Read fon Nǔnywɛ́xó 14 Bible Online

Nǔnywɛ́xó 14 - fon bible

Nǔnywɛ́xó 14

¹Nyɔ̌nu e ɖó nǔnywɛ́ ɔ́ nɔ́ hɛn xwé; nyɔ̌nu xlonɔ ka nɔ gba xwé.

²Gbɛtɔ́ e nɔ wa nǔ ɖó sɛ́nxwi jí é nɔ́ ɖó sísí nú Mawu Mavɔmavɔ; mɛ e ka nɔ wa nǔ agɔ agɔ é nɔ́ hu tɛ́ n'i.

³Xlonɔ ɔ́, xó e é ɖésú ɖɔ ɔ́ wɛ è nɔ xwedó dó dɔn go e yí wɛ é ɖe ɔ́ sín tó n'i; amɔ̌, nǔnywɛ́tɔ́ ɔ́, xó e é ɖésúnɔ nɔ́ ɖɔ ɔ́ wɛ nɔ́ nya xɛ ɖo yě jí.

⁴Fí e nyibú má ɖe ǎ ɔ́, nǔ e mɛ yě nɔ́ ɖu nǔ ɖe ɔ́ nɔ́ nɔ vɔ̌; amɔ̌, cóbónú è nǎ ya jinukún sukpɔ́ ɔ́, è ɖǒ ná ɖó nyibú e è nɔ dó lɛ gle ná é.

⁵Kúnnuɖetɔ́ e nɔ́ ɖɔ nǔgbó ɔ́ nɔ́ bú mɛ ǎ; lo ɔ́, kúnnu-agɔɖetɔ́ nɔ́ ɖo adingban te.

⁶Mɛ e nɔ yí go ɔ́ ná bó ba nǔnywɛ́ káká ɔ́, é ná mɔ ǎ; mɛ e ka nɔ lin tamɛ kpɔ́n ɔ́ nɔ́ yá wǔ tunwun nǔ.

⁷Ma dó xlonɔ há ó; a ɖo nǔnywɛ́ ɖé ná mɔ yí wɛ ɖo xó tɔn mɛ ǎ.

⁸Gbɛtɔ́ e ɖó ayi te ɔ́ nɔ́ kpɔ́n afɔ bo nɔ ɖe, ɖó nǔnywɛ́tɔ́ wɛ; mɛ e ma ɖó nǔnywɛ́ ǎ é ká nɔ́ bú ali ɖó xlo tɔn wú.

⁹Xlonɔ hu hwɛ ɔ́, é nɔ́ mɔ ɖɔ é kún byɔ́ ɖɔ émí ní sú hwɛ xɔ́ ó; mɛ e nɔ wa nǔ ɖó sɛ́nxwi jí lɛ́ɛ ká nɔ́ dó hwɛ gbɔ xá yěɖée.

¹⁰Mɛ e ɖo wǔvɛ́ mɔ wɛ ɔ́, é ɖokpó géé wɛ tunwun bǎ e mɛ é ɖo wǔvɛ́ mɔ wɛ yi jɛ é; mɔ̌ ɖokpó ɔ́, mɛ e ɖo awǎ jɛ wɛ ɔ́, é ɖokpó géé wɛ tunwun bǎ e mɛ é ɖo awǎ jɛ wɛ yi jɛ é.

¹¹Mɛdídá lɛ́ɛ sín xwé ná gba; hwɛjijɔnɔ lɛ́ɛ sín xwé ká ná ɖo ada gbló wɛ.

¹² Gbɛtɔ́ ɖé lɛ́ɛ nɔ́ mɔ ɖɔ ali ɖagbe jí wɛ émí ɖe; có, ali énɛ́ ɔ́ sixú wá kplá ɛ yi kú.

¹³È nɔ ɖo wǔvɛ́ mɔ wɛ ɖo ayi mɛ cóbó nɔ́ ko nǔ; è nɔ ɖo awǎjijɛ mɛ có awǎjijɛ ɔ́ sixú wá húzú aluwɛ.

¹⁴Mɛdídá ɔ́, nyanya e é wa ɔ́ sín le wɛ é nɔ́ ɖu; gbɛtɔ́ ɖagbe ɔ́, ɖagbe e é wa ɔ́ sín ajɔ wɛ é nɔ mɔ.

¹⁵Gbɛtɔ́ e ayivɔ vún ɔ́ nɔ́ ɖi nǔ nú nǔ e è ɖɔ n'i lɛ́ɛ bǐ; mɛ e ayi tɔn ka ɖo te ɔ́ nɔ́ lin tamɛ cóbó nɔ wa nǔ.

¹⁶Gbɛtɔ́ e ɖó nǔnywɛ́ ɔ́ nɔ́ ɖi xɛsi nú nǔ nyanya bó nɔ́ kpa kɛ́n ná; xlonɔ ka nɔ ɖo wǔyámɛsin dun wɛ bó nɔ́ jɛ nǔ nyanya mɛ.

