Read fon Ezayíi 42 Bible Online

Ezayíi 42 - fon bible

Ezayíi 42

¹ Mawu ɖɔ: “Mɛsɛntɔ́ ce ɖíe; un hɛn alɔ tɔn, nyi wɛ sɔ́ ɛ, bɔ xomɛ nɔ hun mì dó wǔ tɔn; un sɔ́ yɛ ce ɖó jǐ tɔn, bɔ é ná sɔ́ hwɛjijɔ jínjɔ́n ayǐ gbɔn akɔta lɛ́ɛ mɛ.

²É ná sú xó ǎ, é ná zé gbe yi jǐ ǎ; è ná se gbe tɔn ɖo toligbó lɛ́ɛ xo ǎ.

³É ná nyínyɛ́ fántín e kó tɔ é ǎ, é ná cí myɔ e ko ɖo cící wɛ é ǎ; lo ɔ́, é ná sɔ́ hwɛjijɔ jínjɔ́n ayǐ nǔgbó.

⁴Nǔ ná cikɔ n'i ǎ, kan mɛ ná gbɔ́jɔ́ ɛ káká cóbónú é ná sɔ́ hwɛjijɔ jínjɔ́n ayǐ gbɔn gbɛ ɔ́ mɛ ǎ. Togun e gbɔn zɔ zɔ lɛ́ɛ ná ɖo te kpɔ́n nǔkplɔ́nmɛ tɔn.”

⁵ Mawu Mavɔmavɔ ɖɔ xó nú mɛsɛntɔ́ tɔn; é mɛ e bló jǐxwé, bó vlɔ́n é, é mɛ e ɖó ayǐkúngban kpó nǔ e ɖ'é jí lɛ́ɛ bǐ kpó ɔ́, é mɛ e ná gbɛ gbɛtɔ́ lɛ́ɛ ɖo ayǐkúngban jí, bó ná funfún yě ɔ́, xó e é ɖɔ nú mɛsɛntɔ́ tɔn ɔ́ ɖíe:

⁶ “Nyɛ Mawu Mavɔmavɔ ɔ́, un ylɔ́ we ɖó un ɖo gbejí nú xó e un ɖɔ é; un ná gǎnjɛwú we; un bló we bó ná sɔ́ we dó jɛ akɔ xá gbɛtɔ́ lɛ́ɛ; a nǎ nyí wěziza nú akɔta lɛ́ɛ.

⁷A nǎ hun nukún nú nukúntíntɔ́nnɔ lɛ́ɛ, bó ná ɖe gantɔ́ lɛ́ɛ sín xɔ e mɛ è sú yě dó ɔ́ mɛ, mɛ e ɖo gankpá mɛ ɖo ablu mɛ lɛ́ɛ ɔ́, a nǎ ɖe yě tɔ́n.”

⁸Nyi wɛ nyí Mawu Mavɔmavɔ; mɔ̌ wɛ nyǐkɔ ce nyí; susu e nyí ce ɔ́, un nɔ jó dó nú mɛ ɖé ǎ. Un ka nɔ jó yɛ̌yi e nyí ce ɔ́ dó nú bǒcyɔ ɖé ǎ.

⁹Nǔ nukɔntɔn lɛ́ɛ kó jɛ; yɔ̌yɔ́ e ná jɛ ɔ́ ɖɔ wɛ un ɖe din; un ɖo ɖiɖɔ nú mi wɛ cóbɔ é ná wá jɛ.

¹⁰Mi ji han yɔ̌yɔ́ ɖokpó dó sɔ́ Mawu Mavɔmavɔ su. Mi mɛ e nɔ gbɔn xu jí xu jí lɛ́ɛ mi, nǔɖogbɛ e nɔ́ nɔ xu mɛ lɛ́ɛ mi, togun e gbɔn zɔ zɔ lɛ́ɛ mi, mi kpa susu n'i sín fí e gbɛ ɔ́ kponu ɖó é.

¹¹È nǐ ji han gbɔn toxo e ɖo akúgbéjí lɛ́ɛ mɛ. Mɛ e ɖo gletoxo Kedáa tɔn lɛ́ɛ mɛ lɛ́ɛ ní ji han. Mɛ e ɖo Sɛla toxo mɛ lɛ́ɛ ní j'awǎ; yě nǐ ɖe awǎjijɛ yětɔn xlɛ́ sín só ta aga.

¹²Togun e gbɔn zɔ zɔ lɛ́ɛ ní kpa susu nú Mawu Mavɔmavɔ, bó sú xó dó sɔ́ ɛ su.

¹³Mawu Mavɔmavɔ ɖo zɔnlin jí jǎwe ahwanfuntɔ́ syɛ́nsyɛ́n ɖé ɖɔhun; ahwanfunfun ɖo akpakpa sɔ́ ɛ wɛ ahwan-yitɔ́ ɖɔhun. É sú xó e è nɔ sú, bɔ è nɔ tunwun ɖɔ ahwan bɛ́ é; é ɖe lě e é hú gǎn kɛntɔ́ tɔn lɛ́ɛ gbɔn é xlɛ́ yě.

