Read fon Nǔnywɛ́xó 19 Bible Online

Nǔnywɛ́xó 19 - fon bible

Nǔnywɛ́xó 19

¹È nyǐ wamamɔnɔ bónú ayi mɛtɔn ka ɖo wɛn ɔ́, é nyɔ́ hú è nyǐ adingbannɔ bó nyí xlonɔ.

²Nǔ ba ná wa hawun ma yi agbɔ̌n jí hwɛ̌ ɔ́, è nɔ mɔ nu tɔn ǎ; è ɖo hwlɛ́ndó jí dín ɔ́, nǔ wɛ è nɔ wa nyi do.

³Xlojijɔ gbɛtɔ́ tɔn nɔ́ kplá ɛ yi dó kɔ́blúmánya mɛ, bɔ é nɔ́ jɛ wunvo ba Mawu Mavɔmavɔ jí.

⁴Nǔ ɖo mɛ sí ɔ́, xɔ́ntɔn nɔ́ sukpɔ́; lo ɔ́, xɔ́ntɔn ɖokpó e wamamɔnɔ ɖó ɔ́ kpó é kpó nɔ́ lɛ́ gblé.

⁵Mɛ e nɔ ɖe kúnnu agɔ ɔ́, è nǎ wá dɔn tó n'i gbe ɖokpó; adingbannɔ ɔ́, è nǎ gɔn tó dɔn n'i ǎ.

⁶Mɛ gěgé nɔ́ klɔ́ gbɛtɔ́ nukúnɖéjí lɛ́ɛ; mɛ bǐ nɔ dó xɔ́ntɔn mɛ e nɔ ná nǔ mɛ é.

⁷Wamamɔnɔ ɔ́, nɔví tɔn lɛ́ɛ ɖésú nɔ gbɛ́ wǎn n'i; xɔ́ntɔn tɔn lɛ́ɛ tɔn sɔ́ nyí ɖiɖɔ ǎ; yě bǐ nɔ́ nɔ zɔ n'i; é nɔ́ mɔ yě mɛ ɖěbǔ bó ná ɖɔ xó xá ǎ.

⁸Nǔ kplɔ́n dó nǔ jí ɔ́, wǎn yí nú mɛ ɖésúnɔ wɛ; mɛ e nɔ ba ná mɔ nukúnnú jɛ nǔ wú ɔ́, nǔ nɔ nyɔ́ n'i.

⁹Mɛ e nɔ ɖe kúnnu agɔ ɔ́, è nǎ dɔn tó n'i; mɛ e nɔ ɖó adingban ɔ́ ná sɔ́ éɖée nyi gbě.

¹⁰É jɛ xá ɖɔ xlonɔ ní ɖu gbɛ ǎ; mɔ̌ ɖokpó ɔ́, kannumɔ ɖó ná kpa acɛ nú gǎn tɔn gbeɖé ǎ.

¹¹Gbɛtɔ́ e bí é nɔ́ yá wǔ sin xomɛ ǎ; wi e ɖo ta tɔn ɔ́ wú wɛ é nɔ́ kpɔ́n dó dó wɔn agɔ e è jɛ dó e lɛ́ɛ.

¹²Axɔ́sú e ɖo xomɛsin jí é dó xɛsi kinnikínní ɖo adǎn jí ɖɔhun; xomɛnyínyɔ́ tɔn ka nɔ wa ɖagbe, ahǔn ja dó gběhan jí ɖɔhun.

¹³Vǐ xlonɔ ɔ́, afɔkú wɛ é nyí nú tɔ́ tɔn; nyɔ̌nu jlɛɖɔtɔ́ cí gɔ̌ta e ma nɔ gɔn sin kun ǎ é ɖɔhun.

¹⁴Tɔ́ mɛtɔn sín dɔkun kpó xwé tɔn kpó ɔ́, è hɛn ɔ́, è nǎ ɖu gǔ tɔn; amɔ̌, nyɔ̌nu e ayi tɔn nɔ ɖo te ɔ́, Mawu Mavɔmavɔ ɖokpónɔ wɛ nɔ ná mɛ.

