Read fon Ezayíi 47 Bible Online

Ezayíi 47 - fon bible

Ezayíi 47

¹ Mawu ɖɔ: “Đyɔ̌vǐ Babilɔ́nu, jɛ te sín axɔ́súzinkpo jí; jǐnjɔ́n kɔ́gúdu mɛ. Toxo Babilɔ́nunu lɛ́ɛ tɔn e, jǐnjɔ́n kɔ́ mɛ, ma sɔ́ ba zinkpo ó. È sɔ́ ná nɔ́ ylɔ́ we ɖɔ nyɔ̌nu fífá, nyɔ̌nu ɖagbe ɖagbe ɖě ǎ.

²Yi jɛ sé ta bó li linfín; ɖe avɔ sín nukún mɛ; kplɔ́ sɛ́ya towe d'aga nú asá towe jɛ wěxo, nú a nǎ gbo tɔ.

³Mɛ lɛ́ɛ ná mɔ we ɖo mɛ̌ jɔgbe, yě ná mɔ nǔ e hwlá wɛ a ɖe ɔ́. Un ná ba hlɔn, mɛ ɖěbǔ ná sixú hɛn mì ɖó te ǎ.”

⁴Mɛ e nɔ hwlɛ́n mǐ ɔ́, nyǐkɔ tɔn nɔ́ nyí Mawu Mavɔmavɔ Nǔbǐwúkpétɔ́, Mɛ Mímɛ́ Izlayɛ́li tɔn.

⁵Mawu ɖɔ: “Babilɔ́nu, ɖǒ nu abwɛ̌ bó jínjɔ́n ayǐ; yi hɔn hwlá cí ablu mɛ fí ɖé, ɖó è sɔ́ ná nɔ́ ylɔ́ we ɖɔ ‘Gǎn axɔ́súɖuto lɛ́ɛ tɔn’ ɖě ǎ.

⁶Xomɛ sin mì dó togun ce wú; énɛ́ ɔ́, un jó mɛ e nyí ce lɛ́ɛ nú we dó dó winnyá yě. Nǔ yětɔn ká blá wǔ nú we ǎ; a zǎn acɛ e a ɖǒ ɔ́ dó dó tagba nú degénɔ lɛ́ɛ zɛ jlɛ̌ wú.

⁷A nɔ ɖɔ: ‘Un ná nɔ gbɛ káká sɔ́yi, un ná ɖu gǎn ɖo gbɛ ɔ́ nu káká sɔ́yi.’ A ka lin tamɛ dó nǔ e ɖo jijɛ wɛ lɛ́ɛ wú ǎ; a lin nǔ e ná wá jɛ sɔ ɔ́ kpɔ́n ǎ.

⁸ Din ɔ́, gbɛɖutɔ́, ɖǒtó mì; a jǐnjɔ́n ayǐ towe, bó vo bó nɔ ɖɔ dó ayi mɛ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ; un ná nyí asúkúsi gbeɖé ǎ; vǐ ce lɛ́ɛ ɖě ká ná hwe gbeɖé ǎ.’

⁹É nyɔ́, gbe ɖokpó ɔ́ wɛ adǎn we énɛ́ lɛ́ɛ bǐ ká ná gbo we ɖo ajijimɛ. A sɔ́ ná ɖó vǐ ǎ, a nǎ húzú asúkúsi. Azě towe lɛ́ɛ kpó majíki towe lɛ́ɛ kpó ná ɖo fínɛ́, có nǔ énɛ́ lɛ́ɛ bǐ ká ná gbo we.

¹⁰Dǎka e a nɔ xo lɛ́ɛ wú wɛ a nɔ ɖeji dó; a nɔ́ ɖɔ: ‘Mɛ ɖé mɔ mì ǎ.’ Nǔnywɛ́ towe kpó nǔ e a tunwun ɔ́ kpó wɛ flú we, bɔ a nɔ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ.’

¹¹Nǔgbó wɛ, awě ɖokpó ná xo we, bɔ a nǎ sixú gló ǎ; adǎn baɖabaɖa ɖokpó ná gbo we, bɔ a nǎ sixú nya ta ɖ'é nu ǎ. Jǐ ɖaxó ma ɖó ayi tɔn ɖé ná wá fyán we.

¹²A fɔ́n hǔn, nɔ ɖo azě gbo mɛ wɛ, bó nɔ́ ɖo majíki bló wɛ. Sín vǔ wɛ a ko ván kan d'é wú sín, bó tunwun ɖɔ nǔ ná nyɔ́ nú émí ɖ'é mɛ abǐ émí ná dó dó xɛsi nú mɛ.

¹³A nɔ ɖo tagba jɛ wɛ, bó nɔ́ ɖo nǔ kan kpé wɛ gbɔn fí bǐ. Yě mɛ énɛ́ lɛ́ɛ e nɔ́ kpɔ́n jǐxwé, bó nɔ́ kpɔ́n sunví lɛ́ɛ, bó nɔ́ ɖɔ nǔ e ná jɛ dó jǐ towe lɛ́ɛ nú we ɖo sun mɛ sun mɛ lɛ́ɛ ɔ́, yě ní bó wá hwlɛ́n we gán din bó!

¹⁴Nǔ e nɔ́ gbo sɛníyɔ é wɛ ná gbo yě; yě ná ji bó kɔn afín; yě ɖě ná xo zo zlɛ́ ǎ; myɔ ɔ́ ná syɛ́n hú myɔkán e è nɔ dó ɖa wɔ̌xúxú é tawun; myɔ ɔ́ ná nyí adogwle mɛ myɔ ɖé kpowun bɔ è nǎ xú ǎ.

¹⁵Nǔ e ná gbo mɛ e a nɔ ɖo kan ván wɛ, bó nɔ́ ɖo nǔ kan ɖo gɔ̌n yětɔn wɛ, sín vǔ lɛ́ɛ é nɛ́. Yě bǐ wɛ ná ba ali ɖó ta wú; mɛ ɖokpó ɖokpó ná yi fí e wú é kpé é; yě mɛ ɖěbǔ ná hwlɛ́n we gán ǎ.”