Read fon Nǔnywɛ́xó 6 Bible Online

Nǔnywɛ́xó 6 - fon bible

Nǔnywɛ́xó 6

¹Vǐ ce, mɛ ɖé ja axɔ́ ɖu gbé bɔ a nɔ te n'i, bó zin alɔ dó akɔ́n ɖɔ émí ná sú a?

²A zin alɔ mɔ̌hun dó akɔ́n nú mɛɖé a? A dǒ akpá mɔ̌hun nú mɛɖé dó dó kan hwiɖée a?

³Ényí nǔ nyí mɔ̌ hǔn, a jɛ axɔ́tɔ́nɔ lɔ mɛ. Din ɔ́, vǐ ce, nǔ e a nǎ wa dó ɖe ɖɛ hwiɖée ɔ́ ɖíe: yǎ wǔ yi mɔ axɔ́tɔ́nɔ ɔ́, bó sa vo n'i, bó ɖe ta sín mɛ.

⁴A ma ɖe hwiɖée sín hɔzɔ énɛ́ ɔ́ mɛ ǎ hǔn, ma gbɔjɛ́ ó; ma sa kɔmlɔgɔ́ ó.

⁵Wa nǔ agbanlín e jɛ mɔ mɛ bó lun afɔ sín mɛ ɔ́ ɖɔhun; wa nǔ xɛ e jɛ ɖɔ mɛ bó lɛ́ zɔn sín mɛ é ɖɔhun.

⁶Fɔnlínnɔ, kpɔ́n ayǐsínzɛn! Kpɔ́n nǔ dó wǔ tɔn bó dó nyɔ́ nǔ i.

⁷Ayǐsínzɛn ɔ́, mɛɖé nɔ́ nɔ azɔ̌ e wa wɛ é ɖe ɔ́ nu ǎ; é ɖó gǎn ǎ; mɛɖé nɔ́ cɔ́ ɛ ǎ.

⁸Nǔkún ya hwenu ɔ́, é nɔ ba nǔ e é ná ɖu ɔ́ ɖ'ayǐ; nǔ e é ná ɖu é ɔ́, é nɔ́ ɖó kpasin tɔn ɖ'ayǐ.

⁹Fɔnlínnɔ, káká jɛ hwetɛ́nu a ka ná nɔ ayǐmlɔ́mlɔ́ yi jɛ? Hwetɛ́nu a nǎ fɔ́n?

¹⁰ Vɛ̌ kó ɖo má dɔ́ amlɔ kpɛɖé, má gbɔjɛ́ kpɛɖé, má mlɔ́ ayǐ, bó blá alɔ dó wǔ kpɛɖé ɖɔ wɛ.

¹¹A nǎ ɖo mɔ̌ bló wɛ bɔ ya ná wá fyán we ajotɔ́ ɖɔhun; adɔ ná wá fyán we axánsúnxó ɖɔhun.

¹²Mɛ e nɔ fɔ́n bó nɔ́ ɖo adingban te ɖo yiyi wɛ ɔ́ nyí mɛɖé ǎ, gbɛtɔ́ nyanya wɛ.

¹³É nɔ́ sɔ́ nukún dó ɖɔ xó, é nɔ́ sɔ́ afɔ dó ɖɔ xó, é nɔ́ sɔ́ alɔ dó ɖɔ xó; é nɔ́ bló mɔ̌ dó blɛ́ mɛ.

¹⁴Ayixa nyanya kɛ́ɖɛ́ wɛ ɖo xo tɔn mɛ; nǔ nyanya lin wɛ jɛ́n é nɔ ɖe hwebǐnu, é nɔ́ dɔn hun kpé.

¹⁵Énɛ́ ɔ́ wú wɛ ya tɔn ná kpɔ ɖo cɛ́jú mɛ. È nǎ gblé gbɛ dó n'i ɖo nukún xwixwe ɖokpó mɛ, bɔ ɖě wa gbɔn ná hán.

