Read fon Ezayíi 24 Bible Online

Ezayíi 24 - fon bible

Ezayíi 24

¹Éɖíe! Mawu Mavɔmavɔ ná hɛn ayǐkúngban ɔ́ gblé; ayǐkúngban ɔ́ ná húzú gbětótló. Mawu Mavɔmavɔ ná kíjá nǔ e ɖo ayǐkúngban jí é bǐ, é ná gba mɛ e ɖo ayǐkúngban jí lɛ́ɛ dó.

²Nǔ ɖokpó ɔ́ wɛ ɖo te kpɔ́n vɔ̌sánú-xwlémawutɔ́ kpó mɛ e nɔ dó alɔ ɛ é kpó, gǎn kpó mɛsɛntɔ́ kpó, nyɔ̌nu xwési kpó vǐ ɖo mɛ gɔ́n kpó, nǔsatɔ́ kpó nǔxɔtɔ́ kpó, akwɛ́satɔ́ kpó akwɛ́nyatɔ́ kpó, axɔ́tɔ́nɔ kpó axɔ́ɖutɔ́ kpó.

³To ɔ́ ná gba hánnyá, è nǎ fin nǔ e ɖo to ɔ́ mɛ lɛ́ɛ bǐ. Gbeta e Mawu Mavɔmavɔ ɖe tɔ́n é nɛ́.

⁴Ayǐkúngban ɔ́ ɖo aluwɛ mɛ, ayǐkúngban ɔ́ ɖo gblěgblé wɛ. Gbɛ ɔ́ sɔ́ ɖo gbɛ ganjí ǎ. Gbɛ ɔ́ ɖo gblěgblé wɛ. Ayǐkúngban sɔ́ nyí ayǐkúngban ǎ. Jǐnukúnsin lɔ sɔ́ nyí jǐnukúnsin ǎ.

⁵Gbɛtɔ́ lɛ́ɛ ɖu su nú ayǐkúngban ɔ́ ɖó yě gba sɛ́n; yě hɛn nǔ e Mawu to lɛ́ɛ gba; yě hɛn akɔ mavɔ mavɔ e Mawu jɛ xá yě ɔ́ gba.

⁶Énɛ́ wú wɛ Mawu dó nu ayǐkúngban ɔ́, bɔ nǔ e ɖ'é jí lɛ́ɛ sú kún dó, bɔ gbɛtɔ́ lɛ́ɛ ɖo nǔ e yě wa ɔ́ sín sin sún wɛ? Yě kú, bɔ é sɔ́ kpo mɛ nabí ɖé ǎ.

⁷Vɛ̌ɛn yɔ̌yɔ́ ɖo mimɛ wɛ, vǐwungbo lɛ́ɛ jɛ jeké. Din ɔ́, gbɛɖutɔ́ lɛ́ɛ bǐ ɖo azɔn wɛn wɛ.

⁸Hǔn e xo wɛ è nɔ ɖe, bɔ awǒbóbó nɔ ɖ'é nu ɔ́ nyí kplówún. Ayihún e da wɛ è nɔ ɖe, bɔ xósúsú nɔ ɖ'é nu ɔ́ fó. Kanhún e xo wɛ è nɔ ɖe, bɔ awǒbóbó nɔ ɖ'é nu ɔ́ nyí kplówún.

⁹Mɛ ɖé sɔ́ ná ɖo han ji wɛ bó ɖo vɛ̌ɛn nu wɛ ǎ; ahan syɛ́nsyɛ́n ná vlɛ́ nu nú ahannutɔ́ lɛ́ɛ.

¹⁰Toxo e mɛ bǐ hɔn jó dó ɔ́ ɖo gblěgblé wɛ. È sú xwé lɛ́ɛ bǐ, mɛɖé sɔ́ nɔ́ byɔ́ xwé lɛ́ɛ gbe ǎ.

¹¹Mɛ bǐ ɖo vo sa wɛ ɖó vɛ̌ɛn vɔ. Awǎjijɛ bǐ yi xɔ. Xomɛhunhun ɖěbǔ sɔ́ ɖo to ɔ́ mɛ ǎ.

¹²Nǔ e ɖo toxo ɔ́ mɛ lɛ́ɛ bǐ gblé, toxo ɔ́ sín hɔntogbó lɛ́ɛ bǐ wɛ fɛ́n kɔn nyi kɔ́ mɛ.

