Read fon Ezayíi 32 Bible Online

Ezayíi 32 - fon bible

Ezayíi 32

¹Axɔ́sú ɖokpó ná tíin, bó ná xwedó hwɛjijɔ dó ɖu axɔ́sú, bɔ gǎn e kpó e kpó ná nɔ to ɔ́ nu lɛ́ɛ ná kpa acɛ ɖó sɛ́nxwi jí.

²Yě mɛ ɖokpó ɖokpó ná cí fí e è nɔ bɛ yɛ ɖe bó nɔ́ gló jɔhɔn é ɖɔhun; yě ná cí fí e è nɔ bɛ sin ɖe é ɖɔhun, yě ná cí tɔhwín e ɖo ayǐkúngban xúxú jí é ɖɔhun, yě ná cí só ɖaxó ɖé sín yɛtɛn ɖɔhun ɖo to e mɛ hwesivɔ́ nɔ́ hun ɖe ganjí é.

³Mɛ e sín nukún ɖó ná nɔ́ mɔ nǔ lɛ́ɛ ɔ́, nukún yětɔn ná ɖo te, mɛ e sín tó ná nɔ́ se nǔ lɛ́ɛ ɔ́, tó yětɔn ná ɖo te.

⁴Mɛ e ma bí ǎ lɛ́ɛ ná jɛ nukúnnú mɔ jɛ nǔ mɛ jí. Mɛ e nɔ kúkú ɖɛ̌ lɛ́ɛ ná nɔ́ ɖɔ xó ganjí, bɔ è nǎ nɔ́ mɔ nǔ jɛ mɛ céɖécéɖé.

⁵È sɔ́ ná nɔ́ mɔ gbɛtɔ́ ma ɖó ta ɖé lɛ́ɛ dó mɔ gbɛtɔ́ nukúnɖéjí ǎ, è sɔ́ ná nɔ́ mɔ awlinmɛdan lɛ́ɛ dó mɔ mɛjɔmɛ ǎ.

⁶Xó ma ɖó ta ɖé jɛ́n gbɛtɔ́ maɖóta ɖé lɛ́ɛ nɔ́ ɖɔ; nǔ baɖabaɖa e yě ná dó sin ɔ́ lin wɛ jɛ́n yě nɔ́ ɖe; yě nɔ́ xo dǎka, bó nɔ́ ɖo xó nyanya ɖɔ dó Mawu Mavɔmavɔ wú wɛ; yě nɔ́ tɛ nǔɖuɖu mɛ e ɖo xovɛ́ é, bó nɔ́ tɛ sin mɛ e kɔ xú é.

⁷Awlinmɛdan lɛ́ɛ ɔ́, alǐnnyánú e nɔ́ dó nǔ baɖabaɖa sin é ɖo yě sí; yě nɔ́ ɖe wě bó nɔ́ ɖó adingban dó wa nǔ xá wamamɔnɔ lɛ́ɛ; amɔ̌, lelenɔ lɛ́ɛ ɔ́, nǔ e yě ɖó acɛ ná ɔ́ kɛ́ɖɛ́ jɛ́n yě nɔ́ byɔ́.

⁸Mɛ e ɖó ayi ɖagbe ɔ́, linlin ɖagbe kɛ́ɖɛ́ jɛ́n é nɔ́ ɖó; é sí te ɔ́, nǔ e nyí nǔ ɖagbe é kɛ́ɖɛ́ jɛ́n é nɔ́ wa.

⁹Jeluzalɛ́mu nyɔ̌nu e mi, nǔɖé má nyí nǔɖé ná nɔ e mi, mi sí te, mi ɖótó mì. Mi ɖyɔ̌vǐ lɛ́ɛ e mi, mi nɔ mɔ ɖɔ nǔɖé kún ɖo gbɛ émítɔn wú ó; mi bo ɖótó mì.

¹⁰Káká nú mǐ nǎ mɔ xwe ɖokpó jɛjí din ɔ́, mi mɛ e nɔ mɔ ɖɔ nǔɖé kún ɖo gbɛ émítɔn wú ó lɛ́ɛ ɔ́, wǔ ná kú mi, ɖó vǐwun gbigbɛ sɔ́ ná ɖe ǎ; mi sɔ́ ná mɔ vǐwun ɖě gbɛ ǎ.

¹¹Nǔɖé má nyí nǔɖé ná nɔ e mi, xɛsi ní bó ɖi mi. Mi mɛ e nɔ mɔ ɖɔ nǔɖé kún ɖo gbɛ émítɔn wú ó lɛ́ɛ e mi, wǔ ná kú mi; mi ɖe avɔ mitɔn lɛ́ɛ, mi ɖe nǔ e mi dó lɛ́ɛ, bó sɔ́ nǔwamɛvɔ gbá.

¹²Mi ná alě, mi ví gle ɖagbe ɖagbe ɔ́; mi ví vǐwungbo e nɔ sɛ́n káká é.

¹³Mi ví togun ce sín ayǐkúngban e bǐ sú gbě é; mi ví xwé énɛ́ lɛ́ɛ e gbe è nɔ ɖo awǎ jɛ wɛ ɖe é; mi ví toxo énɛ́ e mɛ axi nɔ jɛ ɖe é.

¹⁴Mɛ bǐ hɔn jó axɔ́sú ɔ́ sín xwé dó. Toxo e mɛ axi nɔ jɛ ɖe é jɛ vɔ̌. Mɛ bǐ jó Ofɛ́lu slǎ ɔ́ dó, bó jó tocɔ́kpe e ta sɔ́ja lɛ́ɛ nɔ́ nɔ é dó, bɔ tócí gbě tɔn lɛ́ɛ nɔ́ wá vo ɖo fínɛ́, bɔ kanlin lɛ́ɛ nɔ́ yi ɖu ama ɖo fínɛ́.

¹⁵Ayǐ ɖokpó ná wá hɔ́n, bɔ Mawu ná kɔn yɛ tɔn dó mǐ jí. Énɛ́ ɔ́, fí e nyí axéko jí é ná húzú atínsínsɛ́ngbo, bɔ atínsínsɛ́ngbo ná húzú zungbó.

¹⁶Nǔ wa ɖó sɛ́nxwi jí kpó hwɛjijɔ kpó ná jínjɔ́n ayǐ gbɔn fí bǐ ɖo to ɔ́ mɛ; nǔ ná nyí mɔ̌ ɖo axéko jí, bó nyí mɔ̌ ɖo atínsínsɛ́ngbo mɛ.

¹⁷Hwɛjijɔ ná hɛn fífá wá; é ná ná mɛ ayi jɛ ayǐ kpó jiɖiɖe kpó káká sɔ́yi.

¹⁸Togun Mawu tɔn ná mɔ fífá; é ná vo, é sɔ́ ná nɔ́ lin nǔɖé ǎ.

¹⁹Kɛ́njí ná ja dó zungbó ɔ́ jí, bɔ atín lɛ́ɛ bǐ ná lɔ́, bɔ toxo ɔ́ bǐ ná gba.

²⁰Amɔ̌, ɖagbe wɛ é ná nyí nú mi bǐ; mi ná dó nǔ gbɔn tɔkpá tɔkpá, bó ná jó tócí mitɔn lɛ́ɛ kpó nyibú mitɔn lɛ́ɛ kpó dó, bɔ yě ná nɔ́ ɖo yiyi wɛ bó ná nɔ́ ɖo wǐwá wɛ.