Read fon Nǔnywɛ́xó 24 Bible Online

Nǔnywɛ́xó 24 - fon bible

Nǔnywɛ́xó 24

¹Ma jló mɛdídá lɛ́ɛ sín gbɛ ó; ma nɔ dó gbɛ̌ yětɔn ó;

²ɖó nǔ nyanya wɛ yě nɔ́ lin; yě kɛ nu ɔ́, lě e yě ná dó nǔ sin gbɔn ɔ́ kɛ́ɖɛ́ jɛ́n yě nɔ́ ɖɔ.

³Nǔnywɛ́ nɔ́ sá xwé, ayiɖote nɔ lí xwé.

⁴Nǔ nyɔ́ wa wɛ nɔ́ nyí tɔn, bɔ nǔ ɖagbe kpó nǔ xɔ akwɛ́ kpó nɔ́ gɔ́ xwé.

⁵Mɛ e ɖó nǔnywɛ́ ɔ́ ɖó hlɔ̌nhlɔ́n; mɛ e tunwun nǔ ɔ́, hlɔ̌nhlɔ́n nɔ́ jɛ hlɔ̌nhlɔ́n jí n'i.

⁶Nǔgbó ɔ́, a ja ahwan fun gbé bó ɖe wě d'é wú ganjí ɔ́, a nǎ ɖu ɖ'é jí; mɛ e ná ɖe wě dó to wú lɛ́ɛ sukpɔ́ ɔ́, to nɔ nɔ te.

⁷Nǔnywɛ́ ɖíɖó ɔ́, nǔɖé wɛ é nyí bɔ xlonɔ na ɖó ɔ́ é ná vɛ́ wǔ; énɛ́ ɔ́ wú wɛ to kplé ɔ́, yě má nɔ́ sixú kɛ nu dó xó mɛ ǎ.

⁸Mɛ e nɔ ɖo nǔ nyanya lin ná wa wɛ ɔ́, ayi wínníwínní gán wɛ è nɔ ylɔ́ mɛ mɔ̌hun.

⁹Xlonɔ lin nǔ ɖěbǔ bó ná wa ɔ́, do jɛ́n nǔ ɔ́ nɔ́ jɛ. Mɛ e nɔ yí go nǔ bǐ wú ɔ́, nǔvɛ́mɔ wɛ é nɔ́ nyí nú gbɛtɔ́ lɛ́ɛ.

¹⁰Ényí kanmɛ gbɔ́jɔ́ we adǎngbomɛzán gbe hǔn, hlɔ̌nhlɔ́n hwedó we tawun nɛ́.

¹¹Hwlɛ̌n mɛ e è ɖǒ kúhwɛ ná lɛ́ɛ; hwlɛ̌n mɛ e è dǒ ji bó dɔn xwe huhu gbé lɛ́ɛ gán.

¹²Ényí a ma hwlɛ́n yě ǎ, bó wá ɖɔ ayi émítɔn kún mɔ ó ɔ́, mɛ e nɔ mɔ nǔ jɛ mɛ ɖokpó ɖokpó sín ayi gɔngɔn mɛ ɔ́ mɔ do ná ǎ wɛ a vɛdó a? Éyɛ́ mɛ e ɖo lǐndɔ̌n towe jí kpɔ́n wɛ é tunwun nǔ bǐ; lě e mɛ ɖokpó ɖokpó wa nǔ gbɔn é sín ajɔ wɛ é nɔ́ ná mɛ ɔ́.

¹³Vǐ ce, nɔ ɖu wǐin, ɖó é nyɔ́ nú we; é ná víví ɖo nu towe mɛ.

¹⁴Mɔ̌ ɖokpó ɔ́, tunwun ɖɔ nǔnywɛ́ lɔ nyɔ́ nú gbɛ towe; ényí a ɖǒ nǔnywɛ́ ɔ́, gbɛ ná nyɔ́ nú we, bɔ nǔ e ɖó nukún wɛ a ɖe ɔ́ ná nyí yǎyá ǎ.

¹⁵Mɛdídá, ma ɖe wě nyanya dó hwɛjijɔnɔ xwé wú ó; ma vívá nɔtɛn tɔn ó;

¹⁶ɖó hwɛjijɔnɔ jɛ ayǐ azɔn tɛ́nwe ɔ́, é ná sí te azɔn tɛ́nwe; amɔ̌, mɛdídá lɛ́ɛ ɔ́, awě wɛ ná xo yě.

