Read fon Ezayíi 11 Bible Online

Ezayíi 11 - fon bible

Ezayíi 11

¹ Atínta Jɛsée[5] tɔn ná tɔ́n ama; ɖɔ tɔn ná tɔ́n kun.

²Yɛ Mawu Mavɔmavɔ tɔn ná nɔ jǐ tɔn; yɛ e nɔ ná nǔnywɛ́ mɛ, bó nɔ́ ná nukúnnú mɔ jɛ nǔ mɛ mɛ é wɛ; yɛ e nɔ ɖe wě xá mɛ, bó nɔ́ ná hlɔ̌nhlɔ́n e è nǎ dó bló ná ɔ́ mɛ é wɛ; yɛ e nɔ zɔ́n bɔ è nɔ tunwun Mawu Mavɔmavɔ, bó nɔ́ ɖó sísí n'i é wɛ.

³Sísí ɖó nú Mawu Mavɔmavɔ ná nɔ́ hun xomɛ n'i; é nɔ́ kpɔ́n lě e è ɖe ɔ́ dó ɖɔ hwɛ xá mɛ ǎ, é ko se xó ɖé kpowun ɔ́, é nɔ́ zé dó ɖɔ hwɛ ǎ.

⁴ É nɔ́ dó hwɛjijɔ nú wamamɔnɔ; hwɛjijɔ wɛ é nɔ́ xwedó dó ɖɔ hwɛ xá mɛ e ma ɖó mɛɖé ǎ é; xó tɔn cí kpo ɖɔhun, bɔ é ná dó xo to ɔ́, xó e ná tɔ́n sín nu tɔn mɛ ɔ́ wɛ ná hu mɛdídá.

⁵ Hwɛjijɔ kpó gbejíninɔ kpó ná cí gǒjíblánú ɖɔhun n'i, gǒjíblánú e nɔ́ ɖo alinkan nú mɛ hwebǐnu ɔ́ ɖɔhun n'i.

⁶ Énɛ́ ɔ́, hla ná nɔ kpɔ́ xá lɛ̌ngbɔ́ví, bɔ kpɔ kpó gbɔ̌ví kpó ná dɔ́ kpɔ́. Nyibúví kpó kinnikínníví kpó ná ɖu nǔ ɖó kpɔ́, bɔ yɔkpɔ́vú ɖokpó ná nɔ́ kplá yě.

⁷Nyibú asi kpó lɔnmɔ asi kpó ná zun xɔ́ntɔn; vǐ yětɔn lɛ́ɛ ná nɔ́ dɔ́ fí ɖokpó ɔ́. Kinnikínní ná nɔ́ ɖu gběhan nyibú ɖɔhun.

⁸Yɛ̌yɛ́ví ná da ayihún ɖo amanɔnú jakpata sín do mɛ; yɔkpɔ́vú ná dó alɔ do e mɛ amanɔnú jakpata ɖe é.

⁹ È nǎ wa nǔ nyanya ɖěbǔ ǎ, è nǎ hɛn nǔ ɖěbǔ gblé ɖo só mímɛ́ tɔn jí ǎ, ɖó Mawu Mavɔmavɔ tunwuntunwun ná gɔ́ to ɔ́, lě e sin gɔ́ xuzan jí é ɖɔhun.

¹⁰ Gbe énɛ́ gbe ɔ́, Jɛsée ví ɔ́ ná cí asyá e è tun te ɔ́ ɖɔhun nú togun e ɖo gbɛ ɔ́ mɛ lɛ́ɛ bǐ. Akɔta lɛ́ɛ ná nɔ́ wá ɖó xó te n'i, bó ná nɔ́ se xó ɖo nu tɔn, bɔ susu Mawu tɔn ná hɔ́n ɖo fí e é ɖe ɔ́.

¹¹Gbe énɛ́ gbe ɔ́, Aklúnɔ ná lɛ́ vɔ́ zán hlɔ̌nhlɔ́n tɔn, bó ná xɔ gbɛ nú mɛ e kpo ɖo gbɛ ɖo togun tɔn mɛ lɛ́ɛ: é ná xɔ gbɛ nú mɛ e kpo ɖo gbɛ ɖo Asilíi lɛ́ɛ, mɛ e kpo ɖo gbɛ ɖo Ejípu lɛ́ɛ, mɛ e kpo ɖo gbɛ ɖo Patlɔ́si lɛ́ɛ, mɛ e kpo ɖo gbɛ ɖo Nubíi lɛ́ɛ, mɛ e kpo ɖo gbɛ ɖo Elámu lɛ́ɛ, mɛ e kpo ɖo gbɛ ɖo Babilɔ́nu lɛ́ɛ, mɛ e kpo ɖo gbɛ ɖo Hamáti lɛ́ɛ, kpó mɛ e kpo ɖo gbɛ ɖo tɔtɛ́ntinto mɛ lɛ́ɛ kpó.

¹²É ná zé asyá ɖokpó dó jǐ, bó ná xlɛ́ akɔta énɛ́ lɛ́ɛ ɖɔ émí ná kplé Izlayɛ́li ví e ahwan wlí yi toɖěvo mɛ lɛ́ɛ, kpó Judáanu e gba kpé wɛ̌kɛ́zo ɛnɛ lɛ́ɛ mɛ lɛ́ɛ kpó.

¹³Énɛ́ ɔ́, wǔ e hwan dó Judáa wɛ Eflayímu ɖe ɔ́ ná fó, bɔ è nǎ sú kɛntɔ́ Judáa tɔn lɛ́ɛ sín kún dó. Eflayímu sɔ́ ná hwan wǔ dó Judáa ǎ, bɔ Judáa sɔ́ ná nyí Eflayímu kɛntɔ́ ǎ.

¹⁴Yě bǐ ná zɔn kpɔ́, bó zun dó Filisitɛ́ɛn lɛ́ɛ jí ɖo gbadahwe jí, bó ná lɛ́ zɔn kpɔ́ bó yi fɔ akɔta e ɖo gbětótló mɛ lɛ́ɛ sín nǔ ɖo zǎnzǎnhwe jí. Yě ná gbló ada nú acɛkpikpa yětɔn yi Edɔ́mu kpó Mɔwabu kpó, bɔ Amumɔ́ɔ ví lɛ́ɛ ná nɔ acɛ yětɔn mɛ.

¹⁵ Mawu Mavɔmavɔ ná hɛn Xu Vɔvɔ ɔ́ xú. É ná zé alɔ dó jǐ dó ɖe gbe dó Efláti tɔ ɔ́. Funfún tɔn sín hlɔ̌nhlɔ́n ná má tɔ ɔ́, bɔ é ná húzú tɔhwín tɛ́nwe, bɔ è nǎ zɔn afɔ gbɔn mɛ dín.

¹⁶Ali ɖokpó ná ɖo te nú mɛ e kpo ɖo gbɛ ɖo togun tɔn mɛ ɖo Asilíi lɛ́ɛ, lě e ali ɖokpó ɖo te nú Izlayɛ́li ví lɛ́ɛ hwenu e yě gosín Ejípu é.