¹⁴Mawu ɖɔ: “Sín tɛgbɛ ɔ́, un tin, un kɛ nu ǎ. Amɔ̌, din ɔ́, un ɖo azɔn wɛn wɛ nyɔ̌nu e ɖo ajidonu é ɖɔhun; agbɔ̌n kpé mì, un nɔ gbɔjɛ́ ganjí ǎ.

¹⁵Un ná gba só ɖaxó kpó só kpɛví kpó, bɔ gběhan kpó atín kpó e ɖo yě jí lɛ́ɛ bǐ ná xú. Un ná sɔ́ tɔ lɛ́ɛ dó húzú ayǐkúngban xúxú, bɔ tán lɛ́ɛ ná xú.

¹⁶Un ná kplá nukúntíntɔ́nnɔ lɛ́ɛ gbɔn ali ɖé jí, ali e yě ma gbɔn gbeɖé ǎ é jí. Yědɛɛ lɛ́ɛ ɔ́, un ná sɔ́ zǐnflú dó húzú wěziza nú yě, bó ná gbígbá nǔ e wú yě ná klɛ́n afɔ dó é. Nǔ e un lɛ́n bó ná wa lɛ́ɛ nɛ́. Un ná jó dó gbeɖé ǎ; un ná bló géé.

¹⁷Mi mɛ e nɔ gán jɛ vodún wú, bó nɔ́ ɖɔ nú bǒcyɔ mitɔn lɛ́ɛ ɖɔ yě wɛ nyí nǔmɛsɛn émítɔn lɛ́ɛ ɔ́, mi ná j'agɔ dó gǔdo, mi ná ɖu winnyá.”

¹⁸Tókúnɔ e mi, mi ɖótó ganjí; Nukúntíntɔ́nnɔ e mi, mi ɖó nukún te ganjí.

¹⁹Mɛ̌ wɛ tɔ́n nukún? Mɛsɛntɔ́ ce jɛ́n ná nyí. Mɛ̌ wɛ kú tó? Mɛ e un sɛ́ dó ɔ́ jɛ́n ná nyí. Mɛ̌ ká tɔ́n nukún gbeyíɖɔ Mawu tɔn ɖɔhun? Mɛ̌ ká tɔ́n nukún mɛsɛntɔ́ Mawu Mavɔmavɔ tɔn ɖɔhun?

²⁰É mɔ nǔ gěgé; é ká sɔ́ flín ɖě ǎ. Tó tɔn nɔ́ se nǔ ganjí; é ká se xó ɖě ǎ.

²¹Énɛ́ ɔ́, Mawu Mavɔmavɔ jló ná ɖe lě e sɛ́n tɔn nyí nǔ ɖaxó sɔ, bó nyɔ́ sɔ ɔ́ xlɛ́, ɖó é ɖo gbejí nú xó e é ɖɔ é.

²²Togun ɔ́ ɖíe è vɔ bǐ e; è bɛ̌ nǔ tɔn bǐ. Mɛ tɔn lɛ́ɛ bǐ ɖíe húzú gantɔ́ e; yě bǐ ɖíe è sú dó xɔ mɛ e! È nɔ mɔ yě dó mɔ nǔ e è bɛ̌ wá sín ahwangbénu é, mɛ e ahwan wlí é. Mɛ ɖé ká kɛ nu d'é wú ǎ, mɛ ɖé zin alɔ dó akɔ́n bó ɖɔ: “Mi bɛ́ yě nú mì” ǎ.

²³Mɛ̌ ká ɖo mi mɛ bó ná wlí tó xó énɛ́ wú? Mɛ̌ ká ná ɖótó xó énɛ́? Bɛ́ sín din ɔ́, mɛ̌ ká ná nɔ se?

²⁴Mɛ̌ ká jó Izlayɛ́li, togun Jakɔ́bu tɔn ɔ́ nú mɛ e bɛ́ nǔ tɔn lɛ́ɛ bǐ é? Mɛ̌ ká jó e nú mɛ e vɔ ɛ lɛ́ɛ? É má nyí Mawu Mavɔmavɔ e mǐ hu hwɛ dó é wɛ a? Izlayɛ́li jló ná xwedó ali e Mawu tɔn ɖe n'i é ǎ; é ɖótó sɛ́n tɔn ǎ.

²⁵Énɛ́ ɔ́ wú wɛ Mawu kɔn xomɛsin tɔn dó togun tɔn jí, bó kɔn adǎnú e è nɔ wa ɖo ahwangbénu ɔ́ dó jǐ tɔn. Xomɛsin Mawu tɔn bɔ myɔ lɛ́ lɛ̌ dó Izlayɛ́li bǐ. Ayi tɔn ka mɔ nǔ ǎ. Myɔ bǐ wɛ é ji có bo ká lin tamɛ kpɔ́n ǎ.