Read fon Ezayíi 41 Bible Online

Ezayíi 41 - fon bible

Ezayíi 41

¹Mawu ɖɔ: “Mi togun e gbɔn zɔ zɔ lɛ́ɛ mi! Mi nɔ abwɛ̌ xwíí bó ɖótó mì. Togun lɛ́ɛ mi! Mi sɔ́ nǔ bó wá hwɛxɔsá; mi wá ɔ́, mi ná yí xó. Mi nú mǐ nǎ zɔn kpɔ́ yi hwɛxɔsá.

²Nya ɖé ɖo zǎnzǎnhwe jí bó jɛ ali; é gbɔn fí ɖěbǔ ɔ́, é nɔ́ ɖu ɖ'é jí. Mɛ̌ ká sɛ́ ɛ dó? Mɛ̌ wɛ nɔ jó togun lɛ́ɛ n'i? Mɛ̌ wɛ nɔ zé axɔ́sú lɛ́ɛ ɖó acɛ tɔn mɛ? Hwǐ tɔn nɔ́ vúnvún yě, bɔ gǎ tɔn nɔ́ gba yě dó, jɔhɔn dó alɔ nǔywɛ́ mɛ ɖɔhun.

³É nɔ́ zun dó yě jí; é nɔ́ gba yě bléwún bó nɔ́ dín wǔyɛ́yɛ́ afɔyɛ́yɛ́; é yá afɔ káká bɔ a nǎ ɖɔ afɔ tɔn kún nɔ́ jɛ kɔ́ mɛ ó.

⁴Mɛ̌ wɛ zɔ́n nǔ énɛ́ lɛ́ɛ? Nyɛ Mawu Mavɔmavɔ wɛ; nyɛ wɛ nɔ zɔ́n nǔ e nɔ jɛ ɖo gbɛ ɔ́ mɛ lɛ́ɛ sín do. Có nú nǔ nukɔntɔn e jɛ ɔ́ ná bɛ́ ɔ́, un ɖo tɛn tɔn mɛ; nǔ gǔdo gúdo tɔn e ka ná wá jɛ ɔ́, un ná lɛ́ ɖo tɛn tɔn mɛ.

⁵Togun e gbɔn zɔ zɔ lɛ́ɛ mɔ nǔ e jɛ ɔ́, bɔ xɛsi jɛ yě jí. Mɛ e ɖo wɛ̌kɛ́zo ɛnɛ lɛ́ɛ mɛ lɛ́ɛ ɖo sísɔ́sísɔ́ wɛ; yě ɖo sisɛkpɔ́ wɛ, yě ja.

⁶Mɛ lɛ́ɛ nɔ́ dó alɔ yěɖée ɖo azɔ̌ kɔn. Mɛ ɖě nɔ́ ɖɔ nú mɛ ɖě ɔ́ ɖɔ: ‘É yá!’

⁷Alɔlyɛ́nzɔ́watɔ́ nɔ́ ná akɔ́nkpinkpan nǔtuntɔ́; mɛ e nɔ tɛ́ gan ɔ́ nɔ́ ná akɔ́nkpinkpan mɛ e ɖo wan ɔ́ jí é. Yě nɔ́ ɖɔ: ‘Lě e è cá gan ɔ́ gbɔn é nyɔ́.’ Énɛ́ ɔ́ gúdo ɔ́, yě nɔ́ sɔ́ hǔnjɛ́n dó hɛn bǒcyɔ ɔ́ ɖó te.”

⁸ “Mɛsɛntɔ́ ce Izlayɛ́li, ɖǒtó mì; hwi togun Jakɔ́bu tɔn e un sɔ́ é, hwi xɔ́ntɔn ce Ablaxámu kún ɔ́.

⁹Hwi mɛ e un ylɔ́ sín káká fí e gbɛ ɔ́ kponu ɖó ɔ́, hwi mɛ e un ylɔ́ sín to ɖé má yá to ɖé mɛ ɔ́, hwi wɛ un ɖɔ ná ɖɔ: ‘Éeǒ, un jó we dó ǎ; é nyɔ́ wa ɔ́, hwi wɛ un sɔ́; hwi wɛ nyí mɛsɛntɔ́ ce.’