¹⁷Kɛntɔ́ towe jɛ ayǐ hǔn, ma nú é víví nú we ó; adǎn ɖo gbigbo e wɛ hǔn, ma ɖú ahwannɔwe ó.

¹⁸A bló mɔ̌ ɔ́, Mawu Mavɔmavɔ ná mɔ, bɔ é ná vɛ́ n'i, bɔ é ná jó xomɛ e sin dó kɛntɔ́ towe wɛ é ɖe ɔ́ dó.

¹⁹Ma nɔ sin xomɛ dó mɛ e nɔ wa nǔ nyanya lɛ́ɛ ó; ma nú mɛdídá lɛ́ɛ sín gbɛ jló we ó;

²⁰nǔnyanyawatɔ́ lɛ́ɛ ɔ́, nǔɖé ná nyɔ́ nú yě ǎ; mɛdídá lɛ́ɛ ɔ́, gbɛ yětɔn ná cí zogbɛ́n cí ɖɔhun.

²¹Vǐ ce, ɖǒ sísí nú Mawu Mavɔmavɔ kpó axɔ́sú kpó; ma dó gǔfɔ́ntɔ́ lɛ́ɛ sín gbɛ̌ ó.

²²Đó ajijimɛ wɛ è nɔ gbo xó yětɔn; mɛɖé tunwun awě e Mawu Mavɔmavɔ kpó axɔ́sú kpó ná sɛ́ dó yě ɔ́ ǎ.

²³Xó e nǔnywɛ́tɔ́ lɛ́ɛ ɖɔ é ɖěvo ɖíe: È ɖo hwɛ ná ɖɔ wɛ ɔ́, é nyɔ́ ɖɔ è nɔ gbɛtɔ́ jí ǎ.

²⁴Hwɛɖɔtɔ́ ɖé ɖɔ nú mɛ e kú hwɛ ɔ́ ɖɔ hwɛ tɔn jɔ ɔ́, mɛ bǐ wɛ nɔ́ gbɛ́ wǎn n'i; to ɔ́ bǐ wɛ nɔ́ dó nu i.

²⁵Amɔ̌, hwɛɖɔtɔ́ e nɔ́ ɖó hwɛ nú mɛ e kú hwɛ lɛ́ɛ ɔ́, hwɛɖɔtɔ́ énɛ́ lɛ́ɛ nɔ́ mɔ fífá; acɛ nɔ kɔn dó yě jí, nǔ nɔ́ nyɔ́ nú yě.

²⁶Mɛ e è kan nǔ byɔ́, bɔ é ɖɔ xomɛ nú mɛ ɔ́, é ɖe xlɛ́ ɖɔ émí nyí xɔ́ntɔn jɔ xɔ́ntɔn.

²⁷Azɔ̌ e a ɖǒ ná wa ɖo glegbe ɔ́ ní tó jínjɔ́n ayǐ hwɛ̌; blǒ gle towe bǐ ganjí; énɛ́ gúdo ɔ́, a nǎ ɖó hwɛndo ayǐ.

²⁸Ma nɔ yǎyá kpowun bó dó hwɛ nɔzo towe ó; ma sɔ́ nu towe dó ɖó adingban ná ó.

²⁹Ma ɖɔ nǔ e mɛ ɖé wa xá émí ɔ́, émí ná wa xá mɛ ɔ́ ó; ma ɖɔ mɛ ɖé byɔ́ tɔ́ xɔ́ émí ɔ́, émí ná sú nɔ xɔ́ mɛ ɔ́ ó.

³⁰Un gbɔn fɔnlínnɔ gle tó gbe ɖokpó, mɛ ma ɖó ta ɖé sín vǐwungle tó gbe ɖokpó,

³¹wunkan blá ɖa nú gle ɔ́; gběhan ɖɔ émí ɖíe ɖo fí e; awǐnnya e é to lɛ́ lɛ̌ dó gle ɔ́ bǐ kó gbádá.

³²Un lin tamɛ dó nǔ énɛ́ e un mɔ ɔ́ jí, bɔ é kplɔ́n nǔ mì:

³³ “Vɛ̌ kó ɖo má dɔ́ amlɔ kpɛɖé, má gbɔjɛ́ kpɛɖé, má mlɔ́ ayǐ, bó blá alɔ dó wǔ kpɛɖé ɖɔ wɛ.

³⁴A nǎ ɖo mɔ̌ ɖɔ wɛ bɔ ya ná wá fyán we; adɔ ná wá fyán we axánsúnxó ɖɔhun.”