Read fon Nǔnywɛ́tɔ́xó 3 Bible Online

Nǔnywɛ́tɔ́xó 3 - fon bible

Nǔnywɛ́tɔ́xó 3

¹Nǔ bǐ wɛ ɖó hwenu. Nǔ ɖokpó ɖokpó ɖó hwenu tɔn ɖo hwe glɔ́ fí.

²Hwenu e è nǎ jɔ dó ɔ́ ɖe, bɔ hwenu e è nǎ kú dó é ɖe. Hwenu e è nǎ dó nǔ dó ɔ́ ɖe, bɔ hwenu e è nǎ hɔn dó é ɖe.

³Hwenu e è nǎ hu mɛ dó ɔ́ ɖe, bɔ hwenu e è nǎ gbɔ azɔn nú mɛ dó é ɖe. Hwenu e è nǎ mu xɔ dó ɔ́ ɖe, bɔ hwenu e è nǎ mɛ xɔ dó é ɖe.

⁴Hwenu e è nǎ ya avǐ dó ɔ́ ɖe, bɔ hwenu e è nǎ ko nǔ dó é ɖe. Hwenu e è nǎ sa gbɛvo dó ɔ́ ɖe, bɔ hwenu e è nǎ ɖú we dó é ɖe.

⁵Hwenu e è nǎ nyi hwǎn dó ɔ́ ɖe, bɔ hwenu e è nǎ cyán hwǎn dó é ɖe. Hwenu e è nǎ kplá así kɔ nú mɛ dó ɔ́ ɖe, bɔ hwenu e è ma ná kplá así kɔ nú mɛ dó ǎ é ɖe.

⁶Hwenu e è nǎ ba nǔ dó ɔ́ ɖe, bɔ hwenu e è nǎ hɛn nǔ bǔ dó é ɖe. Hwenu e è nǎ hɛn nǔ dó ɔ́ ɖe, bɔ hwenu e è nǎ sɔ́ nǔ nyi gbě dó é ɖe.

⁷Hwenu e è nǎ hɛn nǔ tlɛ́n dó ɔ́ ɖe, bɔ hwenu e è nǎ tɔ nǔ dó é ɖe. Hwenu e è nǎ nɔ abwɛ̌ dó ɔ́ ɖe, bɔ hwenu e è nǎ ɖɔ xó dó é ɖe.

⁸Hwenu e è nǎ yí wǎn nú mɛ dó ɔ́ ɖe, bɔ hwenu e è nǎ gbɛ́ wǎn nú mɛ dó é ɖe. Hwenu e è nǎ fun ahwan dó ɔ́ ɖe, bɔ hwenu e è nǎ nɔ fífá mɛ dó é ɖe.

⁹Étɛ́ azɔ̌watɔ́ ká nɔ́ mɔ ɖo tagba e é nɔ́ jɛ bó nɔ́ wa nǔ é mɛ?

¹⁰Un mɔ kpowun ɖɔ tagba wɛ bɔ Mawu dó gbɛtɔ́ jí.

¹¹Mawu bló hwenu e nǔ ɖokpó ɖokpó ná jɛ dó bɔ é ná nyɔ́ é. Mawu sɔ́ dó ayi mɛ nú gbɛtɔ́, bɔ é nɔ́ ba ná tunwun nǔ e kó jɛ wá yi lɛ́ɛ kpódó nǔ e ná wá jɛ káká sɔ́yi lɛ́ɛ kpó; lo ɔ́, nǔ e Mawu bló lɛ́ɛ ɔ́, gbɛtɔ́ sixú tunwun bǐ yi fó ǎ.

¹²Énɛ́ ɔ́, un wá mɔ ɖɔ nǔ ɖokpó e nyí nǔ bó nyɔ́ hú nǔ bǐ nú gbɛtɔ́ ɔ́, é wɛ nyí é ná ɖu gbɛ, bó mɔ gbɛ víví hwenu e é ɖo gbɛ é.

