Read fon Nǔnywɛ́tɔ́xó 2 Bible Online

Nǔnywɛ́tɔ́xó 2 - fon bible

Nǔnywɛ́tɔ́xó 2

¹Un wá ɖɔ nú nyɛɖée ɖɔ: “Din ɔ́, un ná ɖu gbɛ ce lě e é jló mì gbɔn é, un ná mɔ nǔ jɛ gbɛ víví wú.” Énɛ́ lɔ ɔ́, un mɔ ɖɔ nǔ yǎyá ɖokpó wɛ.

²Un ka mɔ ɖɔ nǔkiko lɔ ɔ́, xlojijɔ wɛ, bɔ nǔɖé ká ɖo awǎjijɛ lɔ mɛ ǎ.

³Un gblɔ́n adǎn ɖɔ un ná wa nǔ xlonɔ lɛ́ɛ ɖɔhun bó ná nu vɛ̌ɛn ganjí; un ná bló mɔ̌, bɔ ayi ce ka na kpo ɖo te, bɔ un ná nɔ kanbyɔ́ nyɛɖée ɖɔ é ká nyɔ́ ɖɔ gbɛtɔ́ ná zán gbɛ tɔn gbɔn mɔ̌ ɖo hwe glɔ́ fí a jí.

⁴ Nǔ ɖaxó ɖaxó e un wa lɛ́ɛ ɖíe: Un sá xwé; un tun vǐwun;

⁵un bló jikpá; un tun atínsínsɛ́n tɛnmɛ tɛnmɛ dó ayǐkúngban ce lɛ́ɛ jí.

⁶Un kun tɔ, bó nɔ́ hú sin tɔn nú atín ce lɛ́ɛ.

⁷ Un xɔ kannumɔ súnnu kpó nyɔ̌nu kpó, bɔ yě ji vǐ, bɔ vǐ yětɔn lɛ́ɛ lɔ nyí kannumɔ ce. Un ɖó gbɔ̌ kpó nyibú kpó hú mɛ e nɔ Jeluzalɛ́mu dó nukɔn nú mì lɛ́ɛ bǐ.

⁸ Un kplé kpatágan kpó siká kpó kɔn nyi kpɔ́; dɔkun énɛ́ lɛ́ɛ ɔ́, axɔ́sú e ɖo acɛ ce mɛ lɛ́ɛ gɔ́n wɛ yě gosín, bó gosín tokpɔn e ɖo acɛ ce mɛ lɛ́ɛ mɛ. Un ɖó hansinɔ súnnu kpó nyɔ̌nu kpó, bɔ yě nɔ́ wá ji han dó ɖe ayi ɖ'ayǐ nú mì. Nǔ e nyí gbɛ bɔ súnnu lɛ́ɛ nɔ́ ɖu ɔ́, un ɖu; un da asi kɔn nyi kpɔ́.

⁹ Un húzú nǔsúɖaxó, bó hú gǎn mɛ e nɔ Jeluzalɛ́mu dó nukɔn nú mì lɛ́ɛ bǐ, ayivɔ ka vún mì ǎ.

¹⁰Nǔ e nukún ce mɔ bɔ é jló mì lɛ́ɛ ɔ́, un gɔn ɖě ɖó ǎ; gbɛɖuɖu e nɔ jló mì ɔ́, un gɔn ɖě ɖu ǎ. Azɔ̌ e un wa lɛ́ɛ ɔ́, un ɖu bǐ sín le bɔ é jɛ mɛ nú mì. Énɛ́ lɛ́ɛ wɛ nyí le e nyí ce ɖo azɔ̌ e un wa lɛ́ɛ mɛ é.

¹¹Ée un ka wá kpɔ́n nǔ e un wa lɛ́ɛ bǐ mɛ sɛ́ dó, bó kpɔ́n wǔvɛ́ e un mɔ ɖ'é mɛ lɛ́ɛ bǐ sɛ́ dó ɔ́, un mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ. Nǔ e wa wɛ è nɔ ɖe ɖo hwe glɔ́ fí ɔ́, le ɖé ɖ'é mɛ ǎ.

¹²Un wá jɛ tamɛ lin kpɔ́n dó nǔ e nyí nǔnywɛ́ é, nǔ e nyí taɖu é, kpódó nǔ e nyí xlo é kpó wú jí, bó wá kanbyɔ́ nyɛɖée ɖɔ nú un wá gosín fí ɔ́, axɔ́sú e ná wá jɛ tɛn ce mɛ ɔ́, étɛ́ wɛ é ká ná bló bɔ é ná gbɔn vo nú ée axɔ́sú e jɛ nukɔn n'i lɛ́ɛ ko bló é.

¹³Nǔ e un wá mɔ ɔ́ ɖíe: un mɔ ɖɔ lě e wěziza nyɔ́ hú ablu gbɔn ɔ́ mɔ̌ wɛ nǔnywɛ́ nyɔ́ hú xlo.

¹⁴Nǔgbó wɛ, mɛ e ɖó nǔnywɛ́ ɔ́, ayi tɔn nɔ mɔ nǔ; xlonɔ ɔ́, ayi tɔn ka tɔ́n nukún; amɔ̌, un mɔ ɖɔ yě mɛ we lɛ́ɛ ɔ́, tɔ ɖokpó ɔ́ mɛ hwe ɖa wɛ yě ɖe.

