Read fon Nǔnywɛ́tɔ́xó 4 Bible Online

Nǔnywɛ́tɔ́xó 4 - fon bible

Nǔnywɛ́tɔ́xó 4

¹Un lɛ́ mɔ lě e gbɛtɔ́ lɛ́ɛ nɔ́ dó ya nú nɔzo yětɔn lɛ́ɛ gbɔn ɖo hwe glɔ́ fí é. Mi kpɔ́n! Mɛ e dó ya ná wɛ è ɖe lɛ́ɛ ɖo avǐ ya wɛ. Mɛ ɖěbǔ ká ɖe bó ná dó gbɔ nú yě ǎ. Mɛ e ɖo ya dó nú yě wɛ lɛ́ɛ sí wɛ acɛkpikpa ɔ́ ɖe; énɛ́ wú wɛ mɛ ɖěbǔ má ɖe bó ná dó gbɔ nú yě ǎ.

²Un mɔ din ɖɔ mɛ e ko kú lɛ́ɛ ɖu gbɛ hú mɛ e kpo ɖo gbɛ din lɛ́ɛ.

³Lo ɔ́, mɛ e ma jɔ wá gbɛ ɔ́ mɛ ǎ ɔ́ ɖu gbɛ hú yě bǐ; ɖó éyɛ́ mɔ nǔ agɔ e è nɔ wa ɖo hwe glɔ́ fí lɛ́ɛ kpɔ́n ǎ.

⁴Un lɛ́ mɔ nǔ jɛ wú ɖɔ gbɛtɔ́ nɔ́ jɛ tagba bó nɔ lébe nú azɔ̌ tɔn. Nǔ e wú é nɔ́ ɖo mɔ̌ wa wɛ ɔ́ wɛ nyí ɖɔ nǔ ná nyɔ́ nú éyɛ́ hú mɛ bǐ. Un mɔ ɖɔ nǔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ.

⁵Xlonɔ nɔ gbɛ́ nǔɖé wa;

⁶Nǔ ɖo mɔ̌ có, éɖée nú wa wɛ é ɖe; è ɖǒ nǔ kpɛɖé bó ná agbɔ̌n mɛɖée ɔ́, é nyɔ́ hú è ɖo azɔ̌ wa wɛ hwebǐnu, káká bó ba agbɔ̌n kpo.

⁷Un lɛ́ mɔ nǔ yǎyá ɖěvo ɖo hwe glɔ́ fí:

⁸Nya ɖé tíin, bɔ é ɖokpó wɛ ɖo ayǐ, mɛɖé ɖo kpɔ́ xá ɛ ǎ. Nya ɔ́ ɖó vǐ ǎ, é ɖó nɔví ǎ, é ká fɔ́n ɔ́, azɔ̌ wa wɛ jɛ́n é nɔ́ ɖe; dɔkun kplé dó dɔkun jí wɛ jɛ́n é nɔ́ ɖe. É nɔ́ wá kanbyɔ́ éɖée ɖɔ: “Mɛ̌ kplé dɔkun ɔ́ ɖ'ayǐ ná wɛ un ka ɖe bó gbɛ́ gbɛ ce ɖu?” Un mɔ ɖɔ nǔ énɛ́ lɔ ɔ́, nǔ yǎyá wɛ; gbɛ mɛtɔn zán nyi do wɛ.

⁹Mɛ we ɖó gbe kpɔ́ bó wa azɔ̌ ɔ́, é nyɔ́ hú è nɔ mɛ ɖokpó géé; ɖó è kpé we ɖo azɔ̌ kɔn ɔ́, è nɔ mɔ nu tɔn.

¹⁰Nú mɛ ɖě jɛ ayǐ ɔ́, mɛ ɖě ɔ́ ná sɔ́ ɛ sí te; amɔ̌, mɛ e nyí é ɖokpónɔ bó jɛ ayǐ ɔ́, nǔ tɔn blá wǔ, ɖó é ná mɔ mɛɖé bónú é ná dó alɔ ɛ, bɔ é ná sí te ǎ.

¹¹Mɔ̌ ɖokpó ɔ́, nú mɛ we mlɔ́ zan ɖokpó ɔ́ jí ɔ́, yě nɔ́ glɔ́n jɔhɔn nú yěɖée; é ká nyí mɛ ɖokpó wɛ ɔ́, mɛ̌ ná glɔ́n jɔhɔn n'i?

¹²Ényí mɛɖé tɔ́n hun mɛ we ɔ́, yě mɛ we lɛ́ɛ hɛn ɔ́, yě ná gló mɛ ɔ́; é ká nyí mɛ ɖokpó wɛ è tɔ́n ahwan ɔ́, è nǎ kpé wǔ tɔn. È fɔ kan atɔn kplé bó gbɛ ɔ́, é nɔ́ wɛ́n vawun ǎ.

¹³Yɔkpɔ́vú e nyí yatɔ́nɔ bó ká ɖó nǔnywɛ́ ɔ́ nyɔ́ hú axɔ́sú e nyí mɛxó, bó ka jɔ xlo, bó má sɔ́ nɔ́ ɖótó mɛɖé xó ǎ é.

¹⁴Yɔkpɔ́vú énɛ́ ɔ́, é ná bó nyí ya mɛ wɛ è ji i dó, abǐ é ná bó nyí gankpá mɛ é gosín bó wá yi zinkpo jí ɔ́,

¹⁵un mɔ ɖɔ yɔkpɔ́vú ɔ́ jí wɛ gbɛtɔ́ e ɖo hwe glɔ́ fí lɛ́ɛ ná nɔ; yě ná nɔ axɔ́sú e do mɛ é wá ɖe ɔ́ jí ǎ.

¹⁶Yɔkpɔ́vú énɛ́ ɔ́ ná ɖu axɔ́sú ɖo mɛ gěgé nu; é ká ɖo mɔ̌ có axɔ́súɖuɖu tɔn sɔ́ nɔ́ wá nyí xomɛhunhunnú ɖe nú mɛ e ná wá jɔ sɔ lɛ́ɛ ǎ; un mɔ ɖɔ nǔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ.

¹⁷Nɔ lin tamɛ ganjí có bó nɔ́ yi Mawu xwé gbe. Tunwun dó ayi towe mɛ ɖɔ xó se gbé wɛ émí xwe. È wa nǔ gbɔn mɔ̌ ɔ́, é nyɔ́ hú è nǐ xwlé vɔ̌sánú Mawu mɛ e ma nɔ lin tamɛ ǎ lɛ́ɛ ɖɔhun; ɖó yě tunwun ɖɔ émí ɖo nǔ wa nyi do wɛ ǎ.