Read fon Nǔnywɛ́xó 12 Bible Online

Nǔnywɛ́xó 12 - fon bible

Nǔnywɛ́xó 12

¹Mɛ e è kɛ nu dó nǔ wú n'i ɔ́, è nɔ́ se ɔ́, yí wǎn nú nǔtunwuntunwun; mɛ e ma ka nɔ ba ɖɔ mɛɖé ní gbɛ́ nǔ nú émí ǎ ɔ́, xlo wɛ é jɔ.

²Mawu Mavɔmavɔ nɔ nyɔ́ xomɛ dó mɛ ɖagbe wú; lo ɔ́, é nɔ́ ɖó hwɛ nú mɛ e ɖó linlin nyanya é.

³Dǎkaxixo wɛ nɔ́ zɔ́n bɔ è nɔ lí dǒ ǎ; lo ɔ́, nǔ wa ɖó sɛ́nxwi jí wɛ nɔ́ zɔ́n bɔ è nɔ dó ɖɔ do.

⁴Nyɔ̌nu e nyí nyɔ̌nu jɔ nyɔ̌nu ɔ́, wi wɛ é nyí bó ɖo ta nú asú tɔn. Nyɔ̌nu e nɔ́ dó winnyá mɛ é ká nyí xúɖuxúɖu ɖo lanmɛ nú asú tɔn.

⁵Mɛ e nɔ wa nǔ ɖó sɛ́nxwi jí ɔ́, nǔ jlɔ́jlɔ́ kɛ́ɖɛ́ wɛ é nɔ́ lin ná bló. Mɛdídá lɛ́ɛ ɔ́, yě ká nɔ́ lin nǔ ɖěvo zɛ ahizi wú ǎ.

⁶Xó e mɛdídá nɔ́ ɖɔ ɔ́ wɛ nyí mɔ e mɛ é nɔ jɛ bó nɔ́ kú é; xó e ká nɔ́ tɔ́n sín ayijlɔ́jlɔ́nɔ nu mɛ é wɛ nɔ́ hwlɛ́n ɛ gán.

⁷Mɛdídá lɛ́ɛ jɛ ayǐ ɔ́, kún yětɔn nɔ́ sú dó; nǔjlɔ́jlɔ́watɔ́ lɛ́ɛ sín xwé ká nɔ́ lí.

⁸Mɛ e nɔ lin tamɛ kpɔ́n ɔ́, è nɔ kpa susu n'i, bó ka nɔ hu tɛ́ nú gbɛtɔ́ ayi hízíhízínɔ.

⁹È ɖǒ mɛsɛntɔ́ ɖokpó lě e agbɔ̌n tɔn ɖo mɛ wú gbɔn ɔ́, é nyɔ́ hú è blǒ nyɛ wɛ sɔ lě, bó ká ba nǔ e è nǎ ɖu ɔ́ kpo.

¹⁰Mɛ e nɔ wa nǔ ɖó sɛ́nxwi jí ɔ́ nɔ́ ké ya nú nǔ e hu dó kanlin tɔn lɛ́ɛ é; lo ɔ́ mɛdídá ɔ́, alǎnnúwiwa kɛ́ɖɛ́ wɛ ká ɖo ayi tɔn mɛ.

¹¹Mɛ e nɔ lɛ gle tɔn ɔ́ ná mɔ nǔ ɖu, bó gɔ́ xo; mɛ e ka nɔ ɖó kan dó nǔ ma nyí nǔɖé wú ɔ́, taglo mɛ tɔn wa azɔ̌ ǎ.

¹²Mɛdídá ɔ́, nukún tɔn nɔ́ ɖo nǔ e mɛdídá lɛ́ɛ ɖó ɔ́ wú; mɛ e ka nɔ wa nǔ ɖó sɛ́nxwi jí ɔ́ sín ɖɔ nɔ ná nǔ ɖagbe.

¹³Xó nyanya e tɔ́n sín mɛ nú mɛ é wɛ nɔ́ lɛ́ nyí fɛ́ca nú mɛ; mɛ e nɔ wa nǔ ɖó sɛ́nxwi jí ɔ́ ká nɔ́ tɔ́n sín hɔzɔ bǐ mɛ.

