Read fon Nǔnywɛ́tɔ́xó 9 Bible Online

Nǔnywɛ́tɔ́xó 9 - fon bible

Nǔnywɛ́tɔ́xó 9

¹Énɛ́ ɔ́, un lin tamɛ dó nǔ énɛ́ lɛ́ɛ bǐ jí; nǔ e un ka wá mɔ ɔ́ ɖíe: nǔjlɔ́jlɔ́watɔ́ lɛ́ɛ kpó nǔnywɛ́tɔ́ lɛ́ɛ kpó, kpódó azɔ̌ e yě nɔ́ wa lɛ́ɛ kpó bǐ wɛ ɖo Mawu lɔ mɛ. Wǎn tó ná yí gbɛtɔ́ kpó wǎn ná gbɛ́ ɛ kpó ɔ́, gbɛtɔ́ sixú tunwun ɖ'ayǐ ǎ. Gbɛtɔ́ tunwun nǔ e ná jɛ dó jǐ tɔn é ɖě ǎ.

²Nǔ ɖokpó ɔ́ wɛ nɔ́ jɛ dó mɛ bǐ jí; nǔ e jɛ dó nǔjlɔ́jlɔ́watɔ́ jí ɔ́ wɛ nɔ́ jɛ dó mɛdídá jí; nǔ e nɔ́ jɛ dó mɛ ɖagbe kpó mɛ mímɛ́ kpó jí ɔ́ wɛ nɔ́ jɛ dó mɛ blíblí jí. Nǔ e nɔ́ jɛ dó mɛ e nɔ sá vɔ̌ é jí ɔ́ wɛ nɔ́ jɛ dó mɛ e ma nɔ sá vɔ̌ ǎ é jí; nǔ e nɔ́ jɛ dó mɛ e nɔ wa nǔ ɖó sɛ́nxwi jí ɔ́ jí ɔ́ wɛ nɔ́ jɛ dó hwɛhutɔ́ jí; nǔ e nɔ́ jɛ dó mɛ e nɔ dó akpá ɔ́ jí ɔ́ wɛ nɔ́ jɛ dó mɛ e ma nɔ glá dó akpádídó wú ǎ e jí.

³Nǔ e nylá hú nǔ bǐ ɖo hwe glɔ́ fí lɛ́ɛ ɔ́ ɖokpó nɛ́ nyí nǔ ɖokpó ɔ́ e nɔ́ jɛ dó gbɛtɔ́ lɛ́ɛ bǐ jí é nɛ́. Énɛ́ wɛ zɔ́n bɔ dǎkaxixo kpó nǔ agɔ agɔ wiwa kpó nɔ́ gɔ́ gbɛtɔ́ sín ayi mɛ hwebǐnu. Énɛ́ ɔ́ gúdo ɔ́, gbɛtɔ́ nɔ́ yi maɖɔnǔxwɛ.

⁴Amɔ̌, mɛ e ɖo gbɛ lɛ́ɛ ɔ́, yě hɛn ɔ́, yě ná ɖó nukún nǔ. Nǔ nyɔ́ nú cukú gbɛɖe hú kinnikínní kúkú ǎ cé?

⁵Nǔgbó ɔ́, mɛ e ɖo gbɛ lɛ́ɛ má tunwun ɖɔ émí ná kú vɔ́vɔ́ a? Lo ɔ́, mɛ e ko kú lɛ́ɛ sɔ́ tunwun nǔɖé ǎ. Nǔ ɖó nukún ɖěbǔ sɔ́ ɖe nú yě ǎ, ɖó è ko wɔn yě.

⁶Mɛ e ko kú lɛ́ɛ sɔ́ ɖo wǎn yí nú mɛ ɖě wɛ ǎ, yě sɔ́ ɖo wǎn gbɛ́ nú mɛ ɖě wɛ ǎ, nǔɖé ká sɔ́ ɖo yě jlǒ wɛ ǎ. Yě sɔ́ ɖó nu ɖo nǔ e nɔ jɛ ɖo hwe glɔ́ fí ɔ́ ɖě mɛ gbeɖé ǎ.

⁷Hǔn, bo ɖu nǔ kpó awǎjijɛ kpó, nu vɛ̌ɛn towe kpó xomɛhunhun kpó. Đó nǔ e wa wɛ a ɖe ɔ́ kó nyɔ́ Mawu nukún mɛ.

⁸Nɔ dó awu wěwé hwebǐnu; mi ma ka gɔn nǔsáwǔ wǎnɖagbenɔ sá dó ta gbeɖé ó.

⁹Đu gbɛ xá nyɔ̌nu e a yí wǎn ná é ɖo hwenu kpɛ e Mawu ná we bɔ a nǎ bló ɖo ayǐkúngban jí fí ɔ́ mɛ. Đó nǔ e nyí towe ɖo tagba e jɛ wɛ a ɖe ɖo hwe glɔ́ fí ɔ́ mɛ ɔ́ nɛ́.

