Read fon Ezayíi 43 Bible Online

Ezayíi 43 - fon bible

Ezayíi 43

¹Din ɔ́, Izlayɛ́li togun Jakɔ́bu tɔn, Mawu Mavɔmavɔ e ɖó we ɔ́, xó e é ɖɔ ɔ́ ɖíe; Mawu Mavɔmavɔ e bló we ɔ́, xó e é ɖɔ nú we ɔ́ ɖíe: “Ma ɖi xɛsi ó, un xɔ gbɛ nú we; un ylɔ́ we, ce wɛ a nyǐ.

²A ɖo tɔ mɛ gbɔn wɛ ɔ́, un ná ɖo kpɔ́ xá we; a ɖo tɔ gbo wɛ ɔ́, a nǎ kú tɔ ǎ. A ɖo zɔnlin ɖi gbɔn myɔ mɛ wɛ ɔ́, a nǎ ji myɔ ǎ, myɔ ná wa nǔɖé nú we ǎ.

³Đó nyɛ Mawu Mavɔmavɔ wɛ nyí Mawu towe; nyɛ Mɛ Mímɛ́ Izlayɛ́li tɔn ɔ́, nyɛ wɛ nyí Mɛhwlɛ́ngántɔ́ towe. Un ná Ejípu dó xɔ gbɛ nú we, un sɔ́ Etiopíi kpó Seva kpó jó ɖó tɛn towe mɛ.

⁴Nǔgbó wɛ, a xɔ akwɛ́ nukún ce mɛ, a ɖo ayi ce mɛ, un yí wǎn nú we. Énɛ́ ɔ́ wú wɛ un fɔ gbɛtɔ́ jó ɖó tɛn towe mɛ, un fɔ togun jó dó ɖyɔ́ we.

⁵Ma ɖi xɛsi ó, un ɖo kpɔ́ xá we; un ná kplá vǐ towe lɛ́ɛ wá sín zǎnzǎnhwe jí, un ná ylɔ́ mɛ towe lɛ́ɛ kplé sín gbadahwe jí.

⁶Un ɖɔ nú Totaligbé ɖɔ: ‘Jǒ yě dó!’ Bó ɖɔ nú Tofɔligbé ɖɔ: ‘Ma hɛn yě ɖó te ó.’ Mi kplá vǐ ce súnnu lɛ́ɛ wá nú mì sín dɔ̌n, bó kplá vǐ ce nyɔ̌nu lɛ́ɛ wá nú mì sín fí e gbɛ ɔ́ kponu ɖó é.

⁷Mi kplá mɛ e wú nyǐkɔ ce ɖe lɛ́ɛ bǐ wá; mi kplá mɛ e un ɖó lɛ́ɛ bǐ wá, mi kplá mɛ e un bló lɛ́ɛ bǐ wá, Mi kplá yě wá bónú yě ná nɔ kpa susu nú mì.”

⁸È nǐ dɔn togun élɔ́ yi hwɛ nukɔn; é ɖó nukún, é ká nɔ́ mɔ nǔ ǎ, é ɖó tó, é ká nɔ́ se nǔ ǎ.

⁹Akɔta lɛ́ɛ ní sɛ yěɖée kplé, togun lɛ́ɛ ní kplé yěɖée. Éénɛ́! Vodún tɛ́ ká ɖo vodún yětɔn lɛ́ɛ mɛ, bó sixú ɖɔ nǔ e ná wá jɛ ɔ́ nú mǐ? Abǐ vodún tɛ́ ká ɖo yě mɛ, bó sixú ɖɔ nǔ e ko jɛ wá yi ɔ́ nú mǐ? Yě ní ba mɛ e ná ɖe kúnnu nú yě lɛ́ɛ, bó ná dó ɖe xlɛ́ ɖɔ hwɛ émítɔn jɔ. Kúnnuɖetɔ́ énɛ́ lɛ́ɛ ní ɖótó yě ganjí, bó yí gbe ɖɔ xó ɔ́ nǔgbó wɛ.

¹⁰Mawu Mavɔmavɔ ɖɔ nú togun tɔn ɖɔ: “Midɛɛ lɛ́ɛ wɛ nyí kúnnuɖetɔ́ ce, mi wɛ nyí mɛsɛntɔ́ ce e un sɔ́ é, bónú mi ná tunwun bó ɖi nǔ nú mì, bó mɔ nukúnnú jɛ mɛ ɖɔ nyɛ wɛ nyí Mawu. Mawu ɖě kó ɖe dó nukɔn nú mì ǎ; ɖo gǔdo ce ɔ́, Mawu ɖě ká ná ɖe ǎ.

¹¹Nyɛ wɛ nyí Mawu Mavɔmavɔ; nyi ɖokpónɔ géé wɛ nyí mɔ̌. Nyɛ mɛ vo ɔ́, mɛhwlɛ́ngántɔ́ ɖě sɔ́ ɖe ǎ.

¹²Nyɛ wɛ hwlɛ́n mi gán, nyɛ wɛ ɖɔ un ná hwlɛ́n mi gán bɔ mi se. Nǔmɛsɛn to ɖěvo mɛ tɔn e è nɔ mɔ ɖo xwé mitɔn gbe é wɛ ǎ. Mi ɖe kúnnu nú mì ɖɔ nyi wɛ nyí Mawu,

¹³bó ná nyí Mawu káká sɔ́yi; mɛ ɖé sixú yí nǔ sín así ce ǎ, nǔ e un bló ɔ́, mɛɖé ká nɔ́ húzú ǎ.”