¹⁶Nǔ ayizɛ́n wɛ nɔ vɛ́ Mawu Mavɔmavɔ wú, bɔ é nɔ́ gbɛ́ wǎn ná: nyi ɖokpónɔ wɛ tíin, adingban, xomɛvɔ́nɔ huhu, ayixa e nɔ lɛ́n nǔ nyanya ná wa é, wezun kán ɖo nǔ nyanya wiwa gúdo, kúnnu-agɔɖetɔ́ e nɔ́ ɖo adingban te é. Nǔ tɛ́nwe wɛ é nɔ́ gbɛ́ wǎn ná: é nɔ́ gbɛ́ wǎn nú hun dɔn kpé ɖo nɔví nɔví tɛ́ntin.

²⁰Vǐ ce, hɛn lě e tɔ́ towe ɖɔ hwi ní nɔ́ wa nǔ gbɔn ɔ́ ayi mɛ, má hɔn nǔ e nɔ towe kplɔ́n we lɛ́ɛ nyi gbě ó.

²¹Hɛn nǔ énɛ́ lɛ́ɛ dó ayi mɛ hwebǐnu; fɔ yě dó kɔ kɔjɛ́ ɖɔhun.

²²A ɖo yiyi wɛ ɔ́, nǔ énɛ́ lɛ́ɛ ná nɔ́ xlɛ́ ali we, yě ná nɔ́ hɛn we ɖo adɔ̌zan towe jí; a fɔ́n ɔ́, yě ná nɔ ɖɔ xó nú we.

²³Đó lě e a nǎ wa nǔ gbɔn bɔ è ɖɔ nú we lɛ́ɛ ɔ́, zogbɛ́n wɛ é nyí nú we; kplɔ́n lɛ́ɛ ɔ́, wěziza wɛ yě nyí nú we, nǔ gbɛ́ nú mɛ ká nyí gbɛli nú we.

²⁴Nǔ énɛ́ lɛ́ɛ ná dó alɔ we bɔ a nǎ gló nyɔ̌nu banáwatɔ́, bó ná gló xó víví e nɔ tɔ́n sín nyɔ̌nu mɛ ɖěvo tɔn nu mɛ é.

²⁵Ma nú nyɔ̌nu énɛ́ jló we ɖó ɖɛkpɛ tɔn wú ó. Ma ka lɔn nú é bló nukún nú we dó dɔn we ó.

²⁶Nǔgbó wɛ, nyɔ̌nu agalɛtɔ́ mɔ nǔ kpɛɖé ɔ́, é nɔ́ víví n'i; amɔ̌, nyɔ̌nu afɔdógbětɔ́ ɔ́, gbɛ towe bǐ wɛ é ná yí.

²⁷È sixú sɔ́ myɔ dó akpo mɛ, bɔ awu mɛtɔn gɔn zo wlí a?

²⁸È ka sixú ɖi zɔnlin gbɔn myɔkán jí ma ji myɔ a?

²⁹Nǔ e nɔ́ gbo mɛ e nɔ ɖo nyɔ̌nu mɛsi gúdo é nɛ́. É ɖó alɔ mɛsi wú ɔ́, é ná tɔ́n sín mɛ wǔɖíɖí ǎ.

³⁰Mɛ ɖé ja ajo bó ná dó gbɔ adɔ ɔ́, è nɔ gbɛ́ wǎn n'i ǎ.

³¹É ɖo mɔ̌ có, nú è ka wlí i ɔ́, nǔ e é fin ɔ́, é ná ná mɔ̌hunkɔtɔn donu tɛ́nwe; é ná bɛ́ dɔkun e ɖo xwé tɔn gbe é bǐ dó sú axɔ́.

³²Mɛ e ba mɛsi ɔ́, tamɛ tɔn sɔgbe ǎ; mɛ e jló ná dɔn ɔ́ wɛ nɔ́ wa nǔ gbɔn mɔ̌.

³³Mɛ mɔ̌hun ɔ́, è nǎ dɔn tó n'i, é ná ɖu winnyá, hɛ̌n e é ná ɖu ɔ́ ná gosín wǔ tɔn gbeɖé ǎ.

³⁴Đó ma wɛ wǔhwan nɔ dó asisúnɔ, bɔ é ja hlɔn ba gbé ɔ́, é sɔ́ nɔ́ se gbɔ ǎ.

³⁵É ná ba lɔ ɖɔ è nǐ sú hwɛxɔ́ émí ǎ. È na bo ɖɔ è nǎ ná ɛ nǔ kɔn nyi kpɔ́ gěgé ɔ́, é ná gbɛ́.