¹⁰Din ɔ́, ma ɖi xɛsi ó, ɖó un ɖo kpɔ́ xá we. Ma ɖo nukún dó gbɛmɛ kpɔ́n wɛ ó, ɖó nyi wɛ nyí Mawu towe. Un ná ná akɔ́nkpinkpan we; un ná gɔ́ alɔ nú we; un ɖo xɛ nya ɖo jǐ we wɛ kpódó aɖisí lɔ ce, ɖuɖéjí lɔ ɔ́ kpó.

¹¹Ɛɛn! Mɛ e ɖo gbě towe nya wɛ lɛ́ɛ bǐ ná ɖu hɛ̌n; yě ná ɖu winnyá. Kɛntɔ́ towe lɛ́ɛ sɔ́ ná nyí nǔɖé ǎ, kún yětɔn ná sú dó.

¹²Mɛ e ɖo za li xá we wɛ lɛ́ɛ ɔ́, a nǎ ba yě káká, a ka sɔ́ ná mɔ yě ǎ; Mɛ e nɔ tɔ́n ahwan we lɛ́ɛ sín kún ná sú dó.

¹³Đó nyɛ Mawu Mavɔmavɔ ɔ́, nyi wɛ nyí Mawu towe. Un hɛn alɔ towe bó ɖo ɖiɖɔ nú we wɛ ɖɔ: ‘Ma ɖi xɛsi ó, un ná gɔ́ alɔ nú we.’ ”

¹⁴Mawu Mavɔmavɔ ɖɔ: “Izlayɛ́li, togun Jakɔ́bu tɔn, hwi mɛ e ma ɖó gǎn ɖé ǎ dohɔ́nví ɖɔhun é, ma ɖi xɛsi ó. Nyɛ Mawu Mavɔmavɔ ɔ́ ɖésú wɛ ja alɔ gɔ́ nú we gbé. Nyɛ Mɛ Mímɛ́ Izlayɛ́li tɔn wɛ ná hwlɛ́n we gán.

¹⁵Un ná sɔ́ we dó húzú blěesónú e kanlin nɔ dɔn é yɔ̌yɔ́ ɖokpó; aɖǔ tɔn lɛ́ɛ ná syɛ́n ɖésú. A nǎ gba só ɖaxó ɖaxó lɛ́ɛ hánnyá, a nǎ zé yě dó húzú afúntúntún; a nǎ zé só kpɛví kpɛví lɛ́ɛ dó húzú nǔywɛ́.

¹⁶A nǎ nyi yě dó jɔ mɛ, bɔ jɔhɔn ná dó alɔ mɛ; axásáxásá jɔhɔn ɖé ná fúnfún yě; lo ɔ́, hwɛ ɔ́, a nǎ sú xó bó j'awǎ ɖó Mawu Mavɔmavɔ wú. A nǎ nɔ́ gó ɖó Mɛ Mímɛ́ Izlayɛ́li tɔn ɔ́ wú.”

¹⁷Wamamɔnɔ lɛ́ɛ kpó lelenɔ lɛ́ɛ kpó ɖo sin ba wɛ; yě ká mɔ ǎ. Kɔ xú yě káká bɔ atán vɔ sín nu yětɔn mɛ; amɔ̌, nyɛ Mawu Mavɔmavɔ ɔ́, un ná yí gbe nú nǔ e byɔ́ mì wɛ yě ɖe é; nyɛ Mawu Izlayɛ́li tɔn ɔ́, un ná jó yě dó ǎ.

¹⁸Un ná ná sin bɔ é ná sa sín só lɛ́ɛ jí; só e ta nǔ ɖěbǔ má ɖe ǎ lɛ́ɛ jí; tɔjɔtɛn ná gbɔn dodo lɛ́ɛ mɛ; un ná sɔ́ fí e nyí akúgbéjí é dó húzú tɔ, bó ná sɔ́ fí e nyí ayǐ xúxú jí é dó húzú tán.

¹⁹Un ná tun sɛ́dlutín kpó kasyatín kpó gbɔn akúgbéjí, bó ná tun míititín kpó olívutín kpó. Un ná tun siplɛ́tín kpó bwisitín kpó, kpó pɛ́ɛntín kpó gbɔn gbě e jí sin ma ɖe ǎ é.

