Read fon Ezayíi 40 Bible Online

Ezayíi 40 - fon bible

Ezayíi 40

¹Mawu mitɔn ɖɔ: “Mi dó wǔsyɛ́n lanmɛ nú togun ce. Mi dó wǔsyɛ́n lanmɛ n'i.

²Mi ná akɔ́nkpinkpan Jeluzalɛ́mu. Mi sú xó bó ɖɔ n'i ɖɔ é kún sɔ́ ná yi mɛɖe ɖě ó; mi ɖɔ n'i ɖɔ é kó sú hwɛ xɔ́ fó, ɖó hwɛ e é hu lɛ́ɛ ɔ́, Mawu Mavɔmavɔ dɔn bǐ sín tó n'i.”

³ Un se mɛ ɖé ɖo xó sú wɛ ɖɔ: “Mi ɖe ali ɖokpó nú Mawu Mavɔmavɔ ɖo gbětótló mɛ. Mi bló ali ɖokpó ɖó nú Mawu mǐtɔn ɖo axéko nɛ́ jí.

⁴Mi sú tɔdo lɛ́ɛ bǐ; mi gba só lɛ́ɛ bǐ; mi gbígbá kpó lɛ́ɛ bǐ. Mi jlɔ́ fí e nyí kpóɖědoɖě lɛ́ɛ bónú yě húzú ayǐkúngban wɛnjɛ. Mi zé só ɖaxó ɖaxó lɛ́ɛ dó húzú tɔdo.

⁵Énɛ́ ɔ́, susu Mawu Mavɔmavɔ tɔn ná jɛ wěxo, bɔ mɛ bǐ ná mɔ. Nu e Mawu Mavɔmavɔ kɛ ɔ́ nɛ́.”

⁶ Un se gbe ɖé bɔ é ɖɔ nú mì ɖɔ: “Sú xó bó ɖɔ.” Un ka kanbyɔ́ ɖɔ: “Étɛ́ un ka ná sú xó bó ɖɔ?” Bɔ gbe ɔ́ lɛ́ ɖɔ nú mì ɖɔ: “Xó e a nǎ ɖɔ ɔ́ ɖíe, a nǎ ɖɔ: Gbɛtɔ́ lɛ́ɛ bǐ cí gběhan ɖɔhun, bɔ susu yětɔn bǐ cí folówa ɖɔhun;

⁷Mawu Mavɔmavɔ sín funfún wá yi lě ɔ́, gběhan nɔ́ fyɔ́, folówa nɔ mlú ɖa. Ji e gběhan nɔ́ dɔ́ é wɛ gbɛtɔ́ nɔ́ dɔ́.

⁸Nǔgbó ɔ́, gběhan nɔ́ xú, folówa nɔ́ mlú ɖa, amɔ̌, xó e Mawu mǐtɔn ɖɔ ɔ́ ná nɔ ayǐ káká sɔ́yi.”

⁹Jeluzalɛ́mu togun, xá só ɖaxó ɖokpó jí. Sinyɔ́ɔ togun, sú xó kpó hlɔ̌nhlɔ́n towe bǐ kpó. È dǒ wɛn ɖagbe ɖé we. Sú xó bó dó wɛn ɔ́; ma ɖi xɛsi ó. Đɔ nú Judáa toxo lɛ́ɛ ɖɔ: “Mi kpɔ́n Mawu mitɔn.

¹⁰ Mi kpɔ́n Aklúnɔ Mavɔmavɔ; é jǎwe kpó hlɔ̌nhlɔ́n kpó, é ɖó hlɔ̌nhlɔ́n e ɖu axɔ́sú é; é bɛ́ nǔ e é mɔ lɛ́ɛ jǎwe; azɔ̌ e é wa ɔ́, é bɛ́ nǔ e é mɔ ɖ'é mɛ lɛ́ɛ ja.

¹¹ É cí lɛ̌ngbɔ́nyitɔ́ e kplá gbɔ̌ tɔn lɛ́ɛ é ɖɔhun. É bló alɔ nú yě bó kplé yě; é bɛ́ lɛ̌ngbɔ́ví lɛ́ɛ dó awa mɛ, bó ɖo nukún kpé dó lɛ̌ngbɔ́ vǐnɔ lɛ́ɛ wú wɛ.”

