Read fon Nǔnywɛ́xó 16 Bible Online

Nǔnywɛ́xó 16 - fon bible

Nǔnywɛ́xó 16

¹Nǔ gěgé lin wɛ gbɛtɔ́ ɖe bó ná wa, amɔ̌, éé Mawu Mavɔmavɔ ɖɔ ɔ́ wɛ nɔ nyí wiwa.

²Mɛ ɖokpó ɖokpó nɔ mɔ ɖɔ walɔ émí tɔn nyí walɔ mímɛ́; amɔ̌, Mawu Mavɔmavɔ wɛ tunwun nǔ e ɖo mɛ ɖokpó ɖokpó sín ayi gɔngɔn mɛ é.

³Sɔ́ azɔ̌ towe dó alɔ mɛ nú Mawu Mavɔmavɔ, énɛ́ ɔ́, nǔ e lin ná wa wɛ a ɖe lɛ́ɛ ná jɛ nu.

⁴Mawu Mavɔmavɔ tunwun nǔ e wú é bló nǔ ɖokpó ɖokpó é; azǎn e gbe é nǎ dɔn tó nú mɛ é wú wɛ é tlɛ bló mɛdídá.

⁵Mawu Mavɔmavɔ gbɛ́ wǎn nú gbɛtɔ́ e nɔ yí go lɛ́ɛ, é ná gɔn tó dɔn nú yě ǎ.

⁶Mɛ e nyɔ́ xomɛ bó ɖo gbejí ɔ́, è nɔ sɔ́ hwɛ kɛ ɛ; mɛ e nɔ ɖó sísí nú Mawu Mavɔmavɔ ɔ́ nɔ́ hɔn nú hwɛhuhu.

⁷Nú walɔ mɛɖé tɔn nyɔ́ Mawu Mavɔmavɔ nukún mɛ ɔ́, Mawu nɔ bló bɔ kɛntɔ́ tɔn lɛ́ɛ ɖésú nɔ́ dó hwɛ gbɔ xá ɛ.

⁸È wǎ nǔ ɖó sɛ́nxwi jí bó mɔ akwɛ́ kpɛɖé ɖ'é mɛ ɔ́, é nyɔ́ hú è xo ahizi bó jɛ dɔkun.

⁹Gbɛtɔ́ nɔ bló tito é ɖésúnɔ tɔn lɛ́ɛ; amɔ̌, fí e é ná yi ɔ́, Mawu Mavɔmavɔ wɛ nɔ ɖɔ.

¹⁰Axɔ́sú ɖo xó ɖɔ wɛ ɔ́, é nɔ́ cí Mawu wɛ ɖo xó ɖɔ wɛ ɖɔhun; é ɖo hwɛ ɖɔ wɛ ɔ́, é nɔ́ ɖó adingban ǎ.

¹¹Mawu Mavɔmavɔ jló ɖɔ nǔdagan ní nyí nǔdagan kpíkpé, bónú nǔjlɛ́ká ní nyí nǔjlɛ́ká kpíkpé; é wɛ bló nǔ énɛ́ lɛ́ɛ bǐ.

¹²Axɔ́sú nɔ́ gbɛ́ wǎn nú nǔ e má sɔgbe ǎ é wiwa, ɖó nǔ wa ɖó sɛ́nxwi jí jí wɛ acɛkpikpa tɔn jínjɔ́n.

¹³Mɛ e nɔ ɖɔ xomɛ nú axɔ́sú ɔ́ sín nǔ nɔ́ nyɔ́ nukún tɔn mɛ; é nɔ́ yí wǎn nú mɛ e nɔ ɖɔ nǔgbó é.

¹⁴Axɔ́sú sin xomɛ ɔ́, é hɛn ɔ́, é ná ná gbe bɔ è nǎ hu mɛ; lo ɔ́, gbɛtɔ́ e ɖó nǔnywɛ́ ɔ́ hɛn ɔ́, é ná xo hwihwɛ́ ɛ.

¹⁵Axɔ́sú ko nǔ dó mɛ ɔ́, gbɛ wɛ; xomɛnyínyɔ́ tɔn cí jǐ e nɔ ja bó nɔ hɛn ɖagbe wá é ɖɔhun.

¹⁶È ɖǒ nǔnywɛ́ ɔ́, é nyɔ́ hú è ɖǒ siká; è ɖǒ nukúnnú-mɔjɛnǔmɛ ɔ́, é nyɔ́ hú è ɖǒ kpatágan.