¹⁵Fɔnlín ɔ́, amlɔ wɛ é nɔ́ zɔ́n mɛ hwebǐnu; mɛ e ma nɔ wa nǔɖé ǎ ɔ́, xovɛ́ wɛ é nɔ́ nɔ.

¹⁶Mɛ e nɔ nyi sɛ́n ɔ́ nɔ́ nya xɛ ɖo gbɛ éɖée tɔn jí; mɛ e ma nɔ lin tamɛ cóbó nɔ́ wa nǔ ǎ ɔ́ ná kú.

¹⁷Mɛ e nɔ ná nǔ wamamɔnɔ ɔ́, nǔ wɛ é nya nú Mawu Mavɔmavɔ; Mawu ná ná ajɔ tɔn ɛ.

¹⁸Nɔ dɔn tó nú vǐ towe din e a hɛn ɔ́, a nǎ kplɔ́n ɛ é; amɔ̌, ma ɖo xomɛsin jí bó xo ɖó nǎ hu do mɛ ó.

¹⁹Mɛ e sin xomɛ ɖaxó ɔ́, è ɖǒ ná kán akwɛ́ ɖé n'i bɔ é ná sú; nǔ má nyí mɔ̌ ǎ hǔn, kan wɛ è dǒ kan jí n'i.

²⁰Nɔ ɖótó kplɔ́n; è kplɔ́n nǔ we hǔn nɔ se; énɛ́ ɔ́, a nǎ húzú nǔnywɛ́tɔ́.

²¹Gbɛtɔ́ nɔ́ lin nǔ gěgé bó ná wa, amɔ̌, jlǒ Mawu Mavɔmavɔ tɔn wɛ nɔ nyí wiwa.

²²Xomɛnyínyɔ́ wɛ nyí nǔ e ba wɛ è ɖe ɖo gbɛtɔ́ sí é; è nyǐ wamamɔnɔ ɔ́, é nyɔ́ hú è nyí adingbannɔ.

²³Sísí ɖó nú Mawu Mavɔmavɔ mɛ wɛ è nɔ mɔ gbɛ ɖe; nǔɖé nɔ́ hwedó mɛ ǎ; zǎn mɛ ɔ́, è nɔ dɔ́ amlɔ ganjí, gbɛwé ɖé nɔ́ xo mɛ ǎ.

²⁴Fɔnlínnɔ zé alɔ dó nǔɖuká mɛ ɔ́, nu sɔ́ yi tɔn nɔ́ nyí azɔ̌ n'i.

²⁵È xo goyítɔ́ ɖo xlonɔ nukún mɛ ɔ́, xlonɔ sín ayi ná mɔ nǔ; è gbɛ̌ nǔ nú gbɛtɔ́ e ɖó nǔnywɛ́ ɔ́, é nɔ mɔ nǔ jɛ nǔ e è ba ɖɔ é ní tunwun ɔ́ mɛ.

²⁶Vǐ e nɔ́ sí hun te dó tɔ́ tɔn jí ɔ́, vǐ e nɔ́ nya nɔ tɔn ɔ́, vǐ winnyá dó mɛ tɔ́ wɛ, vǐ hɛ̌ndómɛtɔ́ wɛ.

²⁷Vǐ ce, nú a ma sɔ́ nɔ́ ɖótó te bó nɔ́ yí kplɔ́n e ná we wɛ è ɖe lɛ́ɛ ǎ ɔ́, nǔtunwuntunwun vɛ́ we.

²⁸Kúnnuɖetɔ́ nǔvɔ́nɔ nɔ́ ké ya nú sɛ́n ǎ; mɛdídá lɛ́ɛ ɔ́, alǎnnú ɖiɖɔ wɛ nɔ́ víví nú yě.

²⁹Goyítɔ́ lɛ́ɛ ɔ́, hwɛ e è nǎ ɖó nú yě é kó ɖo te; xlonɔ lɛ́ɛ ɔ́, nɛgbé yětɔn ɖo te nú bǎ.