¹²Mɛ̌ ká sixú sɔ́ alɔgogo tɔn dó jlɛ́ sin e ɖo xu mɛ é? Mɛ̌ ká sixú zé alɔbá tɔn dó jlɛ́ jǐxwé? Mɛ̌ ká sixú bɛ́ kɔ́ e ɖo ayǐkúngban jí ɔ́ dó nǔ mɛ bó jlɛ́? Mɛ̌ ká sixú bɛ́ só ɖaxó ɖaxó lɛ́ɛ ɖó gan jí bó da? Mɛ̌ ká sixú bɛ́ só kpɛví kpɛví lɛ́ɛ ɖó gan jí bó da?

¹³ Mɛ̌ ká sixú mɔ nǔ jɛ linlin Mawu Mavɔmavɔ tɔn wú? Mɛ̌ ká sixú kplɔ́n nǔ Mawu?

¹⁴Mɛ̌ Mawu Mavɔmavɔ ka nɔ kan nǔ byɔ́, bó ná dó mɔ nukúnnú jɛ nǔ mɛ, bó tunwun lě e é ná wa nǔ ɖó sɛ́nxwi jí gbɔn é? Mɛ̌ é ká nɔ́ kan nǔ byɔ́, bɔ mɛ ɔ́ nɔ́ ná ɛ nǔnywɛ́, bó nɔ́ ɖɔ lě e è ɖǒ ná mɔ nukúnnú jɛ nǔ mɛ gbɔn ɔ́ n'i?

¹⁵Akɔta lɛ́ɛ sɔ sin e kun téwún j'ayǐ é ɖo Mawu nukɔn ǎ; yě da gan sɔ kɔ́kwín ɖokpó ɖo nukɔn tɔn ǎ. Akɔta e gbɔn zɔ zɔ lɛ́ɛ fúɖá hú afúntúntún ɖo nukɔn tɔn.

¹⁶Kanlin e ɖo Libáan zungbó mɛ lɛ́ɛ ɔ́, è na bo kplé yě bǐ ɔ́, é kpé bɔ è nǎ dó sá vɔ̌ e jɛ xá Mavɔmavɔ é n'i ǎ. Atín e ɖo Libáan zungbó mɛ lɛ́ɛ ɔ́, yě kpé bɔ è nǎ dó bɔ myɔ e è nǎ dó dó vɔ̌ ɔ́ zo ná é ǎ.

¹⁷Akɔta lɛ́ɛ bǐ kplékplé ɖó zin ɖé ɖo Mawu nukɔn ǎ. Nǔ yǎyá, nǔ tófwe wɛ yě nyí ɖo nukɔn tɔn.

¹⁸ Mɛ̌ wǔ mi ka jló ná jlɛ́ Mawu dó? Étɛ́ ɖɔhun é ká cí?

¹⁹Bǒcyɔ wú wɛ mi ná jlɛ́ ɛ dó a? Bǒcyɔ ɔ́, alɔlyɛ́nzɔ́watɔ́ wɛ sínsín gan bó kɔn, bɔ alɔlyɛ́nzɔ́watɔ́ ɖěvo kɔn siká dó, bó tun kpatágan wlɔ dó ba acɔ́ ná.

²⁰Mɛ e nyí wamamɔnɔ, bó ma sixú zán kwɛ́ sɔ mɔ̌ ǎ ɔ́, é nɔ́ ba atín e ma nɔ jɛ wɔvli ǎ é. Énɛ́ ɔ́ gúdo ɔ́, é nɔ́ ba alɔlyɛ́nzɔ́watɔ́ ɖagbe ɖokpó; alɔlyɛ́nzɔ́watɔ́ e ná sixú bló bǒcyɔ e má ná xo to ǎ é.

²¹Mi tunwun ǎ cé? Mi se ǎ cé? È ɖɔ nú mi sín do ǎ cé? Mi mɔ nukúnnú jɛ lě e è bló ayǐkúngban ɔ́ gbɔn é wú ǎ cé?

²²Mawu ɔ́, axɔ́súzinkpo tɔn ɖo jǐ aga ɖéé; é yi jǐ káká bɔ é kpɔ́n gbɛtɔ́ lɛ́ɛ sɛ́ dó ɔ́, yě nɔ́ cí ayǐsínzɛn ɖɔhun. É vlɔ́n jǐxwé avɔ ɖaxó ɖé ɖɔhun. É vlɔ́n jǐxwé goxɔ ɖɔhun bɔ é nyí nɔtɛn tɔn.

