Read fon Nǔnywɛ́xó 1 Bible Online

Nǔnywɛ́xó 1 - fon bible

Nǔnywɛ́xó 1

¹ Nǔnywɛ́xó Salomɔ́ɔ, Davídi ví, Izlayɛ́li xɔ́sú ɔ́ tɔn lɛ́ɛ.

²Xó tɔn lɛ́ɛ nɔ́ ná nǔnywɛ́ mɛ, yě nɔ́ ná kplɔ́n mɛ. Yě nɔ́ dó alɔ mɛ bɔ è nɔ mɔ nukúnnú jɛ xó jɔ xó lɛ́ɛ mɛ.

³Yě nɔ́ kplɔ́n nǔnywɛ́gbɛ zínzán mɛ, nǔ e sɔgbe lɛ́ɛ mɛ, nǔ e ɖo sɛ́nxwi jí lɛ́ɛ kpó nǔ e nyí nǔ jlɔ́jlɔ́ lɛ́ɛ kpó mɛ.

⁴Yě nɔ́ kplɔ́n mɛ e ma ɖó nǔnywɛ́ ɖé ǎ lɛ́ɛ, bɔ yě nɔ́ tunwun afɔ e yě ná ɖe é. Yě nɔ́ dó alɔ mɛ wínnyáwínnyá lɛ́ɛ, bɔ yě nɔ́ tunwun nǔ, yě nɔ́ lin tamɛ kpɔ́n.

⁵Mɛ e ɖó nǔnywɛ́ é ní ɖótó, bó ná yí nǔnywɛ́ dó nǔnywɛ́ jí; mɛ e nyí mɛ bíbí é lɔ ná kplɔ́n lě e é ná nɔ́ wa nǔ gbɔn é;

⁶è dǒ lǒ ɔ́, mɛ e ɖó nǔnywɛ́ é kpó mɛ e nyí mɛ bíbí é kpó ná mɔ nǔ jɛ mɛ; è ɖɔ nǔnywɛ́xó ɖé abǐ è so nǔ dó mɛ ɔ́, yě ná mɔ nǔ jɛ mɛ.

⁷ Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é. Xlonɔ lɛ́ɛ wɛ nɔ́ hu tɛ́ nú nǔnywɛ́, bó nɔ́ hu nú nǔkplɔ́nkplɔ́n.

⁸Vǐ ce, ɖǒtó te bo yí kplɔ́n e ná we wɛ tɔ́ towe ɖe lɛ́ɛ; ma hɔn nǔ e nɔ towe nɔ kplɔ́n we lɛ́ɛ nyi gbě ó.

⁹Đó jɛ̌gbákún wɛ nǔ énɛ́ lɛ́ɛ nyí ɖo ta nú we, jɛ̌ wɛ yě nyí ɖo kɔ nú we.

¹⁰Vǐ ce, ényí nǔnyanyawatɔ́ lɛ́ɛ jló ná dɔn we dó awo mɛ hǔn, ma lɔn ó.

¹¹Ényí yě ɖɔ nú we ɖɔ: “Wǎ mǐ yi! Wǎ mǐ yi tɔ wu bó ná kɔn hun kɔn nyi ayǐ! Wǎ mǐ yi ɖó mɔ nú xomɛvɔ́nɔ bó dó da ayihún ná.

¹²Mǐ nǎ mi yě gbɛɖe gbɛɖe kútomɛ ɖɔhun, mǐ nǎ bú yě kpéte yɔdo ɖɔhun.

¹³Mǐ nǎ mɔ nǔ ɖagbe ɖagbe alɔkpa alɔkpa, bɔ dɔkun ná gɔ́ xwé mǐtɔn.

¹⁴Wǎ mǐ yi! Hwi lɔ ná mɔ towe ɖ'é mɛ. Dɔkun mǐtɔn lɛ́ɛ bǐ ná nɔ kpɔ́.”

¹⁵Vǐ ce, ma xwedó mɛ mɔ̌hun lɛ́ɛ ó. Nɔ zɔ nú yě.

¹⁶Đó wezun wɛ yě nɔ́ dó bó nɔ yí wa nǔ nyanya. Nǔ e yě nɔ́ hwlɛ́n dó ɔ́ wɛ nyí yě ná kɔn hun kɔn nyi ayǐ.

¹⁷È nɔ ɖó xɛ mɔ ɖo xɛ nukún mɛ ǎ, nǔ yǎyá wɛ é ná nyí.

