Read fon Ezayíi 48 Bible Online

Ezayíi 48 - fon bible

Ezayíi 48

¹Jakɔ́bu togun e mi, mi ɖótó; mi nɔ ɖɔ Izlayɛ́li ví wɛ émí nyí, bó jɔ ɖo Judáa kún mɛ. Mi nɔ xwlé nǔ dó Mawu Mavɔmavɔ nyíkɔ mɛ, mi nɔ xomlá Mawu Izlayɛ́li tɔn ɖo ɖɛ mitɔn lɛ́ɛ mɛ. Lo ɔ́, nǔ e ɖɔ wɛ mi ɖe ɔ́ ká yi xo mitɔn mɛ ǎ, mi nɔ wa nǔ ɖó sɛ́nxwi jí ǎ.

²Mi nɔ ylɔ́ miɖée ɖɔ toxo mímɛ́ ɔ́ mɛ nu, mi nɔ gán jɛ Mawu Izlayɛ́li tɔn e nyǐkɔ tɔn nɔ nyí “Mawu Mavɔmavɔ Nǔbǐwúkpétɔ́” ɔ́ wú; din ɔ́, mi bo ɖótó xó élɔ́:

³“Nǔ nukɔntɔn e jɛ lɛ́ɛ ɔ́, un ko ɖɔ yě sín tɛgbɛ; un ko ɖɔ xó tɔn; un ɖɔ bɔ è se; Ée é wá yá é ɔ́, un sí te d'é wú cɛ́jú mɛ, bɔ nǔ énɛ́ lɛ́ɛ bǐ jɛ.

⁴Un ka tunwun mi: ta wɛ mi nɔ syɛ́n, nǔ wɛ mi nɔ xwe, tó wɛ mi nɔ tlí.

⁵Énɛ́ ɔ́ wú wɛ un ko ɖɔ nǔ énɛ́ lɛ́ɛ nú mi ɖ'ayǐ xóxó; un ko ɖɔ nú mi cóbɔ nǔ énɛ́ lɛ́ɛ ná jɛ. Un ɖɔ nú mi bónú mi ma wá ɖɔ vodún émítɔn wɛ bló nǔ énɛ́ lɛ́ɛ ó; bónú mi ma wá ɖɔ bǒcyɔ émítɔn e è sɔ́ kpo dó kpa é, abǐ ée è sɔ́ gan dó kɔn ná é wɛ bló ó.

⁶Nǔ e un ɖɔ ɖ'ayǐ ɖɔ é ná jɛ bɔ mi se lɛ́ɛ ɔ́, mi mɔ bɔ bǐ jɛ. Étɛ́wú mi ma ka ná yí gbe ɖɔ un ɖɔ nǔɖé ɔ́, nǔ ɔ́ nɔ́ jɛ ǎ? Din ɔ́, bɛ́ sín égbé ɔ́, nǔ yɔ̌yɔ́ e ɖo nǎ jɛ wɛ lɛ́ɛ ɔ́, un ná ɖɔ bɔ mi ná se. Nǔ énɛ́ lɛ́ɛ ɔ́, hwlǎhwlá wɛ yě ɖe, bɔ mi mɔ do ná ɖěbǔ ǎ.

⁷Ényí nǔ xóxó wɛ ǎ, din wɛ un ná ɖó nǔ énɛ́ lɛ́ɛ ayǐ; káká wá jɛ égbé ɔ́, mi se nǔ mɔ̌hunkɔ kpɔ́n gbeɖé ǎ; hǔn, mi sixú ɖɔ émí kó tunwun ɖ'ayǐ ǎ.

⁸È nǎ ɖɔ lɔ ɔ́, mi wlí tó wú ǎ, mi jló ná mɔ nǔ jɛ nǔɖé mɛ ǎ; mi ka kú hǔn bó ba do ná gbeɖé ǎ. Un tunwun ɖɔ mɛsaɖutɔ́ wɛ nú mi; sín gbe e gbe è ji mi ɔ́, è sun nyǐ mi ɖɔ gbejímánɔtɔ́.

⁹Amɔ̌, un ɖó xomɛsin ce te, ɖó nyǐkɔ ce wú; un ɖe mi sín nǔ nyanya mɛ, ɖó susu ce wú; un gbɛ́ ɖɔ un kún sɔ́ ná sú kún mitɔn dó ó.

¹⁰Un ɖe nǔ kwíji kwíji sín mi mɛ; é ká nyí lě e è nɔ xo zo dó kpatágan bó nɔ́ ɖe nǔ kwíji kwíji sín mɛ ɔ́ ɖɔhun ǎ. Lo ɔ́, wǔvɛ́ sín zo wɛ un xo dó mi.

¹¹Ée un wa nǔ gbɔn mɔ̌ ɔ́, nyi ɖokpónɔ géé wú wɛ, ɖó un sixