Read fon Nǔnywɛ́xó 5 Bible Online

Nǔnywɛ́xó 5 - fon bible

Nǔnywɛ́xó 5

¹Vǐ ce, ɖǒtó te ganjí bó se xó e ɖɔ wɛ un ɖe é; nǔnywɛ́xó wɛ, bǐbíxó wɛ.

²Énɛ́ ɔ́, a nǎ nɔ́ lin tamɛ kpɔ́n, bɔ xó towe lɛ́ɛ ná ɖe xlɛ́ ɖɔ a tunwun nǔ.

³Xó e nɔ́ tɔ́n sín mɛ ɖěvo sín asi banáwatɔ́ sín nu mɛ ɔ́, nɔ́ víví ɖi wǐin, é nɔ́ fá ami ɖɔhun.

⁴É ká wá yá ɔ́, é nɔ́ vɛ́ amavívɛ́ ɖɔhun, é nɔ́ ɖá hwǐ nuwenɔ ɖɔhun.

⁵Walɔ nyɔ̌nu mɔ̌hun tɔn ɔ́, kú wɛ é nɔ kplá mɛ yi. A jɛ gúdo tɔn ɔ́, kútomɛ wɛ é ná kplá we yi tlɔlɔ.

⁶É nɔ́ mlɛ́ gbɛli ɔ́ ǎ, é nɔ́ kó bú ali bó ká nɔ́ kó tunwun lɔ ǎ.

⁷Din ɔ́, vǐ ce, ɖǒtó mì. Ma jó xó e un ɖɔ nú we lɛ́ɛ dó ó.

⁸Hɔn nú nyɔ̌nu mɔ̌hun, ma gbɔn hɔn tɔn to lɔ vɔ́vɔ́ ó.

⁹É má nyí mɔ̌ ǎ ɔ́, é ná ɖe wi sín ta nú we, bɔ asisúnɔ ɔ́ ná gblé gbɛ dó nú we; é ná kú nǔbláwǔ nú we ǎ.

¹⁰Mɛ ɖěvo ná wá ɖu nǔ e a jɛ tagba bó wa lɛ́ɛ; nǔ e a jɛ dɛ̌n bó wá lɛ́ɛ ɔ́, mɛ ɖěvo wɛ ná ɖu.

¹¹Fí e é ná wá fó dó ɔ́ wɛ nyí a nǎ ɖo gbɛvo sa wɛ, gbɛ towe ka ko gblé nɛ́; a sɔ́ sixú gán ǎ.

¹²Énɛ́ ɔ́, a nǎ nɔ́ ɖɔ: “Nɛ̌ ká gbɔn bɔ hwenu e è ɖo ɖiɖɔ nú mì wɛ ɔ́, un ma ka se ǎ? Nɛ̌ ká gbɔn bɔ nǔ e è gbɛ́ nú mì lɛ́ɛ ɔ́, un ma ka se ǎ?

¹³Nɛ̌ un ka bló gbɔn bó má ɖótó mɛ̌si ce lɛ́ɛ ǎ? Nɛ̌ un ka bló gbɔn bó má ɖótó nǔ e yě kplɔ́n mì lɛ́ɛ ǎ?

¹⁴Din ɔ́, gbɛ ce blá wǔ; mɛ bǐ kó gbɛ́ mì kɛn ɖo togun ɔ́ mɛ.”

¹⁵Asi towe cí tɔjɔtɛn, fí e sin ɖiɖi nɔ tɔ́n sín é ɖɔhun. Nu tɔ towe sín sin.

¹⁶A nǎ jó tɔ towe dó bɔ é ná sa gbɔn ali jí ali jí, toxo mɛ toxo mɛ wɛ a?

¹⁷Tɔ énɛ́ ní nyí hwi ɖokpónɔ géé tɔn. Ma nú mɛ ɖěvo nu xá we ó.

¹⁸Nǔ ní nyɔ́ nú tɔjɔtɛn towe; nyɔ̌nu e a da ɖo dɔ̌nkpɛ mɛ ɔ́ ní nyí awǎɖónú towe.

¹⁹Asi towe wɛ nyí wǎnyínámɔ towe. Nǔwiwa tɔn bǐ wɛ ɖo yɛ̌yi jí. Acɔ́ɖíɖó tɔn, heɖíɖó tɔn ní nɔ mú we ahan ɖɔhun. Ma nú wǎn yíyí e a ɖǒ n'i ɔ́ ɖe kpo gbeɖé ó.

²⁰Vǐ ce, étɛ́wú mɛ ɖěvo nyɔ̌nu ná jló we? Étɛ́wú a nǎ ɖó he xá mɛsi?

²¹Flín ɖɔ Mawu Mavɔmavɔ ɖo nǔ e wa wɛ mɛ ɖokpó ɖokpó ɖe ɔ́ kpɔ́n wɛ. É mɔ nǔ e wa wɛ mɛ ɖokpó ɖokpó ɖe lɛ́ɛ ɖokpó ɖokpó.

²²Mɛ e nɔ wa nyanya ɔ́, nǔ nyanya e é nɔ́ wa lɛ́ɛ jɛ́n nɔ́ wa nǔ xá ɛ; nǔ nyanya e é nɔ́ wa lɛ́ɛ wɛ nɔ́ nyí mɔ bɔ é nɔ́ sɔ́.

²³Mɛ e ma nɔ ba ná ɖu ɖo éɖée jí ǎ ɔ́, éɖée wɛ é nɔ́ sɔ́ nyi gbě. Nǔ wa zɛ jlɛ̌ wú tɔn wɛ nɔ́ dɔn ɛ yi bú.