Read fon Ezayíi 37 Bible Online

Ezayíi 37 - fon bible

Ezayíi 37

¹Ée axɔ́sú Ezekiyási se xó e ahwangán Asilíi xɔ́sú ɔ́ tɔn ɖɔ sɛ́ dó e ɔ́, é vún awu dó kɔ nú éɖée, bó sɔ́ ati dó, bó ɖidó Mawu Mavɔmavɔ xwé gbe.

²É sɛ́ Eliyakímu hɔnmɛgán ɔ́, kpó Cevúna wěgbójínɔtɔ́ ɔ́ kpó mɛ e ko nyí vɔ̌sánú-xwlémawutɔ́ jɛ nukɔn nú ɖě lɛ́ɛ bǐ lɛ́ɛ kpó dó, bɔ yě dǒ ati, bó ɖidó Amɔ̌si ví Ezayíi, gbeyíɖɔ Mawu tɔn ɔ́ gɔ́n.

³Yě jɛ dɔ̌n ɔ́, yě ná ɖɔ n'i ɖɔ: “Wɛn e axɔ́sú ɔ́ dó sɛ́ dó we ɔ́ ɖíe: Azǎn égbé tɔn ɔ́, aluwɛ zán ɖé wɛ, tódɔnnúmɛ zán ɖé wɛ, bó nyí hɛ̌n zán. Mǐ cí nyɔ̌nu e jɛ flú mɛ bó má ká ɖó hlɔ̌nhlɔ́n bó ná zɛn ǎ é ɖɔhun.

⁴Asilíi xɔ́sú ɔ́ sɛ́ ahwangán e nɔ kplá ɛ ɔ́ dó, bɔ é wá zun Mawu gbɛɖe ɔ́. Kóóyi nya! Ényí Mawu Mavɔmavɔ, Mawu towe se zun é nɛ́ lɛ́ɛ din, bó dɔn tó n'i ɔ́, é ná nyɔ́ mɛ nya! Hwɛ ɔ́, bo xo ɖɛ nú mɛ e kpo ɖo togun ɔ́ mɛ lɛ́ɛ.”

⁵Mɛ e axɔ́sú Ezekiyási sɛ́ dó lɛ́ɛ yi dó wɛn ɔ́ Ezayíi.

⁶Bɔ Ezayíi ɖɔ nú yě ɖɔ: “Mi yi ɖɔ nú gǎn mitɔn ɖɔ Mawu Mavɔmavɔ ɖɔ: ‘Xó é nɛ́ lɛ́ɛ e a se ɔ́ ní má dó xɛsi nú we ó. Xó énɛ́ lɛ́ɛ e azaglɔ́gán axɔ́sú Asilíi tɔn lɛ́ɛ ɖɔ dó ɖɔ slǎmɛ wǔ ce ɔ́, ní ma dó xɛsi nú we ó.

⁷Axɔ́sú Asilíi tɔn ɔ́ ná se xó ɖé, bɔ un ka na ɖɔ dó ayi tɔn mɛ ɖɔ é ní lɛ́ kɔ yi to tɔn mɛ. É jɛ dɔ̌n ɔ́, un ná zɔ́n bɔ è nǎ hu i.’ ”

⁸Ahwangán e nɔ kplá axɔ́sú ɔ́ se ɖɔ axɔ́sú Asilíi tɔn ɔ́ kó gosín Lakíci bó yi tɔ́n ahwan Livuna. Énɛ́ ɔ́, é yi mɔ ɛ ɖo dɔ̌n.

⁹Lo ɔ́, Asilíi xɔ́sú ɔ́ se xó ɖé dó Tilaka Etiopíi xɔ́sú ɔ́ wú; é se ɖɔ axɔ́sú énɛ́ ɔ́ sɔ́ nǔ bó ná wá fun ahwan xá émí. Ée Asilíi xɔ́sú ɔ́ se mɔ̌ kpowun ɔ́, é lɛ́ sɛ́ wɛn dó Ezekiyási bó ɖɔ sɛ́ dó e ɖɔ:

¹⁰Xó e mi ná ɖɔ nú Ezekiyási Judáa xɔ́sú ɔ́ ɖíe: “A nɔ gán jɛ Mawu towe wú dín! A nɔ gán jɛ wǔ tɔn ɖɔ é kún ná lɔn nú un ná yí Jeluzalɛ́mu ó. Ma lɔn nú é blɛ́ we ó.