¹⁴Xó e nɔ́ tɔ́n sín mɛ nu mɛ ɔ́ hɛn ɔ́, é ná dó dɔkun nú mɛ; azɔ̌ e è wa ɔ́ wɛ è nɔ ɖu.

¹⁵Xlonɔ nɔ mɔ ɖɔ nǔ e émí nɔ́ wa ɔ́ bǐ wɛ nɔ́ nyɔ́; è ka kplɔ́n nǔ mɛ e ɖó nǔnywɛ́ ɔ́, é nɔ́ se.

¹⁶Xlonɔ sin xomɛ ɔ́, é nɔ́ ɖe xlɛ́ ɖo tɛn tɔn mɛ; lo ɔ́, mɛ e ayi tɔn ɖo te ɔ́ sin xomɛ ɔ́, é nɔ́ yi agbɔ̌n jí.

¹⁷Mɛ e nɔ ɖɔ xó nǔgbó ɔ́ nɔ́ zɔ́n bɔ è nɔ gbo hwɛ ganjí; mɛ e ka nɔ ɖe kúnnu agɔ ɔ́ nɔ́ zɔ́n bɔ è nɔ gbo hwɛ nyi do.

¹⁸Mɛ e nɔ ɖɔ xó dín ɔ́, xó tɔn nɔ́ gblé wǔ mɛ hwǐ ɖɔhun; mɛ e ka ɖó nǔnywɛ́ ɔ́, xó tɔn nɔ́ gbɔ azɔn.

¹⁹Xó e nyí xó nǔgbó ɔ́ nɔ ɖo te tɛgbɛ; lo ɔ́, adingbanxó ɔ́, nukúnxwixwe ɖokpó mɛ jɛ́n é nɔ́ gba.

²⁰Mɛ e nɔ ɖo nyanya mɛtɔn lin wɛ ɔ́, ahizi wɛ gɔ́ ayi tɔn mɛ; mɛ e ka nɔ kplɔ́n nǔ ɖagbe mɛ ɔ́ nɔ́ mɔ awǎjijɛ ɖ'é mɛ.

²¹Awě ɖě nɔ́ xo mɛ e nɔ wa nǔ ɖó sɛ́nxwi jí ɔ́ ǎ; lo ɔ́, nǔgbomɛ wɛ nɔ vun blá mɛdídá.

²²Mawu Mavɔmavɔ mɔ adingbannɔ ɔ́, é nɔ́ vɛ́ mɔ n'i; é ká mɔ mɛ e nɔ ɖɔ xó nǔgbó ɔ́, xomɛ nɔ hun i.

²³Gbɛtɔ́ e ɖó ayi te é nɔ́ ɖó nǔnywɛ́ tɔn hǎ ǎ; xlonɔ ka nɔ sɔ́ lɛ̌lo tɔn ɖó agban.

²⁴Mɛ e nɔ ɖó kan dó nǔ wú bó nɔ́ wa ɔ́ nɔ́ wá nɔ mɛ nu; lo ɔ́, fɔnlínnɔ ɔ́, mɛ kannu wɛ é nɔ́ wá nɔ.

²⁵Linkpɔ́n ɖo ayi mɛ nú mɛ ɔ́, kanmɛ nɔ gbɔ́jɔ́ mɛ; è ka ɖɔ xó ɖagbe nú mɛ ɔ́, wǔ nɔ yá mɛ.

²⁶Mɛ e nɔ wa nǔ sɛ́nxwi jí ɔ́ nɔ ɖe nɔzo tɔn ɖó ali jí; lo ɔ́ mɛdídá sín walɔ nɔ dɔn mɛ bú.

²⁷Fɔnlínnɔ nɔ ɖó lan agba ǎ; azɔ̌ wɛ ká nyí gbɛtɔ́.

²⁸Hwɛjijɔ li jí wɛ è nɔ mɔ gbɛ ɖe; mɛ e mlɛ́ ali énɛ́ ɔ́ nɔ́ kú ǎ.