Read fon Nǔnywɛ́xó 21 Bible Online

Nǔnywɛ́xó 21 - fon bible

Nǔnywɛ́xó 21

¹Ayixa e ɖo axɔ́sú xomɛ ɔ́, tɔsisa wɛ bó ɖo Mawu Mavɔmavɔ sín alɔ mɛ; fí e jló e wɛ é nɔ́ ɖe ali n'i gbɔn.

²Mɛ ɖokpó ɖokpó nɔ mɔ ɖɔ walɔ émí tɔn sɔgbe; amɔ̌, Mawu Mavɔmavɔ wɛ tunwun nǔ e ɖo mɛ ɖokpó ɖokpó sín ayi gɔngɔn mɛ é.

³Hwɛjijɔ xwedó kpó nǔ wa ɖó sɛ́nxwi jí kpó xɔ akwɛ́ ɖo Mawu Mavɔmavɔ nukún mɛ hú vɔ̌sísá.

⁴Nyi wɛ sɔ lě kpó goyíyí kpó wɛ nɔ́ ɖe mɛdídá lɛ́ɛ sín hwɛ xlɛ́.

⁵Mɛ e nɔ kú hǔn bó nɔ́ to nǔ e wa gbé é ja ɔ́, nɔ́ mɔ nǔ gěgé ɖ'é mɛ; mɛ e ka nɔ zɔn nǔ jí bó nɔ́ bló ɔ́, nɔ́ byɔ́ ya mɛ.

⁶Mɛ e nɔ ɖó adingban dó jɛ dɔkun lɛ́ɛ ɔ́, kú hwlɛ́n dó wɛ yě ɖe; dɔkun e yě nɔ́ jɛ lɛ́ɛ nɔ́ nyí nǔ tí ǎ; bǐ wɛ nɔ́ gbadó azizɔ ɖɔhun.

⁷Dǎka e mɛdídá lɛ́ɛ nɔ́ xo ɔ́ wɛ nɔ kplá yě yi kú, ɖó yě nɔ́ gbɛ́ ɖɔ émí kún ná xwedó hwɛjijɔ ó.

⁸Mɛ e ɖó ayi hízíhízí ɔ́, ali gɔ́ndɔ́n gɔ́ndɔ́n wɛ é nɔ́ mlɛ́; mɛ e ayi tɔn mɛ ɖo wɛn ɔ́ ká nɔ́ wa nǔ ɖó sɛ́nxwi jí.

⁹È yi cí xɔ ta ɔ́, é nyɔ́ hú è yi nɔ xwé ɖokpó ɔ́ gbe xá nyɔ̌nu jlɛɖɔtɔ́.

¹⁰Mɛdídá ɔ́, nǔ nyanya wiwa kɛ́ɖɛ́ wɛ nɔ myá nukún n'i; xɔ́ntɔn tɔn ɖésú sín nǔ tlɛ nɔ blá wǔ n'i ǎ.

¹¹È xo goyítɔ́ ɖo xlonɔ nukún mɛ ɔ́, xlonɔ sín ayi ná mɔ nǔ; è gbɛ́ nǔ nú gbɛtɔ́ e ɖó nǔnywɛ́ ɔ́, é ná mɔ nǔ jɛ nǔ e è ba ɖɔ é ní tunwun ɔ́ mɛ.

¹²Hwɛjijɔnɔ[1] ɖo nǔ e ɖo jijɛ wɛ ɖo mɛdídá lɛ́ɛ sín xwé gbe ɔ́ bǐ kpɔ́n wɛ; é kpíkpé yě dó nǔ nyanya mɛ.

¹³Mɛ e lelenɔ ɖo xó sú wɛ ɔ́, é nɔ́ dó tókúse mɛ ɔ́, é lɔmɔ̌ wá ɖo xó sú wɛ ɔ́, mɛɖé ná ɖótó e ǎ.

¹⁴Mɛ e ɖo xomɛsin jí ɔ́, è yi ná ɛ nǔ ɖo nǔglɔ́ ɔ́, xo tɔn mɛ nɔ fá; mɛ e ɖo adǎn jí ɔ́, è zɔn kuuu bó yi mɔ ɛ ɔ́, adǎn tɔn nɔ́ cí.

¹⁵Nǔ wa ɖó sɛ́nxwi jí ɔ́, awǎjijɛ nú wɛ é nyí nú hwɛjijɔnɔ; mɛ e nɔ wa nǔ nyanya ɔ́ ká nɔ́ ɖi xɛsi ná.

