Read fon Ezayíi 28 Bible Online

Ezayíi 28 - fon bible

Ezayíi 28

¹Heelú Samalíi! Ahannumúnɔ Eflayímu to ɔ́ tɔn lɛ́ɛ ɖo afɔ tɛ ayǐ wɛ ɖó toxo énɛ́ ɔ́ wú, toxo ɖuɖéjígbákún ɖɔhun ɔ́ wú. É ɖo só e ɖo tɔdo e nɔ hwán jinukún ɔ́ ta nu é jí, bó nyɔ́ kpɔ́n ganjí. Lo ɔ́, toxo ɔ́ ná cí folówa xúxú ɖɔhun ɖo mɛ énɛ́ lɛ́ɛ e vɛ̌ɛn lú bǐ lɛ́ɛ sín ta.

²Hlɔ̌nhlɔ́nnɔ, nǔwúkpétɔ́ ɖokpó ɖíe Aklúnɔ sɛ́ dó bɔ é ja e. É ɖo nǔ wa wɛ ɔ́, a nǎ ɖɔ kɛ́njí wɛ ɖo jija wɛ, a nǎ ɖɔ jɔhɔn ɖaxó nǔhɛngblétɔ́ ɖé wɛ ɖo nyinyi wɛ, a nǎ ɖɔ jǐ ɖaxó ɖé wɛ ja káká bɔ tɔ ɖi sin kpé fí bǐ. É ná flí nǔ bǐ xwe kpó hlɔ̌nhlɔ́n kpó.

³Toxo ɖuɖéjígbákún ɖɔhun e wú ahannumúnɔ Eflayímu tɔn lɛ́ɛ nɔ tɛ afɔ ayǐ ɔ́, è nǎ gba bǐ hánnyá.

⁴Samalíi toxo, é ɖo só e ɖo tɔdo e nɔ hwán jinukún ɔ́ ta nu ɔ́ jí, bó nyɔ́ kpɔ́n ganjí; é cí folówa xúxú ɖɔhun; é ná cí fígi nukɔntɔn e myá cóbɔ fígigbigbɛ hwenu su é ɖɔhun; mɛɖé mɔ lě tlóló ɔ́, é nɔ́ gbɛ bó nɔ́ ɖu.

⁵Gbe énɛ́ gbe ɔ́, Mawu Mavɔmavɔ Nǔbǐwúkpétɔ́ ɔ́ ɖésúnɔ ná húzú ɖuɖéjígbákún ɖagbe ɖagbe, acɔ́ɖónú ɖagbe ɖagbe nú mɛ e kpo ɖo gbɛ ɖo togun tɔn mɛ lɛ́ɛ.

⁶É ná ná linlin ɖagbe e è nɔ dó ɖɔ hwɛ jlɔ́jlɔ́ ná é mɛ e nɔ ɖɔ hwɛ lɛ́ɛ. Mɛ e nɔ nya kɛntɔ́ lɛ́ɛ sín toxo ɔ́ sín hɔntogbó jí lɛ́ɛ ɔ́, é ná ná glǎglá yě.

⁷Gbeyíɖɔ Mawu tɔn lɛ́ɛ kpó vɔ̌sánú-xwlémawutɔ́ lɛ́ɛ kpó lɔ nu vɛ̌ɛn mú, bó nɔ́ ɖo gblǒ ɖɔ wɛ. Yě nɔ́ nu ahan mú bó nɔ́ ɖo sa fún wɛ. Vɔ̌sánú-xwlémawutɔ́ lɛ́ɛ kpó gbeyíɖɔ Mawu tɔn lɛ́ɛ kpó nɔ́ nu ahan mú, bó nɔ́ ɖo gblǒ ɖɔ wɛ. Yě nɔ́ nu vɛ̌ɛn mú, bɔ ayi yětɔn sɔ́ ɖo te ǎ. Yě nɔ́ nu ahan mú bó nɔ́ ɖo sa fún wɛ. Mawu ɖe nǔ xlɛ́ yě bónú yě ja ɖiɖɔ gbé ɔ́, gblǒ wɛ yě nɔ́ ɖɔ. Yě ɖo hwɛ ɖɔ wɛ ɔ́, xó yětɔn nɔ xwe ali ǎ.