¹⁵Ényí nǔ ɖokpó ɔ́ wɛ ɖo te kpɔ́n nyi kpó xlonɔ kpó ɔ́, étɛ́ un ka ɖó nǔnywɛ́ hú i dó wa ná? Un lɛ́ mɔ ɖo fínɛ́ ɖɔ nǔnywɛ́ ɖó hú mɛ ɔ́, nǔ yǎyá wɛ.

¹⁶Nǔnywɛ́tɔ́ ɔ́, è nɔ flín i káká sɔ́yi ǎ; mɔ̌ ɖokpó ɔ́, è nɔ flín xlonɔ lɔmɔ̌ káká sɔ́yi ǎ. Ayǐ ɖo hǐnhɔ́n dó ayǐ jí wɛ ɔ́, è nɔ wɔn yě. Nǔnywɛ́tɔ́ nɔ́ kú, xlonɔ lɔ nɔ kú.

¹⁷Ée un mɔ mɔ̌ é ɔ́, un gbɛ́ wǎn nú gbɛ ɔ́, ɖó nǔ e gbɛtɔ́ nɔ wa ɖo hwe glɔ́ fí ɔ́ ɖě nyí nǔɖé wa nú ǎ; un mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ.

¹⁸Tagba e jɛ wɛ un ɖe ɖo hwe glɔ́ fí, bó ɖo nǔ wa wɛ ɔ́ bǐ vɛ́ nú mì, ɖó un ná jó nǔ énɛ́ lɛ́ɛ bǐ dó nú mɛ e ɖo do ce mɛ ná nɔ wɛ é.

¹⁹Azɔ̌ e un zán nǔnywɛ́ ce bó wa ɖo hwe glɔ́ fí ɔ́, mɛ e ɖo do ce mɛ ná wá nɔ wɛ ɔ́ wɛ ɖo acɛ ná kpa ná wɛ; é to ká ná ɖó nǔnywɛ́ kpó é ná jɔ xlo kpó ɔ́, mɛ̌ ká tunwun; énɛ́ lɔ ɔ́ un mɔ ɖɔ nǔ yǎyá wɛ.

²⁰Din ɔ́, un dán nǔ e dó mì bɔ un jɛ tagba bó wa azɔ̌ sɔ mɔ̌ ɖo hwe glɔ́ fí é.

²¹Gbɛtɔ́ zé nǔnywɛ́ tɔn, bó zé lě e é mɔ nukúnnú jɛ gbɛ ɔ́ wú gbɔn ɔ́ dó wa nǔ ná, bó mɔ nu tɔn, có é ná jó nǔ énɛ́ bǐ dó nú mɛ e ná wá nɔ do tɔn mɛ é; mɛ énɛ́ ká mɔ wǔvɛ́ ɖé xá ɛ ǎ. Énɛ́ lɔ ɔ́ un mɔ ɖɔ nǔ yǎyá wɛ, nǔ ɖǒ ná nyí mɔ̌ ǎ.

²²Ée nǔ ká ɖo mɔ̌ din ɔ́, tagba e gbɛtɔ́ jɛ ɖo hwe glɔ́ fí bó wa azɔ̌, bó bló nǔ e ɖo ayi tɔn mɛ ɔ́, le tɛ́ é ká mɔ ɖ'é mɛ?

²³Đó ayǐ hɔ́n tɛgbɛ ɔ́, adǎn jɛ́n nɔ́ ɖo gbigbo e wɛ; nǔ lin wɛ jɛ́n é nɔ́ ɖe, bó nɔ́ ɖo kéve xo wɛ ɖo gbɛ nukɔn. Zǎn na bo kú ɔ́, é nɔ́ vo ɖo ayi mɛ ǎ. Nǔ énɛ́ lɔ ɔ́ un mɔ ɖɔ nǔ yǎyá wɛ.

²⁴ Nǔɖé sɔ́ nyɔ́ nú gbɛtɔ́ ɖo gbɛmɛ zɛ é ná ɖu nǔ, bó nu ahan, bó ɖu azɔ̌ e é wa ɔ́ sín gbɛ wú ǎ. Nǔ énɛ́ lɛ́ɛ lɔ ɔ́, un mɔ ɖɔ Mawu wɛ nɔ hun alɔ bo nɔ ná mɛ.

²⁵Đó xó e Mawu ɖɔ é ɖíe: “Mɛ̌ ká sixú ɖu nǔ, bó ɖu gbɛ víví nyɛ mɛ vo?”

²⁶ Nǔgbó ɔ́, Mawu wɛ nɔ́ ná nǔnywɛ́, nukúnnú mɔ jɛ nǔ mɛ kpó awǎjijɛ kpó mɛ e nɔ wa jlǒ tɔn é; lo ɔ́, é nɔ́ zɔ́n azɔ̌ mɛ e nɔ wa nǔ nyanya é, bɔ é nɔ́ wa azɔ̌, bó nɔ́ kplé dɔkun nú mɛ e nɔ wa jlǒ éyɛ́ Mawu ɔ́ tɔn é; dɔkun kplé ɖ'ayǐ ɔ́, un mɔ ɖɔ énɛ́ lɔ ɔ́ nǔ yǎyá wɛ; wezun kán ɖo jɔhɔn gúdo wɛ.