Read fon Ezayíi 22 Bible Online

Ezayíi 22 - fon bible

Ezayíi 22

¹Xó e Mawu ɖɔ dó Nǔɖexlɛ́mɛ tɔdo ɔ́ wú é ɖíe: Jeluzalɛ́mu! Nɛ̌ ká gbɔn nú we? Étɛ́wú toví towe lɛ́ɛ bǐ xá xɔ ta?

²Étɛ́wú axi ɖo jijɛ wɛ mɔ̌? Étɛ́wú a ɖo xó sú wɛ mɔ̌? Étɛ́wú a ɖo agbojlaka ɖú wɛ mɔ̌? Mɛ towe e kú lɛ́ɛ ɔ́, é nyí ahwan wɛ hu yě ǎ, ahwangbénu wɛ yě kú ɖe ǎ.

³Ahwangán towe lɛ́ɛ bǐ hɔn, gǎdatɔ́ lɛ́ɛ da gǎ vɔ́vɔ́ có bó wlí yě ǎ. Yě mɛ e wú kɛntɔ́ xwedó lɛ́ɛ bǐ wɛ é wlí dó gan; é wlí yě káká jɛ mɛ e hɔn yi zɔ lɛ́ɛ jí.

⁴Énɛ́ ɔ́ wú wɛ un ɖɔ nú mi ɖɔ: “Mi ma ɖɔ émí ná ɖó kɔ wǔ ce ó, mi jó mì dó nú má ya avǐ nú é ná jɛ mɛ nú mì. Mi ma ɖɔ émí ná ɖó alɔ akɔ́n jí nú mì, ɖó awě ɖaxó e xo togun ce ɔ́ wú ó.

⁵Đó égbé din ɔ́, Aklúnɔ, Mawu Mavɔmavɔ Nǔbǐwúkpétɔ́ ɔ́ dó hunnyahunnya mǐ mɛ, mǐ j'ayǐ ɖo ahwan nukɔn; mǐ sɔ́ tunwun lě e mǐ nǎ wa nǔ gbɔn é ǎ.” Zǐngídi e ɖo Nǔɖexlɛ́mɛ tɔdo ɔ́ mɛ é syɛ́n ɖésú. È nɔ sú xó bó nɔ́ byɔ́ alɔgɔ́ sɛ́ dó só lɛ́ɛ ta.

⁶Sɔ́ja Elámu tɔn lɛ́ɛ hɛn da kpó gǎ kpó, mɛ ɖě ɖo ahwankɛkɛ́ví mɛ, mɛ ɖě ɖo sɔ́ jí, bɔ sɔ́ja Kíi tɔn lɛ́ɛ ɖe gǎglónú yětɔn lɛ́ɛ tɔ́n.

⁷Jeluzalɛ́mu! Ahwankɛkɛ́ví kpé tɔdo towe e nyɔ́ ɖɛkpɛ hú tɔdo lɛ́ɛ bǐ é mɛ. Sɔ́xátɔ́ lɛ́ɛ sí ahwan te ɖo toxo ɔ́ sín hɔntogbó jí.

⁸Judáa sɔ́ ɖó nǔ e wú é ná gán jɛ é ɖěbǔ ǎ. Gbe énɛ́ gbe ɔ́, mi ɖó nukún ahwanfunnú e ɖo xɔ e è nɔ ylɔ́ ɖɔ “Zungbó ɔ́” mɛ lɛ́ɛ.

⁹Mi mɔ ali e è tɔ́n dó ahohó e è mɛ lɛ́ lɛ̌ dó Davídi toxo ɔ́ mɛ lɛ́ɛ. Mi ɖó sin kpasin dó sindo e ɖo do ɔ́ mɛ.

¹⁰Mi xa xwé e ɖo Jeluzalɛ́mu lɛ́ɛ, bó gba ɖě dó yi ná hlɔ̌nhlɔ́n ahohó ɔ́.

¹¹Mi kun do ɖokpó ɖó ahohó we lɛ́ɛ tɛ́ntin, bónú sin e ná sa sín sindo xóxó ɔ́ mɛ é ná kɔn d'é mɛ. Mi ka flín mɛ e zɔ́n bɔ nǔ énɛ́ lɛ́ɛ ɖo mi gbo wɛ é ǎ. É ɖo nǔ tɔn sɔ́ wɛ ɔ́, é kó lín, lo ɔ́, mi mɔ ɛ ǎ.

¹²Gbe énɛ́ gbe ɔ́, Aklúnɔ, Mawu Mavɔmavɔ Nǔbǐwúkpétɔ́ ɔ́ byɔ́ mi ɖɔ mi ní ya avǐ, mi ní dó gbɛvíhan, mi ní xwlɛ́ ta, mi ní dó nǔwamɛ vɔ.

¹³ Lo ɔ́, mi bló gbɔn mɔ̌ ǎ; mi ɖo awǎ jɛ wɛ, bó ɖo gbɛ ɖu wɛ: è ɖo nyibú hu wɛ, bó ɖo gbɔ̌ hu wɛ, è ɖo lan ɖu wɛ, bó ɖo vɛ̌ɛn nu wɛ... Mi nɔ ɖɔ: “Mi nú mǐ nǎ ɖu nǔ bó nu ahan, ɖó sɔ ɔ́ mǐ nǎ kú.”

¹⁴Amɔ̌, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Un xwlé nyǐkɔ ce nú mi, nǔ énɛ́ e mi wa nyi do ɔ́, un ná sɔ́ kɛ mi có mi ná kú ǎ.” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é nɛ́.

¹⁵Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Yi mɔ Cevúna nǔjíkpɔ́ntɔ́ e kpa acɛ dó hɔnmɛ nu é, bó ɖɔ n'i ɖɔ:

¹⁶A kun yɔdo nú hwiɖée ɖó fí, a kun ɖó aga ɖéé, a kun nɔtɛn ɖokpó dó sóxo mɛ; ayǐkúngban tɛ́ a ɖǒ ɖo fí? Hɛ̌nnumɔ towe tɛ́ wɛ nyí fí nu?

¹⁷A mɔ ɖɔ émí dó hlɔ̌nhlɔ́n; Mawu Mavɔmavɔ ná sɔ́ we nyi dó gbě ɖo cɛ́jú mɛ; é ná xásá kan dó we,

¹⁸bó ná nyi we, bɔ a nǎ blí bɔ̌lu ɖɔhun gbɔn to gblogblo ɖé mɛ, bó ná kú jɛ fínɛ́; hwi mɛ e ɖo hɛ̌n dó gǎn towe xwé wɛ ɔ́, fínɛ́ wɛ hwi kpó ahwankɛkɛ́ví towe ɖagbe ɖagbe lɛ́ɛ kpó ná dɔn cí.

¹⁹Mawu ɖɔ: Un ná ɖe we sín azɔ̌ towe kɔn, un ná nya we sín tɛn towe mɛ.

²⁰Gbe énɛ́ gbe ɔ́, un ná ylɔ́ mɛsɛntɔ́ ce Eliyakímu Ilukyahu ví ɔ́.

²¹Un ná zé azɔ̌wu towe dó n'i, un ná sin gǒjíblánú towe dó alin n'i. Un ná zé acɛ e a ɖǒ ɔ́ n'i. É ná nyí tɔ́ nú Jeluzalɛ́munu lɛ́ɛ; é ná nyí tɔ́ nú axɔ́súɖuto Judáa tɔn ɔ́ bǐ.

²² Un ná zé Davídi xwé ɔ́ sín cávi dó alɔ mɛ n'i. É hun hɔn ɖé ɔ́, mɛ ɖěbǔ ná sú ǎ; é sú hɔn ɖé ɔ́, mɛ ɖěbǔ ná hun ǎ.

²³Un ná xwe e só ɖɔhun, ɖó fí e syɛ́n ganjí é. É ná nyí wi bó nɔ ta nú daá tɔn xwé.”

²⁴Mɛ e ɖo hɛ̌n tɔn nu lɛ́ɛ bǐ ná nyí agban bo nɔ kɔ tɔn: mɛ e ɖo xwé é kpó mɛ e ɖo gle é kpó bǐ ná nyí agban bó nɔ kɔ tɔn. É ná cí só e è xwe bó fɔ gannú kpó basya kpó zɛ̌n kpó bǐ kplá kɔ é ɖɔhun. Agban tawun wɛ mɛ!

²⁵Mawu Mavɔmavɔ Nǔbǐwúkpétɔ́ ɔ́ ɖɔ: “Ayǐ ɖokpó ná wá hɔ́n, bɔ só ɔ́ ná sún j'ayǐ. È xwe e dó fí e syɛ́n ganjí é có é ná sún. É ná sún j'ayǐ, bɔ agban e ɖo kɔ tɔn lɛ́ɛ ná jɛ ayǐ bó gba hánnyá.” Xó e Mawu Mavɔmavɔ ɖɔ é nɛ́.