¹¹A se lě e Asilíi xɔ́sú lɛ́ɛ wa to ɖě lɛ́ɛ bǐ sín nǔ gbɔn é; yě vǐvá kún yětɔn bǐ, bɔ hwɛ ka ná gán ɖ'é mɛ a?

¹²Hwenu e tɔ́gbó ce lɛ́ɛ gba Gozáni, Haláani, Hlɛsɛ́fu kpó Telasáa tota Edɛ́ninu lɛ́ɛ tɔn kpó ɔ́, fí ɖé wɛ nǔmɛsɛn yětɔn lɛ́ɛ yi a?

¹³Fítɛ́ axɔ́sú Hamáti tɔn, axɔ́sú Aapadu tɔn, axɔ́sú Layíi tɔn, axɔ́sú Sefáawayímu tɔn, axɔ́sú Hena tɔn kpó axɔ́sú Iwa tɔn kpó ká ɖe égbé din?”

¹⁴Ezekiyási yí wěma ɔ́ ɖo mɛ e Asilíi xɔ́sú ɔ́ sɛ́ dó e lɛ́ɛ sí bó xa, bó yi Mawu Mavɔmavɔ xwé gbe, bó vlɔ́n wěma ɔ́ ɖo nukɔn tɔn.

¹⁵Énɛ́ ɔ́ gúdo ɔ́, é jɛ ɖɛ xo jí ɖɔ:

¹⁶ “Mawu Mavɔmavɔ Nǔbǐwúkpétɔ́, Mawu Izlayɛ́li tɔn e, hwi mɛ e ɖo ayǐjínjɔ́n ɖo wɛnsagun susunɔ lɛ́ɛ ta nu é ɔ́, hwi ɖokpónɔ géé wɛ nyí Mawu; hwi ɖokpónɔ géé wɛ kpa acɛ nú axɔ́súɖuto e ɖo ayǐkúngban jí lɛ́ɛ bǐ. Hwi wɛ bló jǐ kpó do kpó.

¹⁷Mawu Mavɔmavɔ, ɖǒtó ganjí; kpɔ́n ganjí. Hwi Mawu gbɛɖe ɔ́, kpɔ́n lě do mɛ e Senakelíbu sɛ́ dó lɛ́ɛ zun we sɔ é.

¹⁸Mawu Mavɔmavɔ, axɔ́sú Asilíi tɔn lɛ́ɛ vívá kún nú akɔta ɖě lɛ́ɛ, bó gba to yětɔn lɛ́ɛ,

¹⁹bó bɛ́ nǔmɛsɛn yětɔn lɛ́ɛ dó myɔ mɛ nǔgbó. Amɔ̌, nǔmɛsɛn yětɔn énɛ́ lɛ́ɛ cí hwi ɖɔhun ǎ. Nǔdówá gbɛtɔ́ lɛ́ɛ tɔn wɛ, atín kpó awǐnnya kpó wɛ, bɔ yě vívá kún ná.

²⁰Din ɔ́, Mawu Mavɔmavɔ, Mawu mǐtɔn, hwlɛ̌n mǐ sín Senakelíbu sí, bónú axɔ́súɖuto e ɖo gbɛ ɔ́ mɛ lɛ́ɛ bǐ ná tunwun ɖɔ hwi Mawu Mavɔmavɔ ɔ́, hwi ɖokpónɔ géé wɛ nyí Mawu.”