²⁰Énɛ́ ɔ́, mɛ bǐ ná mɔ, mɛ bǐ ná tunwun, mɛ bǐ ná mɔ bó mɔ nukúnnú jɛ wú ɖɔ Mawu Mavɔmavɔ, Mɛ Mímɛ́ Izlayɛ́li tɔn ɔ́ sín nǔwiwa wɛ.

²¹Mawu Mavɔmavɔ, togun Jakɔ́bu tɔn xɔ́sú ɔ́ ɖɔ: “Mi vodún akɔta lɛ́ɛ tɔn lɛ́ɛ mi, mi wá ɖɔ lě e hwɛ mitɔn jɔ gbɔn é; mi wá ɖe nǔ e wú mi kpé ɔ́ xlɛ́.

²²Mi wá ɖɔ nǔ e ná jɛ ɔ́ nú mǐ. Nǔ tɛ́ ka ko jɛ wá yi? Mi ɖɔ bónú mǐ nǎ lin ta mɛ d'é wú kpɔ́n; é gló hǔn, mi ɖɔ nǔ e ná wá jɛ sɔ ɔ́ nú mǐ; énɛ́ ɔ́, mǐ nǎ tunwun nǔ e ɖo nǎ jɛ wɛ é.

²³Ɛɛn, mi ɖɔ nǔ e ɖo nǎ wǎ jɛ wɛ é nú mǐ; énɛ́ ɔ́, mǐ ná tunwun ɖɔ mi lɔ ɔ́ Mawu wɛ mi nyí. Mi vɛ́ kó sixú bló nǔɖé bónú mǐ nǎ mɔ, é sixú nyí nǔ ɖagbe, é sixú nyí nǔ nyanya; énɛ́ ɔ́, mǐ ná ɖó sísí nú mi.

²⁴Amɔ̌, midɛɛ lɛ́ɛ ɔ́, mi xɔ akwɛ́ sɔ nǔ e nyí nǔ yǎyá é ǎ, bɔ nǔ e mi nɔ wa lɛ́ɛ nyí nǔ yǎyá. Mɛ e sɔ́ mi dó ɖó nǔmɛsɛn ɔ́, nǔ gbɛ́hɛn mi ɖɔhun wɛ é nyí.

²⁵Un sɔ́ mɛ ɖokpó ɖó ali jí sín totaligbé bɔ é jǎwe. Nyǐkɔ ce ɖo nu tɔn. É nɔ́ gbídí gǎn lɛ́ɛ ɖó afɔ wú, mɛ ɖo kɔ́ nya wɛ ɖɔhun; é nɔ́ gbídí yě zɛ̌nmɛtɔ́ ɖo ko nya wɛ ɖɔhun.

²⁶Mɛ̌ ká ɖɔ nǔ énɛ́ ɖ'ayǐ bónú mǐ nǎ tunwun? Mɛ̌ ká ko ɖɔ nǔ mɔ̌hun ná wá jɛ bónú mǐ nǎ ɖɔ: ‘Nǔgbó wɛ é ɖɔ’ Mɛ ɖé ɖo mi mɛ bó kpé nǔ mɔ̌hun wú ǎ. Mi ɖɔ xó ɖé bɔ mɛɖé se ǎ.

²⁷Nyi wɛ nyí mɛ nukɔntɔn e ɖɔ nú Sinyɔ́ɔ ɖɔ: ‘Kpɔ́n! Yě ɖíe’ é. Un sɛ́ mɛ ɖokpó dó Jeluzalɛ́mu bɔ é hɛn wɛnɖagbe ɖé bó ná yi dó.

²⁸Un kpɔ́n vodún lɛ́ɛ mɛ káká ɔ́, un mɔ ɖě ɖo yě mɛ bónú é ná ɖɔ nǔ e é lin ɔ́ nú mì ǎ; un mɔ ɖě ɖo yě mɛ bónú un kan nǔ byɔ́ ɛ ɔ́, é ná mɔ sin tɔn bó ná mì ǎ.

²⁹Nǔgbó ɔ́, yě ɖěbǔ nyí nǔɖé ǎ, nǔ e yě nɔ́ wa lɛ́ɛ bǐ wɛ nyí nǔ yǎyá; vodún énɛ́ lɛ́ɛ ɔ́, jɔhɔn kpowun wɛ, bó nyí nǔ tófwe.”