⁸Nǔ e yě vi lɛ́ɛ wɛ kpé nǔɖutɛn yětɔn lɛ́ɛ bǐ, fí bǐ kwíji.

⁹Ahannumúnɔ énɛ́ lɛ́ɛ nɔ kanbyɔ́ ɖɔ: “Ezayíi ɔ́, mɛ̌ ná kplɔ́n nǔ wɛ é ka ɖe? Mɛ̌ ná tín nǔ mɛ ná wɛ é ka ɖe? Vǐ e è ɖe anɔ̌ ná yɔ̌yɔ́ ɔ́ wɛ mǐ ká nyí a? Yɔkpɔ́vú e è ɖe sín nɔ tɔn kɔn é wɛ mǐ ká nyí a?

¹⁰Mi vɛ́ se xó e ɖɔ wɛ é ɖe é; é nɔ́ ɖɔ: D-A DA...DA D-O DO...DO B-A BA...BA B-O BO...BO[8]!”

¹¹ Ée mi sɔ́ ɖó mɔ̌ din é ɔ́, mɛ e nɔ ɖo gbe flán wɛ, bó nɔ́ ɖo gbe ɖěvo dó wɛ lɛ́ɛ jí wɛ Mawu ná ɖɔ xó nú mi gbɔn.

¹²Mawu ko ɖɔ nú togun tɔn ɖɔ: “Mi ná mɔ agbɔ̌n ɖo fí; mi jó mɛ e nǔ cikɔ ná lɛ́ɛ dó nú yě gbɔjɛ́ ɖo fí. Fí e è nɔ gbɔjɛ́ ɖe ɔ́ ɖíe.” Yě ká jló ná se ǎ.

¹³Énɛ́ wú ɔ́, Mawu Mavɔmavɔ xó ɔ́ D-A DA...DA D-O DO...DO B-A BA...BA B-O BO...BO tɔn jɛ́n yě ná se. Énɛ́ ɔ́, yě ná nyi agbo bɔ xú yětɔn ná cɛ́; yě ná sɔ́ mɔ bɔ è nǎ wlí kannumɔ yětɔn.

¹⁴Fanfúnɖɔtɔ́ e ɖo Jeluzalɛ́mu toxo ɔ́ nu lɛ́ɛ mi, mi ɖótó xó e Mawu Mavɔmavɔ ɖɔ é.

¹⁵Mawu ɖɔ, mi nɔ ɖɔ: “Mǐ ko jɛ akɔ xá kú, mǐ ko nu alɛ xá kú tomɛ, nǔ baɖabaɖa ɖěbǔ ná bó ɖo jijɛ wɛ ɔ́, ɖě ná jɛ dó mǐ jí ǎ. Mǐ gán jɛ adingban mǐtɔn wú, mǐ ɖeji dó awo mǐtɔn wú.”

¹⁶ Mi bo ɖótó xó e Aklúnɔ Mavɔmavɔ ɖɔ é: “Un ná zé awǐnnya dodó ɖokpó tun te ɖó Sinyɔ́ɔ, bó ná tɛ́n mi kpɔ́n; awǐnnya tají wɛ, awǐnnya dodó wɛ. Mɛ e ná gán jɛ awǐnnya ɔ́ wú ɔ́ ado ná hu i ǎ.

¹⁷“È nǎ nɔ́ wa nǔ bɔ é ná nɔ́ jlɔ́ xɔkan ɖɔhun. È nǎ nɔ́ xwedó hwɛjijɔ télélé dǒxwetekan ɖɔhun.” Lo ɔ́, kɛ́njí ná ja bó kplɔ́ bibɛtɛn mitɔn e nyí adingban ɔ́. Sin ná sa bó dɔn nǔ e gúdo mi hɔn wlá cí ɔ́ yi.

¹⁸Akɔ e mi jɛ xá kú ɔ́ ná gblé, alɛ e mi nu xá kútomɛ ɔ́ sɔ́ ná wa azɔ̌ ǎ. Hwenu e nǔ baɖabaɖa ɔ́ ná wá é ɔ́, é ná gba mi hánnyá.

