Read fon Ezayíi 1 Bible Online

Ezayíi 1 - fon bible

Ezayíi 1

¹ Mawu ɖɔ xó nú Ezayíi Amɔ̌si ví ɔ́ ɖo nǔmimɔ mɛ. É ɖɔ xó n'i dó axɔ́súɖuto Judáa tɔn kpó Jeluzalɛ́mu toxo ɔ́ kpó wú. Axɔ́sú Judáa tɔn Oziyási, Yotámu, Akázi kpó Ezekiyási kpó hwenu wɛ é ɖɔ xó ɔ́. Xó e é ɖɔ n'i ɔ́ ɖíe.

²Jǐnukúnsin kpó ayǐkúngban kpó, mi ɖótó mì, mi tɛ́ tó. Mawu Mavɔmavɔ wɛ ɖo xó ɖɔ wɛ: “Un hɛn Izlayɛ́li ví lɛ́ɛ káká bɔ yě su; un kplɔ́n yě. Lo ɔ́, yě fɔ́n gǔ dó jǐ ce.

³Nyibú nɔ́ tunwun mɛ e ɖó e é, tócí nɔ́ tunwun mɛ e nɔ ná nǔɖuɖu i é. Lo ɔ́, Izlayɛ́li ví lɛ́ɛ tunwun mì ǎ, togun ce Izlayɛ́li mɔ nǔ jɛ nǔɖé wú ǎ.”

⁴Heelú we akɔta hwɛhutɔ́, togun hwɛgban ɖo tanánɔ, mɛdídá kúnkan; vǐ gblégblé wɛ mi nyí, mi jó Mawu Mavɔmavɔ dó. Mi gbɛ́ wǎn nú Mɛ Mímɛ́ Izlayɛ́li tɔn ɔ́, mi dó gǔdo e.

⁵Ée mi ka fɔ́n ɔ́, mi nɔ ɖo gǔ fɔ́n wɛ ɔ́, fítɛ́ mi ka jló ɖɔ Mawu ní lɛ́ dó nǔ mi dó? Ta mitɔn bǐ wɛ kó nyí akpa, bɔ ayi mitɔn lɔ ko xo akpa.

⁶Sín afɔ káká yi ta ɔ́, nǔɖé sɔ́ ɖo ganjí ɖo mi wú ǎ; akpa wɛ kpé fí bǐ nú mi, wǔtu mitɔn bǐ wɛ nylɔ́ wi, bɔ agadá kpé fí bǐ vannyaa; mɛ ɖé ɖe bó ná klɔ́ ǎ; mɛ ɖé ɖe bó ná blá ǎ, mɛ ɖé ká ɖe bó ná ɖó ami mɛ ǎ.

⁷To mitɔn gba; toxo mitɔn lɛ́ɛ ji zo. Toɖévomɛnu lɛ́ɛ nɔ́ bɛ́ jinukún mitɔn lɛ́ɛ ɖo nukún mitɔn mɛ. To ɔ́ jɛ vɔ̌ ahwangbamɛ ɖɔhun.

⁸Sinyɔ́ɔ toxo ɔ́ kɛ́ɖɛ́ wɛ kpo ɖo te; é cí goxɔ e ɖo vǐwungbo mɛ é ɖɔhun, é cí azava e ɖo cɛ́gbákan mɛ é ɖɔhun, é cí toxo e kɛntɔ́ xá é ɖɔhun.

⁹ Ényí Mawu Mavɔmavɔ Nǔbǐwúkpétɔ́ ɔ́ má kó jó mɛɖé lɛ́ɛ dó nyi gbɛ ɖo mǐ mɛ ǎ ɔ́, mǐ nǎ kó cí Sodɔ́mu toxo ɔ́ ɖɔhun, mǐ nǎ kó ɖo Gomɔ́ɔ toxo ɔ́ ɖɔhun égbé din.

¹⁰Mi Sodɔ́mu gán e mi, mi ɖótó xó e ɖɔ wɛ Mawu Mavɔmavɔ ɖe é. Mi Gomɔ́ɔ togun e mi, mi wlí tó Mawu Mavɔmavɔ mǐtɔn sín nǔkplɔ́nmɛ lɛ́ɛ wú.

