Nǔ e ɖo xwé towe gbe lɛ́ɛ bǐ wɛ kɛntɔ́ hɛn gblé.

⁴Kɛntɔ́ towe lɛ́ɛ ɖo adǎn jí, bó ɖo xó sú wɛ ɖo nɔtɛn towe fí e a nɔ kpé mǐ ɖe é. Asyá yětɔn wɛ yě tun te fínɛ́, ɖɔ émí wɛ ɖo mɔ̌ nyí wɛ.

⁵Yě cí atíngbotɔ́ e ɖe asyɔ́ nyi zungbó ɖé mɛ, bó ná sú kún tɔn dó é ɖɔhun,

⁶bɔ din ɔ́, yě fɔ asyɔ́ kpó zǔn kpó, dó gba acɔ́nú lɛ́ɛ bǐ.

⁷Yě dó xwé towe zo. Yě mu dǒ lɛ́ɛ bǐ, bó ɖu su nú xwé towe.

⁸Yě nɔ́ ɖɔ dó ayi mɛ ɖɔ: “Mǐ ná vívá kún yětɔn zɛ̌nzɛ̌n.” Énɛ́ ɔ́, yě dǒ fí e è nɔ kplé bó nɔ́ sɛn Mawu ɖe ɖo to ɔ́ mɛ lɛ́ɛ bǐ zo.

⁹Mǐ sɔ́ nɔ́ mɔ asyá mǐtɔn ɔ́ ɖě ǎ. Gbeyíɖɔ Mawu tɔn ɖě sɔ́ ɖe ǎ. Mɛ ɖěbǔ ka ɖo mǐ mɛ bó tunwun hwenu e é ná fó dó ɔ́ ǎ.

¹⁰Mawu ce, káká jɛ hwetɛ́nu acɛgannaganna-kpanúmɛtɔ́ ɔ́ ná dó hɛ̌n we yi jɛ? Kɛntɔ́ ná fɔ́n, bó ɖo nyǐkɔ towe cá ko wɛ tɛgbɛ wɛ a?

¹¹Étɛ́wú a ka ɖe alɔ towe sín mǐ wǔ, ɖisí lɔ towe sín mǐ wǔ? Ma blá alɔ dó wǔ ó, hu yě.

¹²Mawu wɛ kó nyí axɔ́sú ce sín do. Mawu ce ɔ́ wɛ nɔ́ hwlɛ́n mɛ gán ɖo ayǐkúngban ɔ́ jí.

¹³ Hwi wɛ sɔ́ hlɔ̌nhlɔ́n towe dó má xu ɖó we. A gba nǔdábaɖa e nɔ́ nɔ tɔ lɛ́ɛ mɛ lɛ́ɛ sín ta.

¹⁴ Hwi wɛ gba Levyatáan lɛ́ɛ sín ta hánnyá, bó sɔ́ nú mɛ e ɖo gbětótló mɛ lɛ́ɛ ɖɔ yě ní ɖu.

¹⁵Hwi wɛ ɖe sin tɔ́n sín ayǐkúngban lanmɛ, bɔ tɔsisa lɛ́ɛ tíin. Hwi wɛ ɖɔ bɔ tɔsisa e ma nɔ xú gbeɖé ǎ lɛ́ɛ xú.

¹⁶Towe wɛ nyí kéze, zǎn lɔmɔ̌ ɔ́, towe wɛ. Hwi wɛ ɖó sun kpó hwe kpó.

¹⁷Hwi wɛ ɖó dogbó nú ayǐkúngban, hwi wɛ ɖó alǔun kpó avivɔ hwenu kpó.

¹⁸Mawu Mavɔmavɔ, flín ɖɔ kɛntɔ́ ɖo hɛ̌n dó émí wɛ. Flín ɖɔ togun ma ɖó nǔnywɛ́ ɖé ɖo tɛ́ hu nú nyǐkɔ émítɔn wɛ.

¹⁹Ma jó Izlayɛ́li ahwannɛ́ towe sín gbɛ nú kanlin lɛ́ɛ ó; mɛ towe e adǎn gbo lɛ́ɛ ɔ́, ma wɔn gbɛ yětɔn káká sɔ́yi ó.

²⁰Kpɔ́n dó akɔ e a jɛ xá mǐ ɔ́ wú, ɖó fí e jɛ nǔglɔ́ ɖo to ɔ́ mɛ lɛ́ɛ ɔ́, dǎkaxotɔ́ lɛ́ɛ sín avatɛn wɛ kpé fí énɛ́ lɛ́ɛ.

²¹Mɛ e táfú wɛ è ɖe ɔ́ ní má ɖu winnyá bó lɛ́ kɔ ó. Gbɛ̌dónɔ kpó wamamɔnɔ kpó ní nɔ́ mlá nyǐkɔ towe.

²²Mawu ce, sí te; jɛ ahwan hwiɖée jí. Ma wɔn adǎn e gblɔ́n nú we wɛ mɛ e ma ɖó nǔywɛ́ ɖé lɛ́ɛ ɖe hwebǐnu é ó.

²³Ma wɔn xó e sú wɛ kɛntɔ́ towe lɛ́ɛ ɖe ɔ́ ó. Ma wɔn zǐngídi e ɖú wɛ mɛ e sí te dó jǐ towe lɛ́ɛ ɖe hwebǐnu ɔ́ ó.