¹⁰Alɔ towe jɛ nǔ ɖěbǔ wú hǔn, zě hlɔ̌nhlɔ́n towe bǐ dó bló, ɖó kútomɛ fí e a xwe ɔ́, nǔɖé ɖo dɔ̌n bɔ è nɔ wa ǎ; tamɛlinlin ɖě ɖo dɔ̌n ǎ, nǔtunwuntunwun ɖě ɖo dɔ̌n ǎ, nǔnywɛ́ ɖě ɖo dɔ̌n ǎ.

¹¹Un lɛ́ mɔ nǔ ɖěvo ɖěvo ɖo hwe glɔ́ fí. È yi agbahwlɛ́nhwlɛ́n tɛnmɛ ɔ́, wezunkántɔ́ e yá afɔ hú mɛ bǐ é jɛ́n nɔ́ ɖu ɖ'é jí tɛgbɛ ǎ. Mɔ̌ ɖokpó ɔ́, mɛ e dó hlɔ̌nhlɔ́n hú mɛ bǐ é jɛ́n nɔ́ ɖu ɖo ahwan jí tɛgbɛ ǎ. Mɛ e nyí nǔnywɛ́tɔ́ é jɛ́n nɔ́ ɖu nǔ gɔ́ xo tɛgbɛ ǎ. Mɛ e bí é jɛ́n nɔ́ jɛ dɔkun tɛgbɛ ǎ. Mɛ e tunwun nǔ hú mɛ bǐ é kɛ́ɖɛ́ jɛ́n ɖagbe nɔ hun hɔn ná tɛgbɛ ǎ. Đó hwe ɖé lɛ́ɛ nú ɔ́, é nɔ́ nyí ta ɖagbe nú mɛ ɖě, hwe ɖé lɛ́ɛ nú ka nɔ́ nyí ta kúkú nú mɛ ɖě.

¹²Nǔgbó ɔ́, gbɛtɔ́ tunwun nǔ e ɖo te kpɔ́n ɛ é ǎ. Gbɛtɔ́ cí hweví e má mɔ ɖɔ ǎ bó yí byɔ́ mɛ é ɖɔhun; é cí xɛ e nɔ ɖo yiyi wɛ bó nɔ́ yi jɛ mɔ mɛ é ɖɔhun. Ayǐ wɛ gbɛtɔ́ nɔ́ ɖe kpowun bɔ awě nɔ́ wá fyán ɛ.

¹³Un lɛ́ mɔ nǔ ɖěvo dó azɔ̌ e wa wɛ nǔnywɛ́ ɖe ɖo hwe glɔ́ fí ɔ́ wú, bó mɔ ɖɔ nǔnywɛ́ ɔ́, nǔ tají wɛ.

¹⁴Nǔ e un mɔ ɔ́ ɖíe: Toxo kpɛví ɖé tíin bɔ mɛ e ɖ'é mɛ lɛ́ɛ sukpɔ́ ǎ. Axɔ́sú hlɔ̌nhlɔ́nnɔ ɖokpó ká wá tɔ́n ahwan toxo ɔ́; é xá toxo ɔ́, bó kun agbǒdo lɛ́ lɛ̌ dó toxo ɔ́ bǐ.

¹⁵Nya wamamɔnɔ ɖé ká ɖo toxo ɔ́ mɛ bó nyɔ́ nǔ i. Nya énɛ́ ɔ́ hɛn ɔ́, é ná zán nǔnywɛ́ tɔn dó hwlɛ́n toxo ɔ́ gán; lo ɔ́, mɛ ɖěbǔ flín i lɔ, bó ná yi kan nǔɖé byɔ́ ɛ ǎ.

¹⁶Mɛ bǐ gbɛ́ wǎn nú wamamɔnɔ énɛ́ e ɖó nǔnywɛ́ é, bó nɔ́ ɖótó xó tɔn ǎ, có nyɛ ɔ́, un mɔ ɖɔ nǔnywɛ́ nyɔ́ hú hlɔ̌nhlɔ́n.

¹⁷È ɖǒtó xó e ɖɔ wɛ nǔnywɛ́tɔ́ ɖe kpó gbe fífá kpó ɔ́, é nyɔ́ hú è ɖǒtó xó e ɖɔ wɛ gǎnhúnǔtɔ́ ɖe kpó adǎn kpó ɖo xlonɔ lɛ́ɛ tɛ́ntin é.

¹⁸Nǔnywɛ́ nyɔ́ hú ahwanfunnú lɛ́ɛ; lo ɔ́, mɛ e ma nɔ lin tamɛ cóbó nɔ́ wa nǔ ǎ ɖokpó géé nɔ́ hɛn nǔ ɖagbe e nǔnywɛ́ nɔ́ ná mɛ ɔ́ gěgé gblé.