Read fon Nǔnywɛ́xó 23 Bible Online

Nǔnywɛ́xó 23 - fon bible

Nǔnywɛ́xó 23

¹A ɖo nǔ ɖu xá gǎn wɛ hǔn, tunwun mɛ e nukɔn a ɖe é.

²Nǔɖuɖu ná bó víví nú we gbɔn ɖěbǔ hǔn, kpɔ́n nǔ bó ɖu.

³Nukún towe ní má nɔ nǔɖuɖu ɖagbe e ɖo gǎn nukɔn lɛ́ɛ wú ó; nǔɖuɖu énɛ́ lɛ́ɛ sixú nyí mɔ bɔ è ɖǒ nú we.

⁴Ma nɔ ɖo hlɔ̌nhlɔ́n dó wɛ ɖɔ dɔkun jɛ́n émí ná jɛ dandan ó; ma sɔ́ lin nǔ mɔ̌hun kpɔ́n lɔ ó.

⁵Dɔkun jijɛ wú wɛ nukún towe ɖe a? Ma sɔ́ ɖó nukún ó; awa wɛ é wú, bó kó zɔn yi jǐxwé gangan ɖɔhun.

⁶Gbɛtɔ́ e ayi tɔn ma nyɔ́ ǎ é ɔ́, ma ɖu nǔ tɔn xá ɛ ó; ma nú nukún towe nɔ nǔɖuɖu ɖagbe e ɖo así tɔn ɔ́ wú lɔ ó.

⁷Nǔ vo wɛ ɖo ayi tɔn mɛ, vo ɖɔ wɛ é ká ɖe; é ná ɖɔ nú we ɖɔ: “Đu nǔ bó nu ahan.” Lo ɔ́, é yi xo mɛ ǎ.

⁸É wá yá ɔ́, a nǎ vi nǔ tɔn e a ɖu lɛ́ɛ bǐ, bɔ xó víví e a ko ɖɔ n'i lɛ́ɛ bǐ ná nyí nǔ yǎyá.

⁹Ma xa ji bo ɖɔ xó towe nú xlonɔ ó; nǔnywɛ́ towe e a fɔ tɛ́ n'i lɛ́ɛ bǐ wɛ é ná hu tɛ́ ná.

¹⁰Ma sɛ do nú awǐnnya e è dó ɖó wuntun fí e dogbó towe gbɔn ɖ'ayǐ lɛ́ɛ ó; ma yí tɔ́cyɔvǐ lɛ́ɛ sín ayǐkúngban dó towe jí ó.

¹¹Đó mɛ e nɔ jɛ hun yě jí ɔ́ syɛ́n ɖésú; é wɛ ná jɛ ahwan yě jí.

¹²Sɔ́ ayi towe nyi wɛn bó yí kplɔ́n; ɖǒtó te bó se xó e nɔ́ ná nǔnywɛ́ mɛ é.

¹³Vǐ wa nǔ nyi do hǔn, ma gɔn tó dɔn n'i ó; a xo e ɔ́, é ná kú ɖó mɔ̌ wú ǎ;

¹⁴é nyɔ́ wa ɔ́, xo e a xo e ɔ́, hwlɛ̌n wɛ a hwlɛ̌n ɛ gán ɖo kú sí.

¹⁵Vǐ ce, nú ayi towe fɔ kɛ́n ɖo xomɛ ɔ́, é ná víví nú mì ɖésú.

¹⁶Ényí a nɔ kɛ nu bó nɔ́ ɖɔ xó e xwe ali ɔ́, xomɛ ná hun mì ɖésú.

¹⁷Ma jló mɛdídá lɛ́ɛ sín gbɛ ó; lo ɔ́, nɔ ɖó sísí nú Mawu Mavɔmavɔ tɛgbɛ.

¹⁸Énɛ́ ɔ́, sɔ ná nyɔ́ nú we, bɔ nǔ e ɖó nukún wɛ a ɖe ɔ́ ná nyí yǎyá ǎ.

¹⁹Vǐ ce, ɖǒtó mì; énɛ́ ɔ́, a nǎ nyɔ́ nǔ i, bó ná nɔ ali ɖagbe jí.