¹¹ Mawu Mavɔmavɔ ɖɔ: “Vɔ̌ tobutóbú e sá nú mì wɛ mi nɔ ɖe lɛ́ɛ ɔ́, étɛ́ un nǎ dó wa? Agbo e mi nɔ dó sá vɔ̌ e è nɔ dó zo ɔ́ ná nú mì lɛ́ɛ, kpó nyibúví sín jǒ e mi nɔ xwlé mì lɛ́ɛ bǐ kpó kpé kɔ nú mì. Nyibúsú kpó lɛ̌ngbɔ́ví kpó, kpó gbǎgbá kpó sín hun sɔ́ nɔ́ dó xomɛhunhun nú mì ǎ.

¹²Nyi wɛ ɖɔ nú mi ɖɔ mi ní wá xwé ce gbe bɔ mi nɔ wá ɖo kɔ́xo ce ta gbídí wɛ a?

¹³Mi ma sɔ́ hɛn nǔɖé bó wá ná mì ó, nǔ yǎyá wa wɛ mi ɖe. Mi ma sɔ́ xwlé zǎlínkpɔ́n ɖě mì ó, é nɔ vɛ́ mɔ nú mì. Sunwájǐxwe, gbɔjɛzán xwe, abǐ sinsɛn sín xwe e mi nɔ ɖu lɛ́ɛ nɔ́ nyɔ́ mɔ nú mì ǎ. Mi ná kplé bó ɖo sinsɛn mì wɛ, bó ká ná ɖo dǎka xo wɛ ɔ́, un sixú yí gbe ǎ.

¹⁴Un gbɛ́ wǎn nú sunwájǐxwe mitɔn kpó sinsɛn nǔwiwa mitɔn lɛ́ɛ kpó; agban wɛ yě nyí ɖo kɔ jí nú mì, bɔ hinhɛn tɔn cikɔ nú mì.

¹⁵Mi sɔ́ alɔ dó jǐ bó ɖo ɖɛ na xó wɛ ɔ́, un nɔ ɖó kɔ mi wú ǎ, mi ɖo ɖɛ ɖě ɖo ɖě jǐ lɛ́ɛ xo wɛ ɔ́, un nɔ ɖótó mi ǎ, ɖó gbɛtɔ́ kanjɔ ɖo alɔ nú mi.

¹⁶Mi lɛ miɖée sín nǔ nyanya wiwa mɛ, mi slá wǔ, mi ma sɔ́ xo dǎka ɖě ɖo nukún ce mɛ ó, mi jó nǔ nyanya wiwa dó.

¹⁷Mi kplɔ́n nǔ ɖagbe wiwa, mi nɔ xwedó hwɛjijɔ; mi gbɛ́ nǔ nú mɛ e ɖo mɛ táfú wɛ ɔ́, mi wa nǔ ɖó sɛ́nxwi jí xá tɔ́cyɔvǐ, mi jɛ ahwan asúkúsi jí.”

¹⁸Mawu Mavɔmavɔ ɖɔ: “Mi wá nú mǐ nǎ se nǔ jɛ mǐɖée gbe mɛ. Ényí hwɛ mitɔn lɛ́ɛ na bo myá cɛ́cɛ́ ɔ́, yě ná wé tété avɔkanfún ɖɔhun. Yě ná bó myá káká bó wi d'é mɛ ɔ́, yě ná wé la ɖɔhun.

¹⁹Ényí mi ɖó jlǒ ɖagbe bo se tónú nú mì ɔ́, mi ná ɖu nǔ ɖagbe e ɖo to ɔ́ mɛ lɛ́ɛ.

²⁰Lo ɔ́, ényí mi gbɛ́, bó ɖo gǔ fɔ́n dó nyɛ Mawu Mavɔmavɔ jí wɛ ɔ́, ahwan wɛ ná gba mi.” Nyɛ Mawu Mavɔmavɔ wɛ kɛ nu bó ɖɔ mɔ̌.

²¹Étɛ́ o, Jeluzalɛ́mu toxo e ɖo gbejí ɔ́ wɛ húzú agalɛtɔ́ mɔ̌ a? Đ'ayǐ ɔ́, nǔ jlɔ́jlɔ́ kɛ́ɖɛ́ wɛ è nɔ wa ɖo toxo énɛ́ ɔ́ mɛ, hwɛjijɔ kɛ́ɖɛ́ wɛ mɛ lɛ́ɛ nɔ xwedó ɖo toxo énɛ́ ɔ́ mɛ; amɔ̌, égbé din ɔ́, mɛhutɔ́ lɛ́ɛ sín nɔtɛn wɛ é nyí.