¹⁶Mɛ e nɔ jó nǔnywɛ́ sín ali dó ɔ́, zaanɖé din ɔ́, é kpó mɛkúkú lɛ́ɛ kpó ná dó gbɛ̌.

¹⁷Mɛ e yí wǎn nú gbɛ ɖuɖu ɔ́, nǔɖé nɔ́ nɔ así tɔn ǎ; mɛ e yí wǎn nú agɔ̌ ɔ́ nɔ́ jɛ dɔkun ǎ.

¹⁸Nǔ e mɛdídá ba ɖɔ é ní jɛ dó hwɛjijɔnɔ jí ɔ́, éyɛ́ jí wɛ é ná jɛ dó; nǔ e mɛsaɖutɔ́ ba ɖɔ é ní jɛ dó nǔjlɔ́jlɔ́watɔ́ jí ɔ́, é ɖésú jí wɛ é ná jɛ dó.

¹⁹È gbɔ bo yi nɔ gbětótló mɛ ɔ́, é nyɔ́ hú è nɔ kpɔ́ xá nyɔ̌nu jlɛɖɔtɔ́ e nɔ dó akpɔ xomɛ nú mɛ é.

²⁰Nǔ xɔ akwɛ́ kpó dɔkun kpó ɖo nǔnywɛ́tɔ́ xwé; xlonɔ ká nɔ́ hɛn étɔn lɛ́ɛ bǐ fun.

²¹Mɛ e nɔ ɖo hwɛjijɔ kpó xomɛnyínyɔ́ kpó gbé mɛ ɔ́ ná dɔ́ ji; è nǎ nɔ wa hwɛjijɔnɔnú n'i; è nǎ nɔ sɔ́ ɛ su.

²²Mɛ e ɖó nǔnywɛ́ ɔ́ nɔ́ tɔ́n ahwan toxo e ɖo sɔ́ja syɛ́nsyɛ́n lɛ́ɛ lɔ mɛ é, bó nɔ́ gba ahohó e wú yě ɖeji dó é.

²³Mɛ e nɔ hɛn nu ɔ́, nɔ́ ba xó dó kɔ ǎ.

²⁴Mɛ e nɔ mɔ ɖɔ émí wɛ sɔ lě, bó nɔ́ ɖo go yí wɛ ɔ́, nǔ bǐ wɛ é nɔ́ hu tɛ́ ná; é nɔ́ wa nǔ bǐ kpó goyíyí kpó; goyíyí tɔn zɛ xwé wú.

²⁵Fɔnlínnɔ ɔ́, nǔjlómɛ tɔn lɛ́ɛ wɛ nɔ hu i; ɖó é nɔ́ gbɛ́ ɖɔ émí kún ná sɔ́ gběyɛ ó.

²⁶Ayǐ hɔ́n tɛgbɛ ɔ́, mɛ ɖěvo sín nǔ nɔ́ ɖo jlǒjló e wɛ; mɛ e ka nɔ bló nǔ jlɔ́jlɔ́ ɔ́ nɔ́ hun alɔ bó nɔ́ ná nǔ mɛ; é nɔ́ kpo ɖě ǎ.

²⁷Vɔ̌sísá mɛdídá lɛ́ɛ tɔn ɔ́, nǔ baɖabaɖa wɛ; ée lɛ́ nylá bǐ é nɛ́ nyí yě lɛ́ sá vɔ̌ ɔ́ kpó linlin nyanya kpó nɛ́.

²⁸Kúnnu-agɔɖetɔ́ ná kú; lo ɔ́, mɛ e nyɔ́ tó ɖó mɛ ɔ́, ná nɔ́ ɖó acɛ tɛgbɛ bó ná nɔ́ ɖɔ xó.

²⁹Mɛdídá nɔ wa nǔ mɛ e ɖeji dó éɖée wú ɔ́ ɖɔhun; lo ɔ́, nǔjlɔ́jlɔ́watɔ́ ɔ́, éyɛ́ nɔ́ gbó adɔ dó nǔ e wa wɛ é ɖe ɔ́ wú.

³⁰Nǔnywɛ́ gbɛtɔ́ tɔn, bǐbí gbɛtɔ́ tɔn abǐ tamɛ linlin gbɛtɔ́ tɔn nɔ te Mawu Mavɔmavɔ nukɔn ǎ.

³¹È nɔ blá akpa nú sɔ́ ɖó ahwan lɔ jí, amɔ̌, Mawu Mavɔmavɔ wɛ nɔ ná ɖuɖéjí mɛ.