²¹Énɛ́ ɔ́, Ezayíi Amɔ̌si ví ɔ́ ɖɔ sɛ́ dó Ezekiyási ɖɔ: “Gbe e Mawu Mavɔmavɔ, Mawu Izlayɛ́li tɔn yí nú ɖɛ e a xo dó Asilíi xɔ́sú Senakelíbu tamɛ ɔ́ ɖíe:

²²Xó e Mawu Mavɔmavɔ ɖɔ dó Senakelíbu wú ɔ́ ɖíe: Senakelíbu, ɖyɔ̌vǐ nyɔ̌nu ɖo alɔ jí Jeluzalɛ́mu ɖo tɛ́ hu nú we wɛ. É ɖo cícá we ko wɛ. Đyɔ̌vǐ Jeluzalɛ́mu nɔ kpɔ́n we, bó nɔ́ húnhún ta.

²³Senakelíbu, mɛ̌ wɛ a zun? Mɛ̌ wɛ a ba hǎ? Mɛ̌ wɛ a wa adǎn dó ta ná? Mɛ̌ wɛ a kpɔ́n wunvɔ? Nyɛ Mawu, mɛ mímɛ́ Izlayɛ́li tɔn ɔ́ wɛ a?

²⁴A sɛ́ mɛsɛntɔ́ towe lɛ́ɛ dó nyɛ Mawu Mavɔmavɔ ɔ́, bó zun mì sɛ́ dó ɖɔ: ‘Nyɛ Senakelíbu ɔ́, un fɔ ahwankɛkɛ́ví ce wɔ̌buwɔ́bú lɛ́ɛ, bó xá Libáan só lɛ́ɛ jí káká yi Libáan só e vɛ́ xá lɛ́ɛ bǐ jí; un gbo sɛ́dlutín tɔn e yi jǐ hú ɖě lɛ́ɛ bǐ é, un gbo sikplɛ́tín tɔn e nyɔ́ ɖɛkpɛ hú ɖě lɛ́ɛ bǐ é. Un hun káká yi só tɔn gǔdo gúdo tɔn lɛ́ɛ jí, zungbó tɔn e dó ganjí lɛ́ɛ mɛ.

²⁵Un kun tɔ, bó nu to ɖěvo mɛ sin; un tɛ afɔ Ejípu to ɔ́ mɛ kpowun ɔ́, tɔsisa e ɖo to ɔ́ mɛ lɛ́ɛ bǐ mɛ.’

²⁶A tunwun ɖɔ nyɛ Mawu Mavɔmavɔ ɔ́, nyi wɛ ko to nǔ énɛ́ lɛ́ɛ bǐ ɖ'ayǐ sín do ǎ cé? Un ko tunwun sín do ɖɔ nǔ énɛ́ lɛ́ɛ ná jɛ. Din ɔ́, un jló ɖɔ nǔ énɛ́ lɛ́ɛ ní jɛ, bónú a nǐ gba toxo e è mɛ ahohó lɛ́ lɛ̌ dó lɛ́ɛ hánnyá.

²⁷Mɛ e ɖo to énɛ́ lɛ́ɛ mɛ lɛ́ɛ kpé nǔɖé wú ǎ. Xɛsi jɛ yě jí; winnyá hu yě. Yě cí gběhan e ɖo gle mɛ lɛ́ɛ ɖɔhun, gběhan e wú tlóló lɛ́ɛ ɖɔhun. Yě cí gběhan wlɛ́wlɛ́ e nɔ́ wú ɖo xɔ ta é ɖɔhun; yě cí nǔkún e má wú zinzin ǎ bó fyɔ́ é ɖɔhun.

²⁸Amɔ̌, un tunwun hwenu e a nɔ jínjɔ́n ayǐ é. Un tunwun hwenu e a nɔ tɔ́n é, un tunwun hwenu e a nɔ wá xwé gbe é, un tunwun hwenu e a nɔ sin xomɛ dó mì é.

²⁹A sin xomɛ dó mì, bó dó mɛmasígbe bɔ é wá káká gɔ̌n ce. Énɛ́ wú ɔ́, un ná dó gan awɔntín mɛ nú we, bó ná dó aja nu nú we, bó ná lɛ́ kɔ nú we gbɔn ali e a gbɔn wá é.

