Read fon Ɖɛhan 98 Bible Online

Ɖɛhan 98 - fon bible

Ɖɛhan 98

¹Ɖɛhan. Mi ji han yɔ̌yɔ́ dó kpa Mawu Mavɔmavɔ, ɖó é jlɛ́ nǔ ɖaxó ɖaxó. É sɔ́ nǔwúkpíkpé tɔn kpó hlɔ̌nhlɔ́n tɔn kpó dó ɖu ɖ'é jí.

²Mawu Mavɔmavɔ ɖe ɖuɖéjí tɔn xlɛ́, é ɖe lě e é nɔ wa nǔ ɖó sɛ́nxwi jí gbɔn é xlɛ́ akɔta lɛ́ɛ.

³É flín lě e é nyɔ́ xomɛ dó Izlayɛ́li togun ɔ́ wú gbɔn é, é flín lě e é ɖo gbejí nú Izlayɛ́li togun ɔ́ gbɔn é. Mɛ e ɖo ayǐkúngban ɔ́ jí káká yi fí e gbɛ ɔ́ kponu ɖó lɛ́ɛ bǐ mɔ ɖɔ Mawu mǐtɔn hwlɛ́n mǐ gán.

⁴Mi gbɛtɔ́ e ɖo ayǐkúngban ɔ́ jí lɛ́ɛ e mi, mi sú xó sɛ́ dó Mawu Mavɔmavɔ kpódó awǎjijɛ kpó, mi ɖe xomɛhunhun mitɔn xlɛ́, mi ɖɔ xó lómílómí dó mlá nyǐkɔ tɔn dó han mɛ.

⁵Mi ɖɔ xó lómílómí dó mlá nyǐkɔ tɔn bó xo kanhún d'é mɛ, mi sɔ́ kanhún dó ji han bo mlá Mawu Mavɔmavɔ.

⁶Mi kún kpete bó kún lanzo dó kpa Mawu Mavɔmavɔ; mi sú xó kpó awǎjijɛ kpó ɖo Mawu Mavɔmavɔ axɔ́sú ɔ́ nukɔn.

⁷Xu ní xo zǐn, nǔ e ɖo xu mɛ lɛ́ɛ bǐ ní xo zǐn, gbɛ ɔ́ kpó mɛ e ɖo gbɛ ɔ́ mɛ lɛ́ɛ kpó bǐ ní sú xó,

⁸tɔsisa lɛ́ɛ bǐ ní xo kpɛ́, só lɛ́ɛ bǐ ní sú xó zɛ̌nzɛ̌n kpó awǎjijɛ kpó,

⁹ɖo Mawu Mavɔmavɔ nukɔn, ɖó é jǎwe, bó ná wá ɖɔ hwɛ xá ayǐkúngban ɔ́; é ná ɖɔ hwɛ xá gbɛ ɔ́ ɖó sɛ́nxwi jí, bó ɖɔ hwɛ xá togun lɛ́ɛ lě e é sɔgbe gbɔn é.