²³Gǎn e ɖo gbɛmɛ fí lɛ́ɛ ɔ́, é sɔ́ yě dó húzú nǔ yǎyá. Mɛ e lɔmɛ acɛkpikpa ɖe ɖo gbɛmɛ fí lɛ́ɛ ɔ́, é zin yě dɛ́ bɔ yě sɔ́ nyí nǔɖé ǎ.

²⁴Yě cí atínvú ɖɔhun: yě nɔ́ kó wú zinzin ǎ, ɖɔ ná dó do wɛ yě nɔ́ ɖe kɛ́ɖɛ́, bɔ jɔhɔn Mawu tɔn nɔ za yě; jɔhɔn ɔ́ nɔ xú yě bɔ a nǎ mɔ nǔɖé ɔ́, yě nɔ́ kó ɖo jɔhɔn mɛ nǔywɛ́ ɖɔhun.

²⁵Mawu mímɛ́ ɔ́ kanbyɔ́ ɖɔ: “Mɛ̌ wú mi ka ná jlɛ́ mì dó? Mɛ̌ sín gbɛ̌ un ka nyí?”

²⁶Mi kpɔ́n jǐxwé aga dɔ̌n sɛ́ dó: Mɛ̌ ká bló sunví lɛ́ɛ? Mɛ̌ ká nɔ́ ná gbe yě bɔ yě nɔ́ ɖo yiyi wɛ, sɔ́ja e ɖo ahwangbénu lɛ́ɛ ɖɔhun? Mɛ e tunwun nyǐkɔ yě ɖokpó ɖokpó tɔn bó nɔ́ ylɔ́ yě ɔ́ wɛ. Hlɔ̌nhlɔ́n tɔn kpó acɛkpikpa tɔn kpó sɔ mɔ̌, bɔ é ylɔ́ yě ɔ́, yě ɖě nɔ́ gɔn gbe yí ǎ.

²⁷Izlayɛ́li, togun Jakɔ́bu tɔn! A nɔ ɖɔ: “Mawu Mavɔmavɔ tunwun nǔ e ɖo gbigbo mì we é ǎ. Hwɛ ce na bo jɔ bónú è ɖo títáfú mì wɛ ɔ́, é nɔ́ ɖɔ nǔɖé n'i ǎ.” Étɛ́wú a nɔ ɖɔ mɔ̌?

²⁸A tunwun ǎ cé? È ɖɔ nú we kpɔ́n ǎ cé? Mawu Mavɔmavɔ ɔ́, Mawu wɛ é nyí káká yi mavɔ. É wɛ ɖó ayǐkúngban ɔ́, sín fí e é bɛ́ sín ɔ́, káká yi fí e é fó dó ɔ́; kanmɛ nɔ gbɔ́jɔ́ ɛ gbeɖé ǎ, nǔ ka nɔ cikɔ n'i gbeɖé ǎ. Nǔnywɛ́ Mawu tɔn ɖó dogbó ǎ.

²⁹É nɔ́ ná hlɔ̌nhlɔ́n ɖěvo mɛ e nǔ cikɔ ná é, bó nɔ́ dó wǔsyɛ́n lanmɛ nú mɛ e agbɔ̌n kpé é.

³⁰Dɔ̌nkpɛvú lɛ́ɛ ɖésú ɔ́, nǔ nɔ́ wá cikɔ nú yě. Mɛ e nyí asúká lɛ́ɛ lɔ nɔ wá j'ayǐ.

³¹Amɔ̌, mɛ e nɔ gán jɛ Mawu Mavɔmavɔ wú lɛ́ɛ ɔ́, hlɔ̌nhlɔ́n ɖěvo nɔ wá nú yě; yě nɔ́ zɔn hɔ̌nsúhɔ́nsú ɖɔhun; yě nɔ́ ɖo wezun kán wɛ, nǔ ká nɔ́ cikɔ nǔ yě ǎ; Yě nɔ́ ɖo yiyi wɛ, hlɔ̌nhlɔ́n yětɔn ka nɔ́ vɔ ǎ.