Read fon Hanvíví 2 Bible Online

Hanvíví 2 - fon bible

Hanvíví 2

¹Nyɛ ɔ́, folówa wɛ nú mì; folówa e nɔ wú ɖo ayǐkúngban wɛnjɛ Calɔ́ni tɔn jí é wɛ nú mì, folówa ɖagbe ɖagbe e nɔ wú ɖo tɔdomɛ ɔ́ wɛ un nyí.

²Un mɔ kóɖó ce ɖo ɖyɔ̌vǐ lɛ́ɛ tɛ́ntin ɔ́, é nɔ́ cí folówa ɖagbe ɖagbe ɖo wunkan tɛ́ntin ɖɔhun.

³Un mɔ wǎnyínámɔ ce ɖo dɔ̌nkpɛ lɛ́ɛ tɛ́ntin ɔ́, é nɔ́ cí atín e è nɔ ɖu sínsɛ́n tɔn ɔ́ ɖo atín e ɖo zungbó mɛ lɛ́ɛ tɛ́ntin ɖɔhun. Xɔ́ntɔn ce ɔ́, un mɔ yɛtɛn tɔn lě ɔ́, ayǐjínjɔ́n jɛ́n nɔ́ jló mì. Sínsɛ́n tɔn nɔ́ víví nu ce kpɔ́n!

⁴Wǎnyínámɔ ce kplá mì yi fí e mǐ ná nu wǎn yíyí mǐtɔn ɖe ɔ́. Wǎn yíyí wɛ nyí hwexɔ́ bɔ é kɛ́ nú mì.

⁵Mi zé vǐwun xúxú mlímlí dó dó hlɔ̌nhlɔ́n lanmɛ nú mì. Mi zé atínsínsɛ́n dó dó wǔsyɛ́n lanmɛ nú mì, ɖó wǎn yíyí dó azɔn mì.

⁶Xɔ́ntɔn ce ní sɔ́ amyɔlɔ tɔn ɖó kɔ nú mì, bó sɔ́ aɖisílɔ tɔn dó dɔn mì dó wǔ.

⁷Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi; mi kpɔ́n dó tɛ́ wú, bó kpɔ́n dó zungbɔ́ wú, bó ma fɔ́n wǎn yíyí ó; mi ma fɔ́n wǎn yíyí cóbónú é ɖésúnɔ ɖó jlǒ tɔn ó.

⁸Un ɖo wǎnyínámɔ ce sín gbe se wɛ. É nɛ́ ja nɛ́. É nɛ́ ɖo só ɖaxó ɖaxó kpó kpɛví kpɛví kpó fán wɛ bó ja nɛ́.

⁹A mɔ wǎnyínámɔ ce ɔ́, a nǎ ɖɔ tɛ́ wɛ; é cí zungbɔ́ví ɖɔhun. Éyɛ́ nɛ́ kó wá nɛ́! É nɛ́ ɖo dǒ mǐtɔn gúdo nɛ́! É ɖo nǔ kpɔ́n sɛ́ dó wɛ gbɔn flɛtɛ́li nu, nukún tɔn lɛ́ɛ ɖo ganjali lɛ́ɛ nu.

¹⁰Wǎnyínámɔ ce ɖɔ xó; é ɖɔ nú mì ɖɔ: “Kóɖó ce, sí te! Sinsinmilinsin ce, bo ka wá bó!

¹¹Jǐ hwenu kó wá yi, jǐ ɖě sɔ́ ɖo jija wɛ ǎ,

¹²din ɔ́, folówa ko kpé to ɔ́ mɛ. Hwenu e han nɔ kpé fí bǐ ɔ́ ɖíe su e; axwá lɛ́ɛ ɖo han ji wɛ gbɔn gle mǐtɔn lɛ́ɛ ta.

¹³Fígi e jɛ nukɔn lɛ́ɛ kó jɛ myǎmyá jí ɖo fígitín lɛ́ɛ jí, vǐwuntín lɛ́ɛ kó gba sɛ́, bó ɖo wǎn ɖe wɛ. Kóɖó ce, sí te! Sinsinmilinsin ce, bo ka wá bó!

¹⁴Ahwannɛ́ ce, sónu mɛ wɛ a yi cí, fí e afɔ ma sixú yi ɖo só ɔ́ jí ǎ ɔ́ wɛ a yi bɛ ta dó, ɖe ta tɔ́n bónú má kpɔ́n nukún towe mɛ, ɖɔ xó bónú má se gbe towe. Gbe towe fá, nukún towe mɛ nyɔ́ kpɔ́n tawun.”

¹⁵Mi wlí ayǐsájɛ énɛ́ lɛ́ɛ nú mǐ, mi wlí kanlin kpɛví kpɛví énɛ́ lɛ́ɛ nú mǐ; yě ɖo vǐwungbo mǐtɔn lɛ́ɛ hɛn gblé wɛ. Vǐwuntín lɛ́ɛ ká kó wlí sɛ́.

¹⁶Wǎnyínámɔ ce ɔ́, ce wɛ é nyí, bɔ nyi lɔ ka nyí étɔn. Amagbo mɛ fí e folówa ɖagbe ɖagbe ɖe é wɛ é nɔ́ kplá gbɔ̌ tɔn lɛ́ɛ gbɔn.

¹⁷Wǎnyínámɔ ce, hwenu e yɛ ná fá ɔ́, hwenu e yɛ ná jɛ ga ɖi jí ɔ́, a nǎ lɛ́ kɔ wá gɔ̌n ce. A nǎ dó wezun tɛ́ ɖɔhun gbɔn só jí só jí, a nǎ dó wezun zungbɔ́ví ɖɔhun gbɔn só tɛnmɛ tɛnmɛ jí.