¹⁹Nǔ baɖabaɖa ɔ́ dín hweɖěbǔnu, bónú mɛ lɛ́ɛ mɔ nǔ jɛ nǔ e ɖe xlɛ́ wɛ é ɖe ɔ́ mɛ ɔ́, ahwi ná xo yě; é sixú nyí zǎnzǎn, é sixú nyí kéze, é ka sixú nyí zǎn mɛ; è ɖɔ xó tɔn bɔ è se yǎyá ɔ́, hǔn mɛtɔn ná nɔ́ zɛ.

²⁰È ko nɔ dó lǒ ɖé ɖɔ: “È nɔ mlɔ zan gli jí bó nɔ́ dlɛ́n afɔ ǎ; avɔ kpɛví nɔ́ bú ta kpó afɔ kpó ǎ.” Mɔ̌ jɛ́n é ná nyí.

²¹Đó Mawu Mavɔmavɔ ná jlɛ́ nǔ lě e é jlɛ́ gbɔn ɖo Pelasímu só jí é; é ná sin xomɛ ɖésú lě e é sin gbɔn ɖo Gabawɔ́ɔn tɔdo mɛ é, é ná jlɛ́ nǔ lobo ná wa azɔ̌ e é jló ná wa é; azɔ̌ ɔ́ ná kpácá ɖésú; é ná jí wǔ.

²²É nyí mɔ̌ hǔn, mi bo jó fanfún dó; é má nyí mɔ̌ ǎ ɔ́, kan e è dó kɔ nú mi ɔ́ ná nyɔ kɔ nú mi. Đó un se bɔ Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ émí ná gbɔ bó vívá to ɔ́ bǐ sín kún.

²³Mi ɖótó mì ganjí, mi wlí tó xó e ɖɔ gbé un ja é wú:

²⁴Glesi e ja jinukún dó gbe ɔ́ ná ɖo hwɛn kɛ́ɖɛ́ lɛ wɛ abǐ é ná ɖo ayǐkúngban kɛ́ɖɛ́ jíjé wɛ a? Gbeɖé kpɔ́n!

²⁵Nǔ e é nɔ́ bló ɔ́ ɖíe: É nɔ́ lɛ hwɛn bó nɔ́ hú nǔhwɛ́nkún nigɛ́li kpó kumɛ́ɛ kpó sín kwín, bó nɔ́ dó jinukún tɛnmɛ tɛnmɛ; é nɔ́ dó blěe, milɛ́ɛ, ɔ́ji; énɛ́ gúdo ɔ́, é nɔ́ dó jinukún ɖěvo lɛ́ɛ gbɔn gle ɔ́ tó lɛ́ lɛ̌ dó.

²⁶Mawu tɔn wɛ kplɔ́n ɛ gbɔn mɔ̌; é wɛ ná ɛ nǔnywɛ́ mɔ̌.

²⁷È nɔ́ zé kɛkɛ́ví abǐ kɛkɛ́ví sín afɔ dó só nǔhwɛ́nkún énɛ́ lɛ́ɛ ná ǎ; lo ɔ́, kpo wɛ è nɔ zé dó só ná.

²⁸È ja blěe só gbé ɔ́, è nɔ dɔn kɛkɛ́ví gbɔn jí nǔgbó, è ka nɔ dɔn gbɔn jí ma nɔ te ǎ. Kɛkɛ́ví sín afɔ kpó sɔ́ e ɖo kɛkɛ́ví ɔ́ dɔn wɛ ɔ́ kpó nɔ́ gbɔn jí nǔgbó, yě ká nɔ dɔn gbɔn jí káká bó nɔ li kwín lɛ́ɛ ǎ.

²⁹Walɔ énɛ́ e glesi ɖó ɔ́, Mawu Mavɔmavɔ Nǔbǐwúkpétɔ́ ɔ́ wɛ ná ɛ; Mawu ɔ́, nǔkplɔ́nmɛ tɔn nyɔ́ bó vɛ́ jlɛ́; nǔnywɛ́ tɔn d'agba.