Read fon Nǔnywɛ́xó 13 Bible Online

Nǔnywɛ́xó 13 - fon bible

Nǔnywɛ́xó 13

¹Vǐ e ɖó nǔnywɛ́ ɔ́ nɔ ɖótó te, bó nɔ́ yí kplɔ́n ɖo tɔ́ sí; è ka gbɛ́ nǔ nú vǐ e nɔ́ yí go ɔ́, é nɔ se ǎ.

²Gbɛtɔ́ ɖagbe nɔ ɖu xó e nɔ́ tɔ́n sín nu tɔn mɛ é sín le; mɛ nyanya lɛ́ɛ ɔ́, alǎnnúwiwa te jɛ́n yě ɖe.

³Mɛ e nɔ kpɔ́n nu bó nɔ́ kɛ ɔ́ nɔ́ wa éɖée nú ǎ; mɛ e ka nɔ kɛ nu nyi do ɔ́ nɔ́ wa éɖée nú.

⁴Nǔɖé jló fɔnlínnɔ ɔ́, mɛ jɛ́n é nɔ́ mɛ dó wǔ tɔn; nǔɖé ká jló mɛ e yí wǎn nú azɔ̌ ɔ́, é nɔ́ mɔ.

⁵Gbɛtɔ́ hwɛjijɔnɔ nɔ gbɛ́ wǎn nú adingbanxó; mɛdídá ká nɔ́ zun mɛ, bó nɔ́ lɛ hɛ̌n nú mɛ.

⁶Hwɛjijɔ nɔ nya xɛ ɖo mɛ e nɔ wa nǔ ɖó sɛ́nxwi jí é jí; dǎka xixo ká nɔ́ hɛn mɛdídá sín gbɛ gblé.

⁷Mɛ ɖé lɛ́ɛ nɔ́ bló dɔkunnɔ, nǔɖé ká ɖo yě sí ǎ; mɛɖé lɛ́ɛ ká nɔ bló wamamɔnɔ, nǔ ká ɖó yě sí kpɔ́.

⁸Dɔkunnɔ ɔ́, dɔkun tɔn wɛ é nɔ́ sɔ́ dó xɔ gbɛ nú éɖée; wamamɔnɔ ɔ́, mɛɖé ká nɔ́ gblɔ́n adǎn n'i ǎ.

⁹Hwɛjijɔnɔ ɔ́, zogbɛ́n e ɖo te bo ɖo wě za wɛ é ɖɔhun wɛ é ɖe; lo ɔ́, mɛdídá ɔ́, éyɛ́ cí zogbɛ́n e ɖo cící wɛ ɔ́ ɖɔhun.

¹⁰Goyíyí ɔ́, tagba wɛ é nɔ́ dɔn wá; lo ɔ́, mɛ e è kplɔ́n nǔ i ɔ́ é nɔ́ se ɔ́, mɛ énɛ́ ɔ́ ɖó nǔnywɛ́.

¹¹Mɛ e nɔ jɛ dɔkun ma xo kan ɔ́, dɔkun tɔn ɔ́ gba wɛ é nɔ́ gbadó; mɛ e ka nɔ jɛ dɔkun tɔn kpɛɖé kpɛɖé ɔ́, dɔkun tɔn nɔ ɖo jijɛ jí wɛ.

¹²È ɖo nǔɖé ɖó nukún wɛ bó má ɖo mimɔ wɛ ǎ ɔ́, azɔn wɛ é nɔ́ dó mɛ; è ka ɖo nǔɖé ba wɛ bó mɔ ɔ́, é nɔ́ cí atín e nɔ́ ná gbɛ ɔ́ ɖɔhun nú mɛ.

¹³Mɛ e ma nɔ se mɛ xó ǎ ɔ́, é ji nǔɖé ɔ́, é ná sɔ́ kpan; mɛ e è ka zɔ́n nǔ i ɔ́ é nɔ́ wa ɔ́, é ná ɖu le tɔn.

¹⁴Nǔ e nǔnywɛ́tɔ́ nɔ́ kplɔ́n mɛ ɔ́, gbɛjɔtɛn ɖé wɛ é nyí; é nɔ́ zɔ́n bɔ è nɔ jɛ kú sín mɔ mɛ ǎ.

¹⁵Mɛ e nɔ lin tamɛ ganjí ɔ́, nǔ tɔn nɔ́ nyɔ́ gbɛtɔ́ nukún mɛ; mɛsaɖutɔ́ sín ali ka nɔ kplá mɛ yi fí ɖé ǎ.

¹⁶Gbɛtɔ́ ayiɖotenánɔ nɔ́ lin tamɛ cóbó nɔ wa nǔ; lo ɔ́, xlonɔ ɔ́, gǔgú tɔn wɛ é nɔ́ ɖó agban.

¹⁷Mɛ e ma nɔ dó wɛn ganjí ǎ ɔ́, nǔ wɛ é nɔ́ hɛn gblé; mɛ e ka nɔ dó wɛn ganjí ɔ́ nɔ́ bló nǔ ɖó.

¹⁸Mɛ e nɔ gbɛ́ ɖɔ mɛɖé kún ná kplɔ́n nǔ émí ó ɔ́, ya wɛ é nɔ́ ji, bɔ mɛ bǐ nɔ́ hu tɛ́ n'i. Mɛ e è ka gbɛ́ nǔ ná ɔ́, é nɔ́ se ɔ́, è nɔ sɔ́ ɛ su.

¹⁹È ɖo nǔɖé ba ná wa wɛ, bó kpé wú ɔ́, é nɔ́ víví nú mɛ; énɛ́ wú wɛ mɛdídá lɛ́ɛ ma ɖo nǔ nyanya wa wɛ ɔ́, é nɔ́ víví nú yě ǎ.

²⁰A dǒ nǔnywɛ́tɔ́ há ɔ́, a nǎ húzú nǔnywɛ́tɔ́; a ka dó xlonɔ há ɔ́, a nǎ wa nǔ dó hwiɖée wú.

²¹Mɛ e nɔ wa nǔ nyanya ɔ́, nǔ nyanya wɛ nɔ jɛ gǒ mɛ n'i; lo ɔ́, hwɛjijɔnɔ ɔ́, ɖagbe wɛ ka nyí ajɔ tɔn.

²²Đagbewatɔ́ nɔ́ ɖu nǔ kpo nú vǐvú tɔn lɛ́ɛ; hwɛhutɔ́ sín dɔkun ka ná wá jɛ hwɛjijɔnɔ sín alɔ mɛ.

²³Wamamɔnɔ kpé nukún dó gle tɔn wú ɔ́, ji nɔ jɛ n'i; lo ɔ́, nǔ má wa ɖó sɛ́nxwi jí nɔ́ yí bǐ sín así tɔn.

²⁴Mɛ e ma nɔ xo vǐ ǎ ɔ́ yí wǎn nú vǐ tɔn ǎ; mɛ e ka nɔ xo vǐ ɔ́ yí wǎn nú vǐ.

²⁵Hwɛjijɔnɔ nɔ ɖu nǔ, bɔ é nɔ jɛ mɛ n'i; lo ɔ́, mɛdídá ɔ́, adɔ nɔ dó ya n'i.