Read fon Ɖɛhan 80 Bible Online

Ɖɛhan 80 - fon bible

Ɖɛhan 80

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji dó han e è nɔ ylɔ́ ɖɔ “Folówa ɖagbe ɖagbe” ɔ́ sín hangbe mɛ. Kúnnuɖiɖe Asáfu tɔn sín han wɛ.

² Lɛ̌ngbɔ́nyitɔ́ Izlayɛ́li tɔn, ɖǒtó! Hwi mɛ e nɔ xlɛ́ ali Jozɛ́fu ví lɛ́ɛ lɛ̌ngbɔ́nyitɔ́ ɖɔhun ɔ́, hwi mɛ e ɖo ayǐjínjɔ́n ɖo wɛnsagun susunɔ lɛ́ɛ jí ɔ́, ɖe hwiɖée xlɛ́ ɖo susu towe mɛ.

³Zǎn hlɔ̌nhlɔ́n towe ɖo akɔta Eflayímu tɔn nukɔn, zǎn ɖo akɔta Bɛnjamɛ́ɛ tɔn nukɔn, zǎn hlɔ̌nhlɔ́n towe ɖo akɔta Manasée tɔn nukɔn, wǎ hwlɛ́n mǐ.

⁴Mawu ce, zě mǐ ɖó tɛn e mɛ mǐ ɖe ɖ'ayǐ é mɛ; zě nukún ɖagbe dó kpɔ́n mǐ; énɛ́ ɔ́, mǐ nǎ gán.

⁵Mawu Mavɔmavɔ, Mawu Nǔbǐwúkpétɔ́, káká jɛ hwetɛ́nu ɖɛ e xo wɛ togun towe ɖe é ká ná dó xomɛsin nú we yi jɛ?

⁶Đasin wɛ nyí nǔɖuɖu e a nɔ ná yě ɔ́, a nɔ ná yě bɔ yě nɔ́ nu bɔ é nɔ́ kpé yě kpo.

⁷A sɔ́ mǐ dó húzú nǔhwlɛ́nhwlɛ́n nú mɛ e ɖo akpá mǐtɔn lɛ́ɛ, bɔ kɛntɔ́ mǐtɔn lɛ́ɛ ɖo mǐ kó wɛ.

⁸Mawu Nǔbǐwúkpétɔ́, zě mǐ ɖó tɛn e mɛ mǐ ɖe ɖ'ayǐ é mɛ, zě nukún ɖagbe dó kpɔ́n mǐ; énɛ́ ɔ́, mǐ nǎ gán.

⁹A hɔn vǐwuntín ɖé sín Ejípu, bó nya akɔta lɛ́ɛ, bó sɔ́ tun ɖó to yětɔn mɛ.

¹⁰A blǒ tɛnmɛ ɖó ɖ'ayǐ nú vǐwuntín ɔ́, bɔ é dó ɖɔ do bó vun kan kpé to ɔ́ mɛ bǐ.

¹¹Yɛtɛn tɔn kpé só lɛ́ɛ jí, ala tɔn lɛ́ɛ vun káká yi sɛ́dlutín e d'agba hú ɖě lɛ́ɛ bǐ é jí.

¹²É vun ala káká yi Mɛditɛlanɛ́ɛ xu ɔ́ tó, é jɔ vǐ káká yi Nilu tɔ ɔ́ mɛ.

¹³Étɛ́wú a ka mu dǒ e è mɛ lɛ́ lɛ̌ dó vǐwuntín ɔ́ é, bɔ aligbɔntɔ́ ɖé jɛ fínɛ́ ɔ́, é nɔ́ yi gbɛ lě e é jló e gbɔn ɔ́?

¹⁴Aglǔza gbě tɔn lɛ́ɛ nɔ́ wá dó awɔnnu mɛ bó nɔ kíjé, gběkanlin lɛ́ɛ nɔ wá ɖu nǔ ɖo fínɛ́.

¹⁵Mawu Nǔbǐwúkpétɔ́, lɛ̌ kɔ wá; nɔ jǐxwé dɔ̌n bó kpɔ́n nǔ e ɖo jijɛ wɛ ɔ́ sɛ́ dó. Wǎ kpé nukún dó vǐwuntín énɛ́ wú.

¹⁶Nya xɛ ɖo atín e hwi ɖésúnɔ sɔ́ alɔ towe dó tun ɔ́ jí, nya xɛ ɖo vǐ súnnu e a hɛn bɔ é su é jí.

¹⁷Kɛntɔ́ mǐtɔn lɛ́ɛ gbo atín ɔ́ bó dó zo; sɔ́ nukún nyanya dó kpɔ́n yě, sú kún yětɔn dó.

¹⁸Alɔ towe ní nɔ mɛ e ɖo ayǐjínjɔ́n ɖo aɖisí towe xwé ɔ́ jí, éyɛ́ mɛ e a sɔ́ su ɔ́ jí.

¹⁹Énɛ́ ɔ́, mǐ sɔ́ ná nɔ́ sɛ yi zɔ nú we ɖě ǎ. Lɛ̌ ná gbɛ mǐ, bónú mǐ ná nɔ́ xomlá nyǐkɔ towe.

²⁰Mawu Mavɔmavɔ, Mawu Nǔbǐwúkpétɔ́, zě mǐ ɖó tɛn e mɛ mǐ ɖe ɖ'ayǐ é mɛ, zě nukún ɖagbe dó kpɔ́n mǐ; énɛ́ ɔ́, mǐ nǎ gán.