³⁰“Amɔ̌, hwɛ ɔ́, Ezekiyási, nǔ e ná nyí xlɛ̌ nú we ɔ́ ɖíe: Xwe élɔ́ mɛ ɔ́, nǔkún flá lɛ́ɛ wɛ è nǎ ɖu; xwe wegɔ́ ɔ́ mɛ ɔ́, è nǎ ɖu nǔ ɖokpó ɔ́. Amɔ̌, xwe atɔngɔ́ ɔ́ mɛ ɔ́, nǔ e mi ɖésúnɔ ná dó ɔ́ wɛ mi ná ɖu. Mi ná dó nǔkún bó ná ya; mi ná tun vǐwuntín bɔ é ná sɛ́n, bɔ mi ná ɖu.

³¹Mɛ e ná kpo ɖo axɔ́súɖuto Judáa tɔn mɛ lɛ́ɛ ná dó ɖɔ do atín ɖɔhun, bó ná sɛ́n.

³²Đó mɛ ɖé lɛ́ɛ ná kpo ɖo gbɛ, gbɛtɔ́ ná kpo ɖo gbɛ ɖo Jeluzalɛ́mu, ɖo Sinyɔ́ɔ só ɔ́ jí.” Ezayíi lɛ́ ɖɔ: “Nǔ e Mawu Mavɔmavɔ Nǔbǐwúkpétɔ́ ɔ́ ná bló ɖo wǎn yíyí ɖaxó e é ɖó ɔ́ mɛ é nɛ́.

³³Nǔ énɛ́ lɛ́ɛ wú wɛ Mawu Mavɔmavɔ ɖɔ xó élɔ́ dó axɔ́sú Asilíi tɔn wú: ‘É ná byɔ́ toxo élɔ́ mɛ ǎ, é ná da gǎ ɖo toxo ɔ́ mɛ ǎ. É ná zán gǎglónú tɔn ɖo toxo élɔ́ mɛ ǎ; é ná kplé kɔ́ bó nɔ gúdo, bó tɔ́n ahwan toxo élɔ́ ǎ.

³⁴Ali e é gbɔn bó wá é wɛ é ná gbɔn bó lɛ́ kɔ. É ná byɔ́ toxo élɔ́ mɛ ǎ; nyɛ Mawu Mavɔmavɔ wɛ ɖɔ mɔ̌.

³⁵Un ná cyɔ́n alɔ toxo élɔ́ jí, bó ná hwlɛ́n ɛ gán ɖó Mawu wɛ un nyí; un ná bló mɔ̌ ɖó akpá un dó nú mɛsɛntɔ́ ce Davídi ɔ́ wú.’ ”

³⁶Wɛnsagun Mawu Mavɔmavɔ tɔn ɖokpó tɔ́n, bó hu gbɛtɔ́ adɔ̌kpo tɛ́nnɛ děgba ɖě afatɔ́n (185.000), ɖo Asilíinu lɛ́ɛ sín ahwankpá mɛ. Ée ayǐ hɔ́n zǎnzǎn ɔ́, mɛ e kpo lɛ́ɛ ná mɔ nǔɖé kpowun ɔ́, cyɔ yětɔn jɛ́n yě mɔ.

³⁷Énɛ́ ɔ́, Senakelíbu Asilíi xɔ́sú ɔ́ sɔ́ nǔ kpó ahwangɔnu tɔn kpó, bó lɛ́ kɔ bo yi cí Ninívu.

³⁸É ká wá su gbe ɖokpó, bɔ Senakelíbu ɖo kɔ́ ɖe nú vodún tɔn Nislɔki ɔ́ wɛ, bɔ vǐ tɔn Adlamɛlɛ́ki kpó Salɛsɛ́ɛ kpó sɔ́ hwǐ i, bó hu i, bó hɔn yi Alaláti; ée é kú ɔ́, vǐ tɔn Asaaxadɔ́ɔn ɖu axɔ́sú ɖó tɛn tɔn mɛ.