²⁰Ma dó ahannumúnɔ sín gbɛ̌ ó; ma ka dó mɛ e nɔ ɖu lan dín lɛ́ɛ sín gbɛ̌ ó.

²¹Đó ahannumúnɔ kpó adɔtɔ́nɔ kpó ɔ́, ya wɛ yě ná ji. Yě ná nɔ ɖo lɛngbɛnlɛngbɛn dán wɛ bó ná kpo nú nǔkíja kɛ́ɖɛ́.

²²Vǐ ce, nɔ ɖótó tɔ́ towe; é wɛ ji we. Nɔ towe wá kpo hǔn, ma hu tɛ́ n'i ó.

²³Nɔ ba ná tunwun nǔ e nyí nǔgbó ɔ́, nǔ e nɔ́ ná nǔnywɛ́ mɛ ɔ́, nǔ e nɔ́ ná kplɔ́n mɛ ɔ́, nǔ e nɔ́ ná nukúnnú-mɔjɛnǔmɛ mɛ é; a ɖǒ nǔ ɖagbe énɛ́ lɛ́ɛ hǔn, ma sɔ́ yě sa nú mɛɖé ó.

²⁴Vǐ e nɔ wa nǔ ɖó sɛ́nxwi jí ɔ́, xomɛ nɔ hun tɔ́ tɔn titewungbe. Mɛ e ji vǐ e ɖó nǔnywɛ́ ɔ́, nǔ nɔ víví nú mɛ ɔ́.

²⁵Vǐ ce, hwi lɔ ɔ́, bo ɖó nǔnywɛ́ bónú tɔ́ towe kpó nɔ towe kpó ní j'awǎ; xomɛ ní hun nyɔ̌nu e hɛn xo towe é.

²⁶Vǐ ce, ɖeji dó wǔ ce; nǔ wa nyi ɖɔhun ní nɔ́ víví nú we.

²⁷Tunwun ɖɔ nyɔ̌nu agalɛtɔ́ ɔ́, do gɔngɔn wɛ; nyɔ̌nu mɛsi ɔ́, do sóbwé sóbwé wɛ.

²⁸Wu wɛ yě nɔ́ tɔ nú mɛ ajotɔ́ axánsúnxó ɖɔhun; yě dɔn súnnu gěgé, bɔ yě sɔ́ ɖo gbejí nú asi yětɔn ǎ.

²⁹Mɛ̌ wɛ nyí gbɛ̌dónánɔ? Mɛ̌ ká nɔ́ ɖɔ un ko nywɛ́ ɔ́? Mɛ̌ ká nɔ́ ɖo jlɛ ɖɔ wɛ bó nɔ́ ɖo vo sa wɛ magbokɔ? Mɛ̌ wɛ nɔ́ nɔ mɔ̌ kpowun bó nɔ́ tɔ́ hun mɛ, bɔ è nɔ gblé wǔ i? Mɛ̌ sín nukún nɔ́ ɖa so ɖo ta wú?

³⁰Mɛ e nɔ jínjɔ́n ahan kɔn bó nɔ gbɛ́ te sí ɔ́ wɛ; mɛ e nɔ xo ahan kplé ɔ́ wɛ.

³¹Ma nú lě e vɛ̌ɛn nyɔ́ kpɔ́n gbɔn ɖo nǔ mɛ ɔ́ jló we ó; ma kpɔ́n lě e é dó jɛ̌ kɔ gbɔn ɖo nǔ mɛ ɔ́ ó. É ná nyɔ́ kɔ yi nú we ganjí,

³²é ká yá ɔ́, é ná xú aɖǔ we dan ɖɔhun; é ná ɖu we jakpata ɖɔhun,

³³bɔ nukún towe ná jɛ nǔ we we mɔ jí; a nǎ jɛ xógbló ɖɔ jí,

³⁴bɔ é ná cí ɖɔ xu mɛ wɛ a ɖe abǐ tɔjíhún ɖaxó ɖé ta aga wɛ a ɖe ɖɔhun.

³⁵A nǎ ɖɔ: “È dǒ nǔ mì, é ká vɛ́ ǎ. È xo mì, un ka tunwun lɔ ǎ. Ahan ɔ́ hɔ́n nú mì ɔ́, un ná lɛ́ nu?”