Read fon Ezayíi 27 Bible Online

Ezayíi 27 - fon bible

Ezayíi 27

¹ Gbe énɛ́ gbe ɔ́, Mawu Mavɔmavɔ ná zé hwǐ tɔn dó wǎ nǔ xá Levyatáan; hwǐ ɖaxó ɖé wɛ, hwǐ syɛ́nsyɛ́n ɖé wɛ, hwǐ ɖé wɛ bɔ nǔɖé nɔ́ nɔ te nukɔn tɔn ǎ; Levyatáan ɔ́, dan ɖé wɛ bɔ è nɔ sixú wlí i ǎ; dan ɖé wɛ bó sɛ́. Mawu Mavɔmavɔ ka ná hu xumɛkanlin ɖaxó énɛ́ ɔ́.

²Gbe énɛ́ gbe su hǔn, mi dó han ɖokpó, bó ji dó kpa vǐwungbo ɔ́; vɛ̌ɛn tɔn nɔ nyɔ́ ɖésú.

³“Nyɛ Mawu Mavɔmavɔ wɛ ɖo jǐ tɔn kpɔ́n wɛ. Un nɔ hú sin n'i hwebǐnu. Un nɔ ɖo vǐwungbo ɔ́ cɔ́ wɛ zǎn kéze, bónú mɛɖé má wá ɖo sa ɖi gbɔn gbo tɔn mɛ wɛ ó.

⁴Un sɔ́ ɖo xomɛ sin dó e wɛ ǎ; ényí un mɔ kpɔvɛwun, abǐ wunkan ɖěbǔ ɖ'é mɛ ɔ́, un ná hɔn bǐ kplé bó dó zo.

⁵Afi nú è hɔn wá su mì, bó ɖɔ hwɛ gbo xá mì. Hwɛ jɛ́n è ɖɔ gbo xá mì bɔ nǔ nyɔ́.”

⁶Nú azǎn ɖo azǎn jí jɛ wɛ, bɔ ga ɖo ga jí jɛ wɛ ɔ́, Jakɔ́bu togun ɔ́ ná dó ɖɔ do; Izlayɛ́li ná zɛ ala bó ná wlí sɛ́, bɔ sínsɛ́n tɔn ná gba kpé gbɛ ɔ́ bǐ mɛ.

⁷Mawu ka wa nǔ xá mɛ tɔn lɛ́ɛ lě e é wa xá mɛ e nɔ wa nǔ xá yě lɛ́ɛ ɖɔhun a? Abǐ é hu yě lě e é bló gbɔn xá mɛ e nɔ hu yě lɛ́ɛ ɖɔhun a?

⁸Éeǒ, é bló mɔ̌ ǎ; amɔ̌, é gba yě dó kpé to ɖěvo mɛ to ɖěvo mɛ. É dó jɔhɔn yě mɛ bó gba yě dó, a nǎ ɖɔ jɔhɔn e nɔ sí te sín zǎnzǎnhwe jí ɔ́ wɛ.

⁹Énɛ́ ɔ́, Mawu ná súnsún hwɛ e togun Jakɔ́bu tɔn hu é; nǔ e ká ná jɛ ɖ'é mɛ é ɖíe: togun ɔ́ ná gba awǐnnya e è dǒ mɛ vɔ̌sákpe ɔ́ é, hwě ɖɔhun; è sɔ́ ná mɔ vodún Acela abǐ zǎlínkpɔ́nfyɔ́nú ɖě ɖo te ǎ.

¹⁰Mɛ ɖěbǔ sɔ́ ná ɖo toxo e è mɛ ahohó lɛ́ lɛ̌ dó é mɛ ǎ; toxo ɔ́ ná ɖo te bɔ mɛ bǐ ná hɔn jó dó, bɔ é ná jɛ vɔ̌. Nyibúví lɛ́ɛ ná nɔ́ yi ɖu ama ɖo fínɛ́, bó ná nɔ́ dɔ́ fínɛ́, bó ná nɔ́ wínnyɔ́ gbě ɖu.

¹¹Atínla xú ɔ́, é nɔ́ fɛ́n j'ayǐ, bɔ nyɔ̌nu lɛ́ɛ nɔ́ wá cyán bó nɔ́ dó zo. Togun énɛ́ ɖó nǔnywɛ́ ɖěbǔ ǎ. Énɛ́ wú wɛ mɛ e ɖó e ɔ́ sɔ́ kú nǔbláwǔ ɖěbǔ n'i ǎ; mɛ e bló e ɔ́, sɔ́ hwɛ kɛ ɛ ǎ.

¹²Azǎn énɛ́ gbe ɔ́, Mawu Mavɔmavɔ ná ya mi jinukún ɖɔhun sín Efláti tɔ ɔ́ kɔn káká wá Ejípu tɔ ɔ́ kɔn bó só. É ná cyán mi mɛ Izlayɛ́li ví lɛ́ɛ ɖokpó ɖokpó nǔkún ɖɔhun.

¹³Gbe énɛ́ gbe ɔ́, lanzo ɖaxó ɔ́ ná jɛ gbe, bɔ mi mɛ e ahwan kplá yi Asilíi lɛ́ɛ, abǐ mi mɛ e è gba dó bɔ mi yi ɖo Ejípu lɛ́ɛ bǐ ná lɛ́ kɔ wá, bó ná jɛ kpo ɖo Mawu Mavɔmavɔ nukɔn, ɖo Jeluzalɛ́mu, ɖo só mímɛ́ ɔ́ jí.