Read fon Nǔnywɛ́xó 25 Bible Online

Nǔnywɛ́xó 25 - fon bible

Nǔnywɛ́xó 25

¹Nǔnywɛ́xó Salomɔ́ɔ tɔn ɖěvo lɛ́ɛ ɖíe: Judáa xɔ́sú Ezekiyási sín mɛ lɛ́ɛ wɛ wlán.

²Mǐ nɔ́ kpa susu nú Mawu ɖó é nɔ́ sɔ́ nǔɖé lɛ́ɛ hwlá; mǐ nɔ́ kpa susu nú axɔ́sú lɛ́ɛ, ɖó yě nɔ́ ba do nú nǔ céɖécéɖé.

³Mǐ sixú mɔ do nú fí e jǐnukúnsin yi jǐ yi fó dó é ǎ; mǐ ká sixú mɔ do nú fí e ayǐkúngban yi do yi fó dó ɔ́ ǎ. Mɔ̌ ɖokpó ɔ́, mǐ sixú mɔ nǔ jɛ ayi e ɖo axɔ́sú sín xomɛ é wú ǎ.

⁴È ɖe nǔ kwíji e ɖo kpatágan mɛ lɛ́ɛ sín mɛ ɔ́, nǔtuntɔ́ ná sɔ́ dó tun nǔ ɖagbe ná.

⁵È ɖe gbɛtɔ́ nyanya e ɖo kpɔ́ xá axɔ́sú ɔ́ lɛ́ɛ sín gɔ̌n tɔn ɔ́, axɔ́sú ɔ́ ná nɔ́ wa nǔ ɖó sɛ́nxwi jí bɔ acɛkpikpa tɔn na lí dǒ.

⁶ Ma sɔ́ hwiɖée ɖó tɛn ɖaxó mɛ ɖo axɔ́sú nukɔn ó; ma sɔ́ hwiɖée ɖó hǎga jí ó.

⁷Đó è ɖɔ nú we ɖɔ: “Wǎ jínjɔ́n tɛn ɖaxó élɔ́ mɛ fí” ɔ́, é nyɔ́ hú è sɔ́ we hwe ɖo gbɛtɔ́ nukúnɖéjí nukɔn. Nukún towe ná bo mɔ nǔɖé hǔn,

⁸ma yá wǔ sɔ́ yi hwɛgun ó. É má nyí mɔ̌ ǎ ɔ́, nú nɔzo towe ɔ́ wá ɖɔ xó dó gba xó towe ɔ́, nɛ̌ a ka sɔ́ sixú bló gbɔn?

⁹Hwi kpó mɛ ɖé kpó ɖo tagba jɛ wɛ hǔn, ɖɔ gbo xá ɛ; amɔ̌, xó vívɛ́ e mɛ ɖěvo ɖɔ nú we ɔ́, ma ɖe tɔ́n ó.

¹⁰É má nyí mɔ̌ ǎ ɔ́, é táá wá se, bó zun we, bɔ wi e ɖo ta towe ɔ́ ná kɔ́n bǐ sésé.

¹¹Xó e è ɖɔ bɔ é jɛ gan ɔ́, cí nǔ xɔ akwɛ́ sikánú ɖɔhun, sikánú e è blǒ kpatágan gbɔn wú dó ɖó acɔ́ ná é ɖɔhun.

¹²Nǔgbɛ́númɛ nǔnywɛ́tɔ́ tɔn nɔ́ cí alɔkɛ́ abǐ wlɔ e è zě siká akú dó bló ɔ́ ɖɔhun nú mɛ e ɖótó e bó bló ɖ'é jí é.

¹³Sin e fá ganjí é nɔ́ ná hlɔ̌nhlɔ́n mɛ e ɖo azɔ̌ wa wɛ ɖo hwesivɔ́ gbe é; mɔ̌ ɖokpó ɔ́, mɛ e nyɔ́ wɛn dó ganjí ɔ́ nɔ́ ná hlɔ̌nhlɔ́n gǎn tɔn.