¹³Ényí mɛɖé nɔ́ ɖu nǔ, bó nɔ́ nu ahan, bó ɖu azɔ̌ e é jɛ tagba bo wa ɔ́ sín gbɛ hǔn, Mawu wɛ ná ɛ.

¹⁴Un wá mɔ nǔ jɛ wú ɖɔ nǔ e Mawu bló ɔ́ ná ɖo ayǐ káká sɔ́yi. Nǔɖé tíin bɔ è ɖo nǎ sɔ́ gɔ́ ná wɛ ǎ, nǔɖé ká tíin bɔ è nǎ ɖe sín mɛ ǎ. Mawu bló mɔ̌ bónú gbɛtɔ́ ná sí i.

¹⁵Nǔ e ɖe égbé din ɔ́ kó tíin ɖo xóxó hwenu, bɔ nǔ e ká ná wá tíin ɔ́ lɔ ko tíin kpɔ́n. Nǔ e kó jɛ wá yi lɛ́ɛ ɔ́, Mawu nɔ́ lɛ́ ɖo bǐ sɔ́ wá wɛ.

¹⁶Un lɛ́ mɔ nǔ ɖěvo ɖo hwe glɔ́ fí: fí e è ɖǒ ná wa nǔ ɖó sɛ́nxwi jí ɖe ɔ́, è nɔ wa nǔ agɔ ɖo fínɛ́; fí e è ɖǒ ná ɖɔ hwɛ jlɔ́jlɔ́ ɖe ɔ́, è nɔ dó hwɛ agɔ ɖo fínɛ́.

¹⁷Énɛ́ ɔ́, un ɖɔ dó xomɛ ɖɔ: “Mawu ná ɖɔ hwɛ xá hwɛjijɔnɔ, bó ɖɔ hwɛ xá dǎkaxotɔ́; ɖó hwenu e Mawu ná ɖɔ hwɛ dó nǔ ɖokpó ɖokpó ɔ́ ɖe; nǔ e nɔ jɛ lɛ́ɛ ɖokpó ɖokpó ɖó hwenu; nǔ e è nɔ wa lɛ́ɛ ɖokpó ɖokpó ɖó hwenu.”

¹⁸Un lɛ́ ɖɔ dó xomɛ ɖɔ: “Mawu ná ɖe nǔ xlɛ́ gbɛtɔ́ dó xlɛ́ ɛ ɖɔ é kún gbɔn vo nú kanlin ó.”

¹⁹Đó nǔ e ɖo te kpɔ́n kanlin ɔ́ jɛ́n ɖo te kpɔ́n gbɛtɔ́ lɔ; funfún e ɖo kanlin xomɛ é jɛ́n ɖo gbɛtɔ́ xomɛ; kanlin ná kú, gbɛtɔ́ lɔ ná kú. Gbɛtɔ́ nyí nǔɖé hú kanlin ǎ; ɖó nǔ lɛ́ɛ bǐ wɛ nyí nǔ yǎyá.

²⁰Nǔ e ɖo gbɛ é bǐ wɛ è zě kɔ́ dó bló; bǐ wɛ ná lɛ́ húzú kɔ́; fí ɖokpó ɔ́ wɛ bǐ xwe.

²¹Mɛ ɖé tunwun fí e gbɛtɔ́ sín funfún nɔ́ yi é ǎ; mɛɖé ká tunwun fí e kanlin tɔn nɔ́ yi é ǎ. É tó nyí jǐxwé wɛ gbɛtɔ́ tɔn nɔ yi oo, é tó nyí ayǐkúngban glɔ́ wɛ kanlin tɔn nɔ yi oo, mɛ ká tunwun?

²²Nǔgbó ɔ́, un wá mɔ ɖɔ gbɛ ɖé kún sɔ́ kpo nú gbɛtɔ́ zɛ é ná ɖu nǔ e é wa lɛ́ɛ sín gbɛ wú ó; ée nyí étɔn é nɛ́. Đó nǔ e ná wá jɛ dó gǔdo tɔn lɛ́ɛ ɔ́, mɛ̌ ká ná kplá ɛ wá, bɔ é ná mɔ?