Read fon Ezayíi 35 Bible Online

Ezayíi 35 - fon bible

Ezayíi 35

¹Gbětótló kpó ayǐkúngban xúxú kpó ní j'awǎ. Nǔ ní víví nú to e mɛ sin ma ɖe ǎ é, bónú é ní gba sɛ́ folówa ɖɔhun.

²Folówa ní gbɔn to ɔ́ bǐ mɛ, bónú xomɛ ní hun to ɔ́; to ɔ́ ní sú xó kpó awǎjijɛ kpó. É ná nyɔ́ ɖɛkpɛ Libáan só lɛ́ɛ ɖɔhun; é ná nyɔ́ ɖɛkpɛ Kaamɛ́li só ɔ́ ɖɔhun; é ná nyɔ́ ɖɛkpɛ ayǐkúngban wɛnjɛ Calɔ́ni tɔn ɖɔhun. Énɛ́ ɔ́, mɛ bǐ ná mɔ susu Mawu Mavɔmavɔ tɔn, hǐnhɔ́n Mawu mǐtɔn tɔn.

³ Mi ná hlɔ̌nhlɔ́n awa e nǔ cikɔ ná é; mi dó wǔsyɛ́n kanmɛ nú koli e gbɔ́jɔ́ é.

⁴Mi ɖɔ nú mɛ e awakanmɛ ɖo kúkú wɛ lɛ́ɛ ɖɔ: “Mi dó wǔsyɛ́n lanmɛ nú miɖée; mi má sɔ́ ɖi xɛsi ɖě ó. Mi kpɔ́n, Mawu mitɔn ɖíe! É ja, bó ná wá ba hlɔn nú mi, bó ná sú nǔ e kɛntɔ́ mitɔn lɛ́ɛ wa xá mi ɔ́ sín axɔ́ yě. É ɖésúnɔ wɛ ja bó ná hwlɛ́n mi gán.”

⁵ Énɛ́ ɔ́, nukúntíntɔ́nnɔ lɛ́ɛ ná mɔ nǔ, tókúnɔ lɛ́ɛ ná se nǔ.

⁶Sékúnɔ lɛ́ɛ ná lɔ́n yi jǐ tɛ́ ɖɔhun; ɖɛ̌kúnánɔ lɛ́ɛ ná ɖɔ xó dó ɖe awǎjijɛ yětɔn xlɛ́. Sin ná tɔ́n ɖo gbětótló mɛ; tɔ ná sa ɖo ayǐkúngban xúxú jí.

⁷Fí e kɔ́gúdu ɖe bó nɔ́ sɛ́ gáɖágáɖá hwesivɔ́ mɛ ɔ́ ná húzú tán; to e mɛ è ma nɔ mɔ sin nu ɖe ǎ é ná húzú tɔjɔtɛn. Fí e kó nyí xwé nú avǔn gbě tɔn lɛ́ɛ ɖ'ayǐ ɔ́, fán kpó fɛ́n kpó wɛ ná wú ɖo fínɛ́.

⁸Fí énɛ́ wɛ ali ɖaxó ɖokpó ná gbɔn, bɔ è nǎ ylɔ́ ɖɔ “Ali mímɛ́”. Mɛ blíblí ɖokpó ná sixú gbɔn ali énɛ́ jí ǎ. Hunsɛntɔ́ ɖě ká ná gbɔn fínɛ́ ǎ. Mawu sín togun ɔ́ kɛ́ɖɛ́ tɔn wɛ é ná nyí, bɔ é nǎ nɔ́ gbɔn jí.

⁹Kinnikínní ná gbɔn ali énɛ́ ɔ́ jí ǎ, adǎnkanlin ɖé ka ná sixú yi jí ǎ. Ali énɛ́ ɔ́ jí wɛ mɛ e Mawu Mavɔmavɔ tún kan ná lɛ́ɛ ná zun zɔnlin gbɔn.

¹⁰Mɛ e é hwlɛ́n gán lɛ́ɛ ná lɛ́ kɔ wá; Sinyɔ́ɔ wɛ yě ná wá, kpó awǎjijɛ kpó, kpó xósúsú kpó. Awǎjijɛ mavɔ mavɔ ɖé ná ɖo nukún yětɔn ta, xomɛ ná ɖo yě hun wɛ mɔ̌hunkɔtɔn; nǔ linlin kpó azɔn winwɛn kpó bǐ ná vɔ.