Read fon Ɖɛhan 79 Bible Online

Ɖɛhan 79 - fon bible

Ɖɛhan 79

¹ Asáfu sín han. Mawu ce, akɔta ɖěvo ɖěvo lɛ́ɛ vun gba ayǐkúngban towe; yě ɖu su nú sinsɛnxɔ mímɛ́ towe; yě zé Jeluzalɛ́mu dó húzú dǒglin.

²Yě jǒ mɛ e nɔ sɛn we lɛ́ɛ sín cyɔ dó nú xɛ, bɔ xɛ ɖu; yě jǒ mɛ e ɖo gbejí nú we lɛ́ɛ sín lan dó nú gběkanlin, bɔ gběkanlin ɖu.

³Yě kɔn hun yětɔn kɔn nyi ayǐ sin ɖɔhun lɛ́ lɛ̌ dó Jeluzalɛ́mu, mɛ ɖěbǔ ká ɖe bó ná ɖi cyɔ yětɔn ǎ.

⁴A sɔ́ mǐ dó húzú zuntín nú mɛ e ɖo akpá mǐtɔn lɛ́ɛ; mǐ húzú slǎmɛ ɖɔ nú, mǐ húzú nǔkiko nú mɛ e lɛ́ lɛ̌ dó mǐ lɛ́ɛ.

⁵Mawu Mavɔmavɔ, xomɛ e sin dó mǐ wɛ a ɖe ɔ́, hwetɛ́nu wɛ a nǎ jǒ dó dó? Xomɛsin towe e ɖo nǔ fyɔ́ wɛ myɔ ɖɔhun ɔ́, hwetɛ́nu wɛ a nǎ jǒ dó dó?

⁶Sin xomɛ dó akɔta e ma tunwun we ǎ lɛ́ɛ, sin dó axɔ́súɖuto e ma nɔ sɛn we ǎ lɛ́ɛ.

⁷Đó yě vúnvún Jakɔ́bu togun ɔ́; yě gba nɔtɛn tɔn hánnyá.

⁸Ma sɔ́ flín hwɛ e tɔ́gbó mǐtɔn lɛ́ɛ hu lɛ́ɛ ó. Nǔbláwǔkúnúmɛ towe ní yá wǔ wá, ɖó mǐ jɛ ayǐ bǐ sésé.

⁹Mawu gbɛxɔnúmɛtɔ́ mǐtɔn, gɔ̌ alɔ nú mǐ, ɖó susu e nyǐkɔ towe ɖó ɔ́ wú; hwlɛ̌n mǐ, bó sɔ́ hwɛ mǐtɔn lɛ́ɛ kɛ mǐ, ɖó nyǐkɔ towe wú.

¹⁰Étɛ́wú akɔta ɖě lɛ́ɛ ná kanbyɔ́ ɖɔ: “Fítɛ́ Mawu yětɔn ká ɖe?” Mɛsɛntɔ́ towe e sín hun è kɔn nyi ayǐ lɛ́ɛ ɔ́, lě e a nɔ ba hlɔn nú yě gbɔn ɔ́, ɖe xlɛ́ akɔta énɛ́ lɛ́ɛ ɖo nukún mǐtɔn mɛ.

¹¹Mavɔmavɔ, vo e sa wɛ gantɔ́ ɖe ɔ́ ní hun káká wá gɔ̌n towe. Hwlɛ̌n mɛ e ɖo nǎ dɔn wɛ lɛ́ɛ gán, ɖó a dǒ hlɔ̌nhlɔ́n sɔ mɔ̌.

¹²Aklúnɔ, togun e ɖo akpá mǐtɔn lɛ́ɛ ɔ́, cí e yě kɔn dó wǔ we lɛ́ɛ ɔ́, sú axɔ́ tɔn yě; sú axɔ́ tɔn yě azɔn tɛ́nwe.

¹³Énɛ́ ɔ́, mǐdɛɛ lɛ́ɛ e nyí togun towe ɔ́, mǐ lɛ̌ngbɔ́hwan e a nyǐ lɛ̌ngbɔ́nyitɔ́ ná lɛ́ɛ ɔ́, mǐ ná nɔ́ ji han dó kpa we káká sɔ́yi; mǐ nǎ nɔ́ kpa susu nú we sín jijimɛ ɖě jí yi ɖě jí.