²²Jeluzalɛ́mu, kpatágan towe húzú zunkɔ́, vɛ̌ɛn towe ɖagbe ɖagbe ɔ́, è kɔn sin d'é jí.

²³Gǎn towe lɛ́ɛ ɔ́, gǔfɔ́ntɔ́ wɛ nú yě, yě nɔ́ nɔ awo mɛ nú ajotɔ́ lɛ́ɛ. Nǔwlóɖutɔ́ wɛ nú yě, nǔ ɖu ɖo nǔ mɛ ba wɛ jɛ́n yě nɔ́ ɖe. Yě nɔ́ táfú tɔ́cyɔvǐ lɛ́ɛ, yě nɔ́ ɖótó hwɛ e jɛ nú yě wɛ asúkúsi ɖe é ǎ.

²⁴Énɛ́ ɔ́ wú wɛ Aklúnɔ, Mawu Mavɔmavɔ Nǔbǐwúkpétɔ́, Mawu hlɔ̌nhlɔ́nnɔ Izlayɛ́li tɔn ɔ́ ɖɔ: “Éénɛ́! Din ɔ́, mɛ e ma ɖo jǐ ce ǎ lɛ́ɛ ɔ́, un ná wa nǔ xá yě bɔ xo ce mɛ ná fá; un ná wa nǔ xá kɛntɔ́ ce lɛ́ɛ dó ba hlɔn.

²⁵Jeluzalɛ́mu, alɔ ce ná lɛ́ jɛ wǔ we; un ná zé zo dó slá wǔ nú we, lě e è nɔ xo zo dó gan bó nɔ́ ɖe nǔ kwíji kwíji sín mɛ ɔ́ ɖɔhun; un ná ɖe ɖɛ zunkɔ́ towe lɛ́ɛ bǐ.

²⁶Un ná zé hwɛɖɔtɔ́ towe lɛ́ɛ dó húzú hwɛɖɔtɔ́ ɖ'ayǐ tɔn lɛ́ɛ, un ná zé azaglɔ́gán towe lɛ́ɛ dó húzú azaglɔ́gán xóxó tɔn lɛ́ɛ; énɛ́ ɔ́, è nǎ nɔ́ ylɔ́ we ɖɔ ‘Toxo hwɛjijɔ tɔn’ ‘Toxo gbejínɔtɔ́.’ ”

²⁷Mawu ná zé hwɛjijɔ tɔn dó hwlɛ́n Sinyɔ́ɔ gán, bɔ mɛ e ɖo Sinyɔ́ɔ bó lɛ́ kɔ sín hwɛ yětɔn gúdo lɛ́ɛ bǐ ná mɔ hwlɛngán.

²⁸Lo ɔ́, è nǎ gblé gbɛ dó nú gǔfɔ́ntɔ́ lɛ́ɛ kpó hwɛhutɔ́ lɛ́ɛ kpó zɛ̌nzɛ̌n, bɔ mɛ e jó Mawu Mavɔmavɔ dó lɛ́ɛ tɔn ná fó.

²⁹Nǔ e mi yí wǎn nú atín ɖaxó ɖaxó énɛ́ lɛ́ɛ dó wa ɔ́, mi ná dán ɛ; jikpá énɛ́ lɛ́ɛ e mɛ mi nɔ yi wa sinsɛn nú mitɔn lɛ́ɛ ɖe ɔ́ ná nyí winnyá nú mi.

³⁰Mi ná cí atín e mlú ɖa é ɖɔhun, mi ná cí jikpá e ba sin kpo é ɖɔhun.

³¹Súnnu glegbenu ná cí nǔywɛ́ ɖɔhun, bɔ nǔwiwa tɔn ná cí myɔkán ɖɔhun, bó ná dó nǔywɛ́ ɔ́ zo, bɔ yě mɛ we lɛ́ɛ bǐ ná ji bɔ mɛ e ná cí é ná ɖe ǎ.