¹⁷Mɛ e nɔ yá wǔ sin xomɛ ɔ́ nɔ wa nǔ nyi do; mɛ e ɖó ayi nyanya xomɛ ɔ́, wǎn wɛ è nɔ gbɛ́ n'i.

¹⁸Gbɛtɔ́ e ayivɔ vún lɛ́ɛ ɔ́, xlonɔ wɛ yě nɔ́ wá húzú; lo ɔ́, gbɛtɔ́ e ayi yětɔn ɖo te lɛ́ɛ ɔ́, nǔtunwuntunwun wɛ nɔ nyí jɛ̌gbákún nú yě.

¹⁹Mɛ nyanya lɛ́ɛ ná wá yi do nú mɛ ɖagbe lɛ́ɛ; bɔ mɛdídá lɛ́ɛ ná wá nɔ te ɖo hwɛjijɔnɔ lɛ́ɛ sín hɔn ta.

²⁰Mɛ bǐ nɔ gbɛ́ wǎn nú wamamɔnɔ káká jɛ mɛ tɔn lɛ́ɛ jí; dɔkunnɔ sín xɔ́ntɔn lɛ́ɛ ká nɔ́ sukpɔ́.

²¹Wǎn gbɛ́ nú nɔzo ɔ́, hwɛ wɛ; mɛ e ka nɔ kú nǔbláwǔ nú wamamɔnɔ ɔ́, nǔ nyɔ́ n'i.

²²Gbɛtɔ́ e ɖó ayi nyanya ɔ́, ali wɛ é nɔ́ bú; mɛ e ka ɖó linlin ɖagbe ɔ́, è nɔ nyɔ́ xomɛ dó wǔ tɔn, è nɔ nɔ gbejí n'i.

²³Azɔ̌ bǐ wɛ ɖó le; amɔ̌, xó zɔ́ ɔ́, ya wɛ é nɔ́ dɔn wá.

²⁴Dɔkun wɛ nyí mɛ e ɖó nǔnywɛ́ lɛ́ɛ sín ajɔ; xlonɔ lɛ́ɛ nɔ́ tɔ́n sín xlo yětɔn mɛ gbeɖé ǎ.

²⁵Kúnnuɖetɔ́ e nɔ ɖɔ nǔgbó ɔ́ nɔ xɔ gbɛ nú mɛ gěgé; lo ɔ́, kúnnu-agɔɖetɔ́ nɔ́ bú mɛ.

²⁶Mɛ e nɔ ɖó sísí nú Mawu Mavɔmavɔ ɔ́, ayi tɔn nɔ jɛ ayǐ, ɖó Mawu wɛ nyí bibɛtɛn nú vǐ tɔn lɛ́ɛ.

²⁷Sísí ɖó nú Mawu Mavɔmavɔ ɔ́, gbɛjɔtɛn wɛ é nyí, é nɔ́ zɔ́n bɔ è nɔ jɛ kú sín mɔ mɛ ǎ.

²⁸Gbɛtɔ́ sukpɔ́ ɖo to ɖé mɛ ɔ́, susu wɛ é nyí nú axɔ́sú ɔ́; axɔ́sú ɖé sín to ka jɛ vɔ̌ ɔ́, acɛkpikpa tɔn nɔ jɛ ayǐ.

²⁹Mɛ e ma nɔ yá wǔ sin xomɛ ǎ ɔ́ mɔ nukúnnú jɛ nǔ mɛ titewungbe; lo ɔ́, mɛ e nɔ yá wǔ sin xomɛ ɔ́ nɔ ɖe taɖu tɔn xlɛ́.

³⁰Ayi jɛ ayǐ nú mɛ ɔ́, agbaza mɛtɔn nɔ́ nɔ ganjí; wǔhwinhwan ɔ́, xúɖuxúɖu ká wɛ.

³¹Mɛ e nɔ gba acɛ lelenɔ wú ɔ́, agɔ tawun wɛ é nyí bɔ é jɛ dó mɛ e bló e é. Mɛ e ka nɔ kú nǔbláwǔ nú wamamɔnɔ ɔ́ sɔ́ mɛ e bló e ɔ́ su.

³²Kpo e mɛdídá nyi é jɛ́n nɔ́ wa jɛ ta tɔn. Hwɛjijɔnɔ na bo ka ɖo kú nukɔn ɔ́, é nɔ́ ɖeji.

³³Gbɛtɔ́ e nɔ́ lin tamɛ kpɔ́n ganjí ɔ́, nǔnywɛ́ wɛ ɖó zan nyi xo tɔn mɛ; è ka nɔ mɔ nǔnywɛ́ ɖo xlonɔ lɛ́ɛ gɔ́n ǎ.

³⁴Hwɛjijɔ nɔ sɔ́ to dó jǐ; amɔ̌, nǔ agɔ wiwa ɔ́, winnyá wɛ é nyí nú to.

³⁵Axɔ́sú nɔ́ nyɔ́ xomɛ dó azaglɔ́gán e tunwun azɔ̌ ganjí ɔ́ wú; é ká nɔ́ sin xomɛ dó azaglɔ́gán e nɔ dó winnyá ɛ é.