Read fon Nǔnywɛ́tɔ́xó 12 Bible Online

Nǔnywɛ́tɔ́xó 12 - fon bible

Nǔnywɛ́tɔ́xó 12

¹Mɛwínnyáwínnyá, flín mɛ e ɖó we ɔ́ ɖo hwenu e a kpo ɖo wǐnnyáwínnyá mɛ é; flín i cóbónú azǎn nyanya lɛ́ɛ ná wá; flín i cóbónú xwe e mɛ a nǎ wa ɖɔ émí kún sɔ́ mɔ gbɛ ɔ́ sín vǐví ɖé ó ɔ́ ná wá.

²Flín i cóbónú hwe kpó wěziza kpó, sun kpódó sunví lɛ́ɛ kpó ná yi xɔ, bɔ zǐnflú ná dó. Flín i cóbónú jǐ ná kɛn bó ná lɛ́ vɔ́ wu.

³Hwenɛ́nu wɛ zǎncɔ́tɔ́ towe lɛ́ɛ nɔ́ ɖo sísɔ́sísɔ́ wɛ; súnnu glegbenu towe lɛ́ɛ nɔ́ ɖo tɔ́tɔ́; nyɔ̌nu towe e ɖo nǔ li wɛ lɛ́ɛ nɔ́ ɖó nǔ lili te, ɖó yě sɔ́ sukpɔ́ ǎ; zǐnflú nɔ́ dó dó mɛ e ɖo nǔ kpɔ́n wɛ gbɔn flɛtɛ́li nu lɛ́ɛ.

⁴Hwenɛ́nu wɛ hɔn towe vǐwenɔ lɛ́ɛ ná sú, bɔ zǐngídi bǐ ná xwɛ; a sɔ́ ná se xɛ ɖě ɖo han ji wɛ ǎ; han bǐ ná yi xɔ.

⁵Kpófínfán ná dó xɛsi nú we; ado ná hu we ɖo ali xo; ɖa towe ná wé, amaditín gba sɛ́ ɖɔhun; agbaza towe ná kpɛn, nǔ cikɔ nú bɔkle ɖɔhun; nǔɖuɖu sɔ́ ná jló we ǎ; ɖó nɔtɛn towe mavɔ mavɔ ɔ́ yi wɛ a ɖe. Avǐyatɔ́ lɛ́ɛ ko ɖo ali jí.

⁶Mɛwínnyáwínnyá, flín mɛ e ɖó we ɔ́ cóbónú kan e è sɔ́ kpatágan dó bló ɔ́ ná tún; flín i cóbónú zɛ̌n e è sɔ́ siká dó bló ɔ́ ná gba, flín i cóbónú tɔká ɔ́ ná wɛ́n jɛ tɔ; flín i cóbónú kpulúlúí ɔ́ ná wɛ́n jɛ tɔ.

⁷Flín i cóbónú agbaza towe ná húzú kɔ́gúdu, bó ná lɛ́ kɔ yi kɔ́gúdu mɛ fí e é gosín é, bɔ funfún ná tɔ́n sín agbaza towe mɛ bó ná lɛ́ kɔ yi Mawu e nɔ ná funfún ɔ́ gɔ́n.

⁸Nyɛ nǔnywɛ́tɔ́ ɔ́, un mɔ ɖɔ nǔ bǐ wɛ nyí nǔ yǎyá, nǔ bǐ wɛ nyí walá.

⁹Nyɛ nǔnywɛ́tɔ́ ɔ́, ényí nǔnywɛ́ kɛ́ɖɛ́ wɛ un ɖó ǎ; gɔ́ nú nǔnywɛ́ ɔ́, un lɛ́ kplɔ́n nǔ togun ɔ́. Un gbéjé nǔ gěgé kpɔ́n, un ba do nú nǔ, lobo to lǒ wɔ̌buwɔ́bú ɖé lɛ́ɛ.

¹⁰Un tɛ́nkpɔ́n bó mɔ xó ɖagbe lɛ́ɛ bó wlán bɔ yě sɔgbe. Xó nǔgbó kɛ́ɖɛ́ wɛ.

¹¹Nǔnywɛ́tɔ́ sín xó lɛ́ɛ cí kpo nu xwíɖíxwíɖí e è nɔ sɔ́ kanlin lɛ́ɛ bɔ zɔnlin yětɔn nɔ́ yá ɔ́ ɖɔhun. È dɔn nǔnywɛ́ yětɔn lɛ́ɛ kplé ɔ́, yě cí hǔnjɛ́n e è xwe ganjí ɔ́ ɖɔhun. Nǔnywɛ́ énɛ́ lɛ́ɛ bǐ ɔ́, Mawu wɛ nɔ ná. Mawu ɖokpó wɛ nyí lɛ̌ngbɔ́nyitɔ́ nǔgbó ɖokpó e ɖe é.

¹²Vǐ ce, ma lɔn bo gɔ́ nǔɖé nú xó énɛ́ lɛ́ɛ ó. Gbɛtɔ́ lɛ́ɛ fɔ́n bó kpo ɖo wěma wlán wɛ magbokɔ. Amɔ̌, è fɔ́n bó ɖo wěma kplɔ́n wɛ magbokɔ ɔ́, é nɔ́ cikɔ.

¹³Xó e ká sú ta nú xó énɛ́ lɛ́ɛ bǐ é ɖíe: Đǒ sísí nú Mawu bó bló nǔ e é zɔ́n lɛ́ɛ; nǔ e ɖo ta jí bɔ gbɛtɔ́ bǐ ɖó ná wa é nɛ́.

¹⁴Đó Mawu ná ɖɔ hwɛ dó nǔ e è wa lɛ́ɛ bǐ, káká jɛ éé è wa dó nǔglɔ́ lɛ́ɛ jí; é sixú nyí nǔ ɖagbe, é ká sixú nyí nǔ nyanya.