¹⁷Mɛ e nɔ wa nǔ ɖó sɛ́nxwi jí lɛ́ɛ nɔ́ hɔn nú nǔ nyanya wiwa. Mɛ e nɔ lin tamɛ cóbó nɔ́ wa nǔ ɔ́ nɔ́ nya xɛ ɖo éɖée jí.

¹⁸Mɛ ɖé ja cu kpé gbé ɔ́, goyíyí wɛ é nɔ́ bɛ́. Mɛ e nɔ mɔ éɖée ɔ́ nɔ́ sɔ́ éɖée nyi gbě.

¹⁹È wǎ nǔ ɖó jlɛ̌ jí, bó dó hǎ xá wamamɔnɔ lɛ́ɛ ɔ́, é nyɔ́ hú è mǎ dɔkun e è bɛ̌ sín ahwangbénu lɛ́ɛ xá gbɛtɔ́ e nɔ́ yí go lɛ́ɛ.

²⁰Mɛ e nɔ lin tamɛ kpɔ́n ganjí cóbó nɔ́ jɛ nǔɖé wú ɔ́ nɔ́ mɔ nu tɔn. Nǔ nɔ́ nyɔ́ nú mɛ e nɔ ɖeji dó Mawu Mavɔmavɔ wú ɔ́.

²¹Mɛ e ɖó nǔnywɛ́ ɔ́, è nɔ ylɔ́ ɛ ɖɔ nukúnnú-mɔjɛnǔmɛtɔ́. Ényí è ɖɔ xó nú mɛ kpó wǎn yíyí kpó ɔ́, mɛ ɔ́ nɔ́ yí xó mɛtɔn.

²²Ayi ɖó te dó wa nǔ ɔ́ gbɛjɔtɛn wɛ; xlonɔ lɛ́ɛ ɔ́, xlo yětɔn wɛ nɔ́ wa nǔ xá yě.

²³Mɛ e ɖó nǔnywɛ́ ɔ́ ja xó ɖɔ gbé ɔ́, é nɔ́ tó lin tamɛ kpɔ́n hwɛ̌; énɛ́ wú wɛ é ɖɔ xó ɔ́, è nɔ ɖi nǔ nú xó tɔn.

²⁴È ɖɔ xó nú mɛ kpó wǎn yíyí kpó ɔ́, é nɔ́ víví nú mɛ ɔ́ wǐin ɖɔhun; é nɔ́ cí lě e wǐin nɔ́ víví bó nɔ́ wa ɖagbe nú agbaza ɔ́ ɖɔhun.

²⁵ Gbɛtɔ́ ɖé lɛ́ɛ nɔ́ mɔ ɖɔ ali ɖagbe jí wɛ émí ɖe; có, ali énɛ́ ɔ́ sixú wá kplá yě yi kú.

²⁶Azɔ̌watɔ́ ɔ́, adɔ wɛ nɔ zɔ́n azɔ̌ wa ɛ; nǔ ná ɖu wú wɛ é nɔ́ yi azɔ̌ wa gbé.

²⁷Nǔvɔ́nɔ nɔ́ ɖe nǔ nyanya wé; xó e nɔ́ tɔ́n sín nu tɔn mɛ lɛ́ɛ cí myɔ nǔhɛngblétɔ́ ɖé ɖɔhun.

²⁸Gbɛtɔ́ e nyí mɛdídá ɔ́ nɔ́ dɔn hun kpé; mɛnúɖɔtɔ́ ka nɔ klán hǎ.

²⁹Gbɛtɔ́ dǎnúwatɔ́ nɔ flú nɔzo tɔn; é nɔ́ dɔn ɛ dó nǔ nyanya mɛ.

³⁰Mɛ e ɖo nǔ nyanya lin ná wá wɛ, bó ɖo nukún myɔ́ wɛ, bó ɖo aɖǔma tɛ wɛ é kó dó nǔ e lin wɛ é ɖe é sin.

³¹Hwa e nɔ wú ɖo ta ɔ́, jɛ̌gbákún ɖagbe ɖagbe wɛ; mɛ e nɔ wa nǔ jlɔ́jlɔ́ lɛ́ɛ ta wɛ è nɔ mɔ ɖe.

³²Mɛ e ma nɔ yá wǔ sin xomɛ ǎ ɔ́, é nyɔ́ hú mɛ e ɖó ɖuɖéjí é. È ɖu ɖo mɛ ɖésúnɔ jí ɔ́, é nyɔ́ hú è ɖu ɖo toxo ɖokpó jí.

³³È nɔ kan nǔ, bó ná tunwun nǔ e ná wá jɛ lɛ́ɛ; lo ɔ́, Mawu Mavɔmavɔ kɛ́ɖɛ́ wɛ tunwun lě e nǔ ná cí gbɔn é.