¹⁸Amɔ̌, nǔnyanyawatɔ́ lɛ́ɛ ɔ́, yě ná kɔn hun yě ɖésúnɔ tɔn kɔn nyi ayǐ wú wɛ yě nɔ́ yi tɔwu; yě ná gblé gbɛ dó nú yěɖée wú wɛ yě nɔ́ yi cí nǔglɔ́ bó nɔ́ ɖo mɛ cɔ́ wɛ.

¹⁹Nǔ e nɔ́ gbo mɛ e nɔ gba acɛ dó jɛ dɔkun lɛ́ɛ é nɛ́: acɛ gba dó jɛ dɔkun ɔ́, mɛ wɛ é nɔ́ hu.

²⁰ Nǔnywɛ́ nɔ ɖo xó sú wɛ gbɔn alixo alixo. É nɔ zé gbe dó jǐ, bó nɔ́ ɖɔ xó gbɔn tokplétɛn tokplétɛn.

²¹Gbɛtɔ́ sukpɔ́ ɖo fí ɖé ɔ́, nǔnywɛ́ nɔ́ sú xó, bó nɔ́ ɖɔ xó nú mɛ ɖo fínɛ́; é nɔ́ ɖɔ xó nú mɛ ɖo fí e è nɔ kplé xó ɖɔ ɖe lɛ́ɛ; é nɔ́ ɖɔ:

²²“Gɔgɔnɔ e mi, káká jɛ hwetɛ́nu wɛ gɔgɔmɛninɔ ná víví nú mi yi jɛ? Mɛcákotɔ́ e mi, káká jɛ hwetɛ́nu wɛ mɛcáko ná víví nú mi yi jɛ? Xlonɔ e mi, káká jɛ hwetɛ́nu wɛ mi ná gbɛ́ wǎn nú nǔtunwuntunwun yi jɛ?

²³Mi ɖótó nǔ e gbɛ́ nú mi wɛ un ɖe é. Énɛ́ ɔ́, un ná kɔn yɛ ce kɔn nyi mi jí, un ná bló bɔ mi ná tunwun xó ce lɛ́ɛ.

²⁴Un ylɔ́ mi, mi ka dó tókúse mɛ. Un kɛ alɔ nú mi, mɛɖé ká kpɔ́n jɛ ce jí ǎ.

²⁵Mi hɔn nǔ e un kplɔ́n mi lɛ́ɛ bǐ nyi gbě; mi ba ɖɔ má gba nǔɖé sín akpá nú mi ǎ.

²⁶Énɛ́ ɔ́ wú wɛ hwenu e gbɛmɛwé ná xo mi ɔ́, un ná ko mi; hwenu e xɛsi ná ɖo mi jí ɔ́, un ná ɖɔ ɖɔɖɔ mi wú.

²⁷Hwenu e xɛsi ná jɛ mi jí ajijimɛ jǐ e nɔ wɔ́ kpó jɔhɔn ɖaxó kpó é ɖɔhun, bɔ gbɛmɛwé ná xo mi ajijimɛ axásáxásá jɔhɔn ɖɔhun, bɔ mi ná ɖo aluwɛ mɛ, bó ná ɖo adohu adohu jí ɔ́,

²⁸mi ná ylɔ́ mì, un ka ná kɛ nu ǎ; mi ná ba mì, mi ka ná mɔ mì ǎ.

²⁹Mi gbɛ́ ɖɔ émí kún ná kplɔ́n lě e è nɔ nɔ gbɛmɛ gbɔn ɔ́ ó, mi gbɛ́ ɖɔ émí kún ná ɖó sísí nú nyɛ Mawu Mavɔmavɔ ó.

³⁰Mi gbɛ́ wǎn nú nǔ e un kplɔ́n mi lɛ́ɛ, mi hu tɛ́ nú akpá e un gba nú mi lɛ́ɛ.

³¹Lě e mi jɔ ɔ́, mi ná ɖu le tɔn. Nǔ nyanya e mi ɖésú nɔ́ lin lɛ́ɛ ɔ́, mi ná ɖu káká bɔ é ná kpé kɔ nú mi.

³²Đó xlonɔ ɔ́, tónú má se tɔn wɛ nɔ hu i; gɔgɔnɔ ɔ́, nǔɖé má sɔ́ ylɔ́ ɖɔ nǔ tɔn nɔ zɔ́n bɔ é nɔ́ yi dɔn.

³³Amɔ̌, mɛ e nɔ ɖótó mì é ná nɔ vivo mɛ; ayi tɔn ná jɛ ayǐ; nǔ nyanya ɖé ná dó adohu n'i ǎ.”