¹⁴Xó e nyɛ Mawu Mavɔmavɔ, Mɛ Mímɛ́ Izlayɛ́li tɔn Mɛhwlɛ́ngántɔ́ mitɔn ɔ́ ɖɔ ɔ́ ɖíe: “Mi wú wɛ un sɛ́ mɛ ɖokpó dó Babilɔ́nu; un ná fó hɔntogbó e è dǒ toxo ɔ́ nu lɛ́ɛ. Énɛ́ ɔ́, awǎ e jɛ wɛ Babilɔ́nunu lɛ́ɛ ɖe ɔ́ ná húzú gbɛvíhan.

¹⁵Nyɛ wɛ nyí Mawu Mavɔmavɔ, Mɛ Mímɛ́ mitɔn; nyi wɛ ɖó Izlayɛ́li, nyi wɛ nyí axɔ́sú mitɔn.”

¹⁶Đ'ayǐ xóxó ɔ́, Mawu Mavɔmavɔ ɖe ali ɖé gbɔn xu mɛ; é ɖe ali gbɔn sin ɖaxó ɖé mɛ, sin ɔ́ ɖo adǎn jí.

¹⁷É kplá ahwangɔnu syɛ́nsyɛ́n ɖé bó wá sú kún yětɔn dó, é sú ahwangɔnu ɔ́ kpó ahwankɛkɛ́ tɔn lɛ́ɛ kpó sɔ́ lɛ́ɛ kpó sín kún dó; yě bǐ j'ayǐ bɔ te sísí gló; yě ji kɛn myɔtágbɛ́nkan ɖɔhun.

¹⁸Xó e Mawu ɖɔ ɔ́ ɖíe: “Mi ma sɔ́ lin nǔ e jɛ wá yi lɛ́ɛ kpɔ́n ó; mi ma sɔ́ nǔ e jɛ ɖo xóxó hwenu lɛ́ɛ ɖó hǔn mɛ ó,

¹⁹ɖó un ná bló nǔ yɔ̌yɔ́ ɖěvo. Nǔ ɔ́ ko jǎwe bɔ è ko ɖo mimɔ sɛ́ dó wɛ; mi ko ɖo nǔ ɔ́ mɔ wɛ ǎ cé? Nǔgbó wɛ, un nǎ tɔ́n ali ɖokpó gbɔn gbětótló mɛ, un ná ná gbe bɔ tɔsisa ná jɔ gbɔn ayǐkúngban xúxú lɛ́ɛ jí.

²⁰Gběkanlin lɛ́ɛ, cukú gbě tɔn lɛ́ɛ, kpó tátábolí lɛ́ɛ kpó ná nɔ́ kpa susu nú mì, ɖó un ná gbe bɔ tɔ ɖo sisa wɛ gbɔn gbětótló mɛ, un ná gbe bɔ tɔsisa gbɔn ayǐkúngban xúxú énɛ́ lɛ́ɛ jí. Nǔgbó wɛ, un jló ná ná sin togun e un sɔ́ é;

²¹togun énɛ́ e un bló nú nyiɖée é ná kpá susu nú mì.”

²²Mawu ɖɔ: “Izlayɛ́li, nyɛ wɛ a nɔ ylɔ́ ǎ; Jakɔ́bu togun, kɔ wɛ un ko ci nú we.

²³Nyɛ wɛ a nɔ hu lɛ̌ngbɔ́ví ná ǎ. Nyɛ wɛ a nɔ wlí yɛ̌yi ná ǎ. È ɖɔ nyi sɔ́ we dó ɖó kannumɔ, bó nɔ́ ɖɔ dandan hwi ní ná nǔ mì, abǐ un nɔ cí kɔ jí nú we, bó nɔ́ ɖɔ hwi ní dó zǎlínkpɔ́n zo nú mì; adingban wɛ.

²⁴Nyɛ wɛ a ka nɔ xɔ nǔ wǎnɖagbenɔ axivɛ́nu lɛ́ɛ ná ǎ. É ká nyí nyi wɛ a nɔ ná kanlin e a nɔ hu lɛ́ɛ sín jǒ ǎ. É nyɔ́ wá ɔ́, nǔ e a nɔ wa nyi do lɛ́ɛ wɛ a sɔ́ dó húzú mì kannumɔ. Nǔ nyanya e dó sin wɛ a ɖe lɛ́ɛ cikɔ nú mì.

²⁵Amɔ̌, nyɛ wɛ sɔ́ hwɛ towe lɛ́ɛ kɛ we, ɖó é jló mì mɔ̌; un ka sɔ́ ná lɛ́ wá jí ǎ.

²⁶Nǔ e sín hwɛ dó mì wɛ a ɖe ɔ́, lɛ̌ vɔ́ wá jí. Mǐ ná ɖɔ hwɛ dó mǐɖée. Đɔ nǔ e ɖe xlɛ́ ɖɔ hwɛ towe jɔ e.

²⁷Tɔ́gbó towe nukɔntɔn ɔ́ ɖíe kó hu hwɛ e, ɖɛ̌mɛnu towe lɛ́ɛ fɔ́n gǔ dó jǐ ce.

²⁸Énɛ́ ɔ́, un kɔ́n gǎn gǎn e un sɔ́ lɛ́ɛ, un jó Jakɔ́bu togun ɔ́ bɔ è gba, un jó Izlayɛ́li dó bɔ é húzú slǎmɛɖɔnú nú kɛntɔ́ tɔn lɛ́ɛ.”