¹⁴Mɛ e nɔ ɖo nu flé wɛ ɖɔ émí ná ná nǔ mɛ ɔ́, cí jǐ e nɔ́ wu, bɔ jɔhɔn nɔ nyi, bɔ é má sɔ́ nɔ́ ja ǎ é ɖɔhun.

¹⁵Mɛ e xwesɔ ganjí é hɛn ɔ́, é ná ɖɔ xó nú gǎn hwɛɖɔtɔ́, bɔ é ná se xó tɔn. Mɔ̌ ɖokpó ɔ́, gbe fífá hɛn ɔ́ é ná gbɛ́ nǔ nú mɛ ɖo fí e adɔn jínjɔ́n ayǐ ɖe é.

¹⁶A mɔ wǐin hǔn, ɖu; ɖu éé ná nyɔ́ nú we é; é má nyí mɔ̌ ǎ ɔ́, é táá wá kpé kɔ nú we bɔ a nǎ vi.

¹⁷Ma nɔ tíin ɖo xɔ́ntɔn towe gɔ́n dín ó; é má nyí mɔ̌ ǎ ɔ́, a táá wá cikɔ n'i, bɔ é ná gbɛ́ wǎn nú we.

¹⁸Mɛ e ɖe kúnnu agɔ dó nɔzo tɔn wú ɔ́, mɛ mɔ̌hun ɔ́, kpota wɛ, hwǐ wɛ, aɖǐgá wɛ.

¹⁹Mɛ e nɔ flú nɔzo tɔn ɔ́, ji ɖe dó wǔ tɔn ɖo adǎngbomɛ hwenu ɔ́, nǔ ɖu ɖo aɖǔ e ko ɖo wǔ dǎn wɛ ɔ́ jí wɛ, te nɔ ɖo afɔ e xo dɔjɔ ɔ́ jí wɛ.

²⁰Han ji nú mɛ e ɖo aluwɛ mɛ ɔ́, awu yí sín kɔ n'i avuvɔ mɛ wɛ; vɛ̌ɛn sinvɛ́sinvɛ́ kɔn dó akpa mɛ n'i wɛ.

²¹ Ényí xovɛ́ sin kɛntɔ́ towe hǔn, nǎ nǔɖuɖu i; ényí kɔ xú i hǔn, nǎ sin i.

²²Ényí a ɖo mɔ̌ wa wɛ ɔ́, winnyá ná hu i káká bɔ é ná mɔ wǔvɛ́ ɖi myɔkán wɛ è kplé ɖó ta n'i ɖɔhun, bɔ Mawu Mavɔmavɔ ná ná ɖagbe e a wa ɔ́ sín ajɔ we.

²³Jɔhɔn e nɔ nyi sín totaligbé ɔ́ nɔ́ dɔn jǐ wá; mɔ̌ ɖokpó ɔ́, mɛ nú ɖɔ gbɔn xɔ glɔ́ xɔ glɔ́ nɔ́ dɔn xomɛsin wá.

²⁴È yi cí xɔ ta ɔ́, é nyɔ́ hú è yi nɔ xwé ɖokpó ɔ́ gbe xá nyɔ̌nu jlɛɖɔtɔ́.

²⁵Kɔxúmɛ ganjí nú è nu sin fífá ɔ́, lě e é nɔ́ víví nú mɛ gbɔn ɔ́, mɔ̌ wɛ wɛn ɖagbe gosín to línlín mɛ wá nú mɛ ɔ́, é nɔ́ víví nú mɛ gbɔn.

²⁶Gbɛtɔ́ hwɛjijɔnɔ wá jɛ sísɔ́sísɔ́ jí ɖo mɛdídá nukɔn hǔn, tɔjɔtɛn wɛ gblé nɛ́; sin ɖiɖi wɛ blú nɛ́.

²⁷É nyɔ́ ɖɔ è nǐ ɖu wǐin dín ǎ; mɔ̌ ɖokpó ɔ́, é nyɔ́ ɖɔ è nǐ ba ná xɔ susu dín ǎ.

²⁸Mɛ e sin xomɛ ɔ́, é má nɔ́ sixú yi agbɔ̌n jí ǎ ɔ́, cí toxo e ahohó tɔn lɛ́ɛ mu, bɔ é ɖo nuvo ɔ́ ɖɔhun.