Read fon Hanvíví 1 Bible Online

Hanvíví 1 - fon bible

Hanvíví 1

¹ Han e víví hú han lɛ́ɛ bǐ é. Salomɔ́ɔ sín han wɛ.

²Wǎ kí si nú mì, kí si nú mì bó! Wǎn e a yǐ nú mì ɔ́ nɔ́ mú mì hú vɛ̌ɛn.

³Wǎn towe nyɔ́ se tawun! Nyǐkɔ towe nyí ami wǎnɖagbenɔ ɖé bó gba kpé fí bǐ. Énɛ́ wú wɛ ɖyɔ̌vǐ lɛ́ɛ yí wǎn nú we.

⁴Hɛn alɔ ce bónú mǐ ná kán wezun. Sɛ́mɛɖó ce, kplá mì byɔ́ xɔ towe mɛ. Nǔ ná nyɔ́ nú mǐ, mǐ ná ɖu gbɛ, hwi wɛ ka ná nyí mɔ̌. Mǐ ná kpa susu nú wǎn yíyí towe, é nɔ́ mú mɛ hú vɛ̌ɛn. Đyɔ̌vǐ e yí wǎn nú we lɛ́ɛ sín hwɛ jɔ titewungbe!

⁵Đyɔ̌vǐ Jeluzalɛ́mu tɔn lɛ́ɛ mi, mi ɖótó, un wi, un nyɔ́ ɖɛkpɛ. Un wi Kedáa sín goxɔ lɛ́ɛ ɖɔhun. Un nyɔ́ ɖɛkpɛ xɔmɛgbovɔ e ɖo Salomɔ́ɔ hɔnmɛ lɛ́ɛ ɖɔhun.

⁶Mi ma ké ya nú wi e un wi é ó. Hwesivɔ́ wɛ fyɔ́ mì mɔ̌. Nɔ ce ví súnnu lɛ́ɛ sin xomɛ dó mì; yě sɔ́ mì dó ɖó vǐwunglecɔ́tɔ́. Vǐwungbo nyɛ tɔn ɔ́, nyɛ ba ɖɔ mɛɖé ní cɔ́ ǎ.

⁷Hwi wɛ un yí wǎn ná, ɖɔ fí e a nɔ kplá kanlin towe lɛ́ɛ gbɔn é nú mì; ɖɔ fí e yě nɔ́ ɖu ama gbɔn ɔ́ nú mì; ɖɔ fí e a nɔ kplá yě yi hwemɛ, bɔ yě nɔ́ gbɔjɛ́ ɔ́ nú mì. Énɛ́ ɔ́, un sɔ́ ná ɖo gbě towe mɛ ɖo hǎgbɛ́ towe lɛ́ɛ sín kanlin lɛ́ɛ gúdo ǎ.

⁸Tɔ́nnúhwecí ce, a ma tunwun fí ɔ́ ǎ hǔn, bo dó gbɔ̌ lɛ́ɛ sín afɔ, kplá lɛ̌ngbɔ́ví towe lɛ́ɛ gbɔn fí e lɛ̌ngbɔ́nyitɔ́ lɛ́ɛ dó goxɔ gbɔn é.

⁹Kóɖó ce, a nyɔ̌ kpɔ́n mɛ nya! Un mɔ we ɔ́, sɔ́ ɖɛkpɛ ɖɛkpɛ e nɔ dɔn Ejípu xɔ́sú ɔ́ sín kɛkɛ́ví ɔ́ jɛ́n un nɔ flín.

¹⁰Tógbé e a dǒ lɛ́ɛ ɖe klɛ̌n towe sín ɖɛkpɛ xlɛ́. Kɔjɛ́ towe ɖe kɔ towe sín ɖɛkpɛ xlɛ́.

¹¹Mǐ nǎ bló sikánú nú we, bó bló kpatágan d'é wú téwún téwún.

¹²Hwenu e sɛ́mɛɖó ce ɖo agɔ̌ ɖu wɛ ɔ́, náa e un sá ɔ́ sín wǎn gba kpé.

¹³Wǎnyínámɔ ce cí mǐla mlímlí wǎnɖagbenɔ ɖɔhun nú mì, é cí mǐla mlímlí wǎnɖagbenɔ ɖɔhun ɖo anɔ̌ ce lɛ́ɛ tɛ́ntin bó ɖo gbigbɔ jɛ wɛ.

¹⁴Mɛ e un yí wǎn ná ɔ́, hɛnnɛ́ɛsɛ́ ɖɔhun wɛ é cí nú mì ɖo vǐwungbo mɛ ɖo Eyinu-Gɛdi.

¹⁵Kóɖó ce, a nyɔ̌ ɖɛkpɛ mɛ nya! A nyɔ̌ kpɔ́n tawun. Nukún towe lɛ́ɛ nyɔ́ kpɔ́n ahwannɛ́ ɖɔhun.

¹⁶Wǎnyínámɔ ce, a nyɔ̌ ɖɛkpɛ mɛ! Un mɔ we ɔ́, é nɔ́ víví nú mì! Gběhan wɛ nyí zan mǐtɔn ɖo fí.

¹⁷Sɛ́dlutín lɛ́ɛ wɛ nyí azakpo mǐtɔn; siplɛ́tín lɛ́ɛ wɛ nyí dǒ mǐtɔn.