Read fon Nǔnywɛ́tɔ́xó 5 Bible Online

Nǔnywɛ́tɔ́xó 5 - fon bible

Nǔnywɛ́tɔ́xó 5

¹Ma nɔ yá wǔ ɖɔ xó ó. Ma nɔ hwlɛ́n dó bó nɔ́ dó akpá nú Mawu ó. Mawu ɔ́, jǐxwé wɛ é ɖe, bɔ hwɛ ka ɖo ayǐkúngban jí; hǔn ma nɔ ɖɔ xó dín ó.

²Nǔ linlin hú gǎn mɛ ɔ́, dlɔ̌ wɛ è nɔ kú; mɔ̌ ɖokpó ɔ́, è ɖo xó ɖɔ wɛ dín ɔ́, xó gbló wɛ è nɔ ɖɔ.

³ Nú a dǒ akpá nú Mawu hǔn, ɖe; ma nú é nɔ lǐnlín mɛ ó, ɖó Mawu nɔ́ yí wǎn nú xlonɔ lɛ́ɛ ǎ. Akpá e a dǒ ɔ́, bo ɖe.

⁴A gbɔ bo gɔn akpá dó ɔ́, é nyɔ́ hú a dǒ bó gɔn ɖiɖe.

⁵Ma lɔn nú nu towe dɔn we dó hwɛ mɛ ó. Ma lɔn bo wá yi ɖo ɖiɖɔ nú vɔ̌sánú-xwlémawutɔ́ ɔ́ wɛ ɖɔ: “Akpá e un dó ɔ́, un lin tamɛ ganjí cóbó dó ǎ” ó. Étɛ́wú a ka ná ɖɔ xó dó dó xomɛsin nú Mawu, bɔ Mawu ná hɛn nǔ e wa wɛ a ɖe ɔ́ gblé?

⁶Xó sukpɔ́ dín ɔ́, gblǒ wɛ é nɔ́ wá húzú; mɔ̌ ɖokpó ɔ́, dlɔ̌ kú sukpɔ́ ɔ́, gblǒ wɛ é nɔ́ nyí. Hǔn, bo ɖó sísí nú Mawu.

⁷Nú a mɔ bɔ è ɖo wamamɔnɔ blɛ́ ɖu wɛ, bó ɖo hwɛ agɔ dó wɛ, bó ɖo mɛ táfú wɛ ɖo tokpɔn ɖé mɛ hǔn, ma nú é kpácá we ó, ɖó azɔ̌watɔ́ ɖaxó ɖokpó ɖokpó ɖó gǎn bɔ é nɔ́ nya xɛ ɖo jǐ tɔn, bɔ mɛ ɖěvo lɛ́ ɖe bó nyí gǎn nú yě mɛ we lɛ́ɛ, lobo nɔ nya xɛ ɖo yě jí.

⁸Ényí to ɖé ká tíin bó ɖó axɔ́sú, bɔ axɔ́sú ɔ́ nɔ́ jɛ hun dó glezɔ́ jí ɔ́, énɛ́ ná nyɔ́ hú.

⁹Mɛ e yí wǎn nú akwɛ́ ɔ́, akwɛ́ nɔ́ kpé e gbeɖé ǎ; mɛ e yí wǎn nú dɔkun ɔ́, nǔ e é ɖó ɔ́ nɔ kpé e gbeɖé ǎ. Un mɔ ɖɔ énɛ́ lɔ ɔ́, nǔ yǎyá ɖokpó wɛ.

¹⁰Ényí mɛ ɖé jɛ dɔkun sukpɔ́ ɔ́, ɖuɖutɔ́ nɔ́ sukpɔ́; ényí nǔ ká ɖo mɔ̌ ɔ́, mɛ e jɛ dɔkun ɔ́, le tɛ́ ká ɖ'é mɛ n'i nɛ́? É ná kpɔ́n dɔkun tɔn lɛ́ɛ ɖó nukún wú kpowun.

¹¹Azɔ̌watɔ́ ɔ́, é ná bó ɖó nǔ e é ná ɖu ɔ́ kpɛví ɖé, abǐ gěgé ɔ́, amlɔ víví wɛ é nɔ́ dɔ́; amɔ̌, dɔkunnɔ nɔ sixú dɔ́ amlɔ ǎ, ɖó dɔkun tɔn sukpɔ́ dín.

¹²Nǔ baɖabaɖa ɖokpó tíin bɔ un mɔ ɖo hwe glɔ́ fí: mɛ e ɖó dɔkun ɔ́ nɔ́ kplé ɖ'ayǐ bɔ énɛ́ ɔ́ nɔ́ nyí kú n'i.

¹³É nɔ́ bɛ́ dɔkun tɔn dó nǔɖé mɛ bɔ bǐ nɔ́ gbadó, bɔ é sɔ́ nɔ́ wá jó gǔ ɖé dó nú vǐ tɔn ǎ.

¹⁴ Mɛ̌ wɛ gbɛtɔ́ zɔn bó gosín nɔ tɔn xo mɛ; mɛ̌ mɔ̌ jɛ́n é ká ná lɛ́ zɔn bó lɛ́ kɔ sín gbɛ ɔ́ mɛ. Nǔ e é wa ɖo gbɛmɛ fí ɔ́, é nɔ́ hɛn kpɛví ɖé vɔ́vɔ́ yi ǎ.

¹⁵Lě e é zɔn wá ɔ́, mɔ̌ jɛ́n é lɛ́ zɔn yi; é blá wǔ mɛ! Tagba e é jɛ bó wa azɔ̌ ɔ́, le tɛ́ ká ɖ'é mɛ n'i? É wa azɔ̌ dó wǔvɔ́ kpowun.

¹⁶Ée lɛ́ nylá ɔ́ wɛ nyí hwenu e é ɖo gbɛ ɔ́, adǎn nɔ́ ɖo gbigbo e wɛ, é nɔ́ ɖo nǔ lin wɛ, é nɔ́ ɖo wǔvɛ́ mɔ wɛ, é nɔ́ ɖo akpɔ mɔ wɛ.

¹⁷Nǔ e un mɔ dó xó énɛ́ lɛ́ɛ wú ɔ́ ɖíe: nǔ e nyɔ́ nú gbɛtɔ́ ɔ́ wɛ nyí é ná ɖu nǔ, bó nu ahan, bó ɖu azɔ̌ e é wa ɔ́ sín gbɛ, ɖo azǎn nabí e Mawu ná ɛ, bɔ é ná nɔ gbɛ xɔ é mɛ, ɖó éé nyí étɔn ɔ́ nɛ́.

¹⁸Nǔgbó ɔ́, Mawu sixú dó dɔkun nú mɛ ɖé, bɔ é jɛ dɔkun bó mɔ ɖu. Mɛ énɛ́ ɔ́ hɛn ɔ́, é ná ɖu éé nyí étɔn é, é ná ɖu azɔ̌ e é wá ɔ́ sín gbɛ. É cí mɔ̌ nú mɛ ɖé hǔn, Mawu wɛ ná ɛ.

¹⁹Nǔ cí mɔ̌ nú mɛ ɖé ɔ́, mɛ ɔ́ sɔ́ nɔ́ flín ɖɔ émí kún ɖo gbɛ nabí ɖé ná nɔ wɛ ó ǎ, ɖó gbɛ e Mawu ná ɛ bɔ é ɖo ɖuɖu wɛ ɔ́ wú.