Read fon Ezayíi 25 Bible Online

Ezayíi 25 - fon bible

Ezayíi 25

¹Mawu Mavɔmavɔ, hwi wɛ nyí Mawu ce; un jló ná sɔ́ we su, un jló ná ji han dó kpa susu nú nyǐkɔ towe, ɖó a blǒ nǔ ɖagbe ɖagbe gěgé. Nǔ énɛ́ lɛ́ɛ ɖe din ɔ́, é kó lín, bɔ è hɛn ɔ́, è nǎ ɖeji dó yě wú.

²A zě toxo ɔ́ dó húzú awǐnnyaglo kɛ́ɖɛ́. A gba toxo e è mɛ ahohó lɛ́ lɛ̌ dó ɔ́ hánnyá. Jǒnɔ lɛ́ɛ sín toxo e è mɛ ahohó lɛ́ lɛ̌ dó ɔ́ sɔ́ hwɛ́n toxo ǎ; è sɔ́ sixú vɔ́ gbá gbeɖé ǎ.

³Énɛ́ wú wɛ togun syɛ́nsyɛ́n ɖokpó ná sí te, bó kpa susu nú we. Akɔta e nɔ kpa acɛ gannaganna nú mɛ lɛ́ɛ sín toxo lɛ́ɛ ná nɔ́ ɖó sísí nú we,

⁴ɖó mɛ e ma ɖó gǎn ɖé ǎ lɛ́ɛ ɔ́, hwi wɛ nyí bibɛtɛn yětɔn. Nǔgbó wɛ, ényí adǎn gbo mɛ e ma ɖó mɛɖé ǎ lɛ́ɛ ɔ́, hwi wɛ yě nɔ́ hɔn wá su. Hwi wɛ nyí fí e è nɔ bɛ sin ɖe é. Hwesivɔ́ hun ɔ́, hwi glɔ́ wɛ è nɔ wá bɛ yɛ ɖe, ɖó adǎn e jí acɛgannaganna-kpanúmɛtɔ́ lɛ́ɛ nɔ́ ɖe ɔ́ cí jǐ ɖaxó ɖé wɛ ɖo jija wɛ ɖɔhun;

⁵é cí lě e hwesivɔ́ nɔ́ hun dó ayǐkúngban xúxú ɖé jí é ɖɔhun. Lo ɔ́ hwɛ ɔ́, zǐngídi e jí mɛ e nɔ kpa acɛ gannaganna nú mɛ lɛ́ɛ nɔ́ ɖe ɔ́, a nɔ ɖó te. A cí adǎn nú mɛ e nɔ kpa acɛ gannaganna nú mɛ lɛ́ɛ, lě e akpɔ́kpɔ́ nɔ́ cí adǎn nú hwesivɔ́ é ɖɔhun.

⁶Mawu Mavɔmavɔ Nǔbǐwúkpétɔ́ ɔ́ ná ylɔ́ agɔ̌ ɖokpó nú togun lɛ́ɛ bǐ ɖo Sinyɔ́ɔ só ta; yě ná ɖu lan ɖagbe ɖagbe lɛ́ɛ, bó ná nu vɛ̌ɛn ɖagbe ɖagbe lɛ́ɛ d'é jí. Lan ɖagbe e bɔ ganjí é wɛ yě ná ɖu, bó ná nu vɛ̌ɛn atata lɛ́ɛ d'é jí.

⁷Só ɔ́ jí fínɛ́ wɛ Mawu Mavɔmavɔ ná hɛn nǔwamɛvɔ e mɛ togun lɛ́ɛ ɖe ɔ́ vún ɖe. Fínɛ́ wɛ é ná hɛn nǔwamɛvɔ ɖaxó e togun lɛ́ɛ cyɔ́n ɔ́ vún ɖe.

⁸ Mawu Mavɔmavɔ ná sú kú sín kún dó káká sɔ́yi; Aklúnɔ Mavɔmavɔ ná súnsún ɖasin sín nukún mɛ nú mɛ bǐ. É ná ɖe winnyá nú togun tɔn gbɔn to ɔ́ bǐ mɛ. Xó e Mawu Mavɔmavɔ ɖɔ é nɛ́.

⁹Gbe énɛ́ gbe ɔ́, è nǎ ɖɔ: “Mawu Mavɔmavɔ wɛ nyí Mawu mǐtɔn, é wɛ mǐ nɔ te kpɔ́n bɔ é wá hwlɛ́n mǐ gán. Nǔgbó wɛ; Mawu Mavɔmavɔ wɛ mǐ ɖó nukún; é wɛ nyí mɛhwlɛ́ngántɔ́ mǐtɔn; énɛ́ wú ɔ́, xomɛ ní hun mǐ, mǐ ní j'awǎ.

¹⁰ Mawu Mavɔmavɔ ná cyɔ́n alɔ Sinyɔ́ɔ só ɔ́ jí.” Lo ɔ́, Mawu Mavɔmavɔ ná gbídí Mɔwabu ɖó afɔ wú ɖo tɛndo ɖokpó mɛ, lě e è nɔ bɛ́ sɛníyɔ dó zunkɔ́ sín do mɛ, bó nɔ́ gbídí é ɖɔhun.

¹¹Mɔwabu ná ɖo awa nyi wɛ tɔlintɔ́ ɖɔhun; é ná ɖo gǎn dó wɛ mɔ̌ có Mawu ná kɔ́n wi n'i.

¹²Mɔwabu e, ahohó towe lɛ́ɛ ɔ́, dǒ e a mɛ lɛ́ lɛ̌ dó toxo towe bɔ kɛntɔ́ má nɔ́ sixú fán ǎ lɛ́ɛ ɔ́, Mawu mu bǐ; é zin bǐ dɛ́, bǐ ɖo kɔ́ mɛ ɖo afúntúntún tɛ́ntin.