¹³Nǔ nabí ɖé sɔ́ ná kpo ɖo togun lɛ́ɛ mɛ ɖo ayǐkúngban ɔ́ jí ǎ; é ná cí lě e è nɔ gbɛ olívu, bɔ é nɔ kpo ɖokpó ɖokpó ɖ'é jí é ɖɔhun; é ná cí lě e è nɔ gbɛ vǐwun, bɔ é nɔ kpo ɖokpó ɖokpó ɖ'é jí é ɖɔhun.

¹⁴Mɛ ɖokpó ɖokpó e kpo ɖo gbɛ lɛ́ɛ ɖo susu kpa nú Mawu Mavɔmavɔ wɛ, bó ɖo xó sú wɛ kpó awǎjijɛ kpó sín gbadahwe jí.

¹⁵Yě nɔ́ ɖɔ: “Mi mɛ e ɖo zǎnzǎnhwe jí lɛ́ɛ mi! Mi kpa susu nú Mawu Mavɔmavɔ! Mi mɛ e ɖo xutó xutó lɛ́ɛ mi! Mi xomlá nyǐkɔ tɔn bó ɖɔ Mawu Mavɔmavɔ wɛ nyí Mawu Izlayɛ́li tɔn.”

¹⁶Mǐ se bɔ è ɖo han jí wɛ sín fí e gbɛ ɔ́ kponu ɖó é. Han ɔ́ ɖɔ: “Susu nú Mawu hwɛjijɔnɔ!” Lo ɔ́, nyɛ ɔ́, un nɔ ɖɔ: “Gbɛ ce vɔ, gbɛ ce vɔ! Awě tɛ́ ɖíe xo mì e!” Mɛsaɖutɔ́ lɛ́ɛ ɖo mɛ sa ɖu wɛ, yě ɖo kan ván d'é wú wɛ ɖésú.

¹⁷Mi mɛ e ɖo gbɛ ɔ́ mɛ lɛ́ɛ ɔ́, nǔ e ɖo te kpɔ́n mi lɛ́ɛ ɖíe: xɛsi ɖaxó ɖo te kpɔ́n mi, kɔ́do ɖo te kpɔ́n mi, mɔ ɖo te kpɔ́n mi.

¹⁸Nú xɛsi jɛ mɛɖé jí bónú mɛ ɔ́ hɔn ɔ́, é ná yi jɛ kɔ́do mɛ; nú é tɛ́nkpɔ́n bó tɔ́n ɔ́, é ná yi jɛ mɔ mɛ. È nǎ hun hɔn nú sin e ɖo jǐnukúnsin é, bɔ ayǐkúngban ɔ́ sín dodó ná húnhún.

¹⁹Ayǐkúngban ɔ́ ná zɛ, é ná gba, é ná dán wǔ.

²⁰Ayǐkúngban ɔ́ ná nɔ́ fún sa ahannumúnɔ ɖɔhun; é ná nɔ́ dán jɔhɔn dó alɔ azava mɛ ɖɔhun. Hwɛgban tɔn lɛ́ɛ ɖo kpinkpɛn ɛ wɛ; é ná jɛ ayǐ bó sɔ́ ná fɔ́n gbeɖé ǎ.

²¹Gbe énɛ́ gbe ɔ́, Mawu Mavɔmavɔ ná dɔn tó nú nǔɖíɖó e ɖo jǐxwé lɛ́ɛ, bó ná dɔn tó nú axɔ́sú e ɖo ayǐkúngban jí lɛ́ɛ.

²²É ná kplé yě bǐ dó do mɛ; è nǎ bɛ́ yě bǐ sú dó gankpá mɛ. Yě ná nɔ fínɛ́ sɛ yi bó ná wá hwɛ nukɔn.

²³Wun ná kpɛn sun, winnyá ná hu hwe. Mawu Mavɔmavɔ Nǔbǐwúkpétɔ́ ɔ́ wɛ ná ɖu axɔ́sú ɖo Sinyɔ́ɔ só ɔ́ jí, é wɛ ná ɖu axɔ́sú ɖo Jeluzalɛ́mu. Susu tɔn ná hɔ́n dó mɛ e ɖo togun tɔn nu lɛ́ɛ jí.