Read fon Ɖɛhan 86 Bible Online

Ɖɛhan 86 - fon bible

Ɖɛhan 86

¹Davídi sín ɖɛ. Mawu Mavɔmavɔ, ɖǒtó mì, yǐ ɖɛ ce, ɖó gbɛ̌dónɔ, mɛmaɖómɛɖé wɛ un nyí.

²Nya xɛ ɖo jǐ ce, ɖó un ɖo gbejí nú we. Mawu ce, hwlɛ̌n nyɛ mɛsɛntɔ́ towe e sɔ́ nyɛɖée jó nú we ɔ́ gán.

³Aklúnɔ, kú nǔbláwǔ nú mì, ɖó hwi wɛ un nɔ ylɔ́ ayǐhɔ́ngbe ayǐhɔ́ngbe.

⁴Aklúnɔ, dǒ xomɛhunhun nú nyɛ mɛsɛntɔ́ towe, ɖó hwi wɛ un sɔ́ ayi ce jó ná.

⁵Hwi wɛ nyí Aklúnɔ, a nyɔ̌, a ɖo gbesisɔ mɛ bó ná sɔ́ hwɛ kɛ mɛ; a nɔ nyɔ́ xomɛ dó mɛ e nɔ ylɔ́ we lɛ́ɛ bǐ wú.

⁶Mawu Mavɔmavɔ, ɖǒtó ɖɛ ce, se vo e sa wɛ un ɖe lɛ́ɛ é.

⁷Adǎn gbo mì ɔ́, hwi wɛ un nɔ ylɔ́, ɖó a nɔ yí ɖɛ ce.

⁸Aklúnɔ, nǔmɛsɛn ɖě cí hwi ɖɔhun ǎ; nǔmɛsɛn ɖě sixú wa azɔ̌ e a nɔ wa lɛ́ɛ ǎ.

⁹ Aklúnɔ, akɔta e a blǒ lɛ́ɛ bǐ nǎ wá ɖe kɔ́ nú we, bǐ nǎ kpa susu nú nyǐkɔ towe.

¹⁰Đó a d'agba, a nɔ wa nǔjíwǔ, hwi ɖokpónɔ wɛ nyí Mawu.

¹¹Mawu Mavɔmavɔ, xlɛ́ ali e un ná gbɔn é mì, énɛ́ ɔ́, un ná xwedó xó towe dó wa nǔ ná. Sɔ́ ayixa e ná ɖó sísí nú we ɔ́ dó xomɛ nú mì.

¹²Aklúnɔ Mawu ce, un ná nɔ́ kpa we kpó ayixa ce bǐ kpó, un ná nɔ́ kpa susu nú nyǐkɔ towe káká sɔ́yi,

¹³ɖó xomɛ e a nyɔ̌ dó wǔ ce ɔ́ d'agba, a hwlɛ̌n mì sín kútomɛ, do gɔngɔn ɔ́ mɛ.

¹⁴Mawu ce, gbɛtɔ́ goyítɔ́ lɛ́ɛ sí te dó jǐ ce, adǎkaxotɔ́ lɛ́ɛ dó ahwan gbě bó ɖo nǎ hu mì wɛ. Hwɛ Mawu ɔ́, a ɖǒ tɛnmɛ ɖě ɖo ayi yětɔn mɛ ǎ.

¹⁵Amɔ̌, hwɛ Aklúnɔ ɔ́, Mawu xomɛfátɔ́ wɛ a nyǐ, nǔbláwǔkúnúmɛtɔ́ wɛ a nyǐ, a nɔ yá wǔ sin xomɛ ǎ, xomɛnyɔ́tɔ́ wɛ a nyǐ, gbejínɔtɔ́ wɛ a nyǐ.

¹⁶Nyi kɔ kpɔ́n mì, kú nǔ blá wǔ ce; nǎ hlɔ̌nhlɔ́n nyɛ mɛsɛntɔ́ towe, hwlɛ́n nyɛ mɛsɛntɔ́ towe ví ɔ́ gán.

¹⁷Sɔ́ wuntun ɖé xlɛ́ mì ɖɔ nǔ ná nyɔ́ nú mì; énɛ́ ɔ́, hwenu e mɛ e gbɛ́ wǎn nú mì lɛ́ɛ ná mɔ ɖɔ hwɛ Mawu Mavɔmavɔ wɛ gɔ́ alɔ nú mì bó dó gbɔ nú mì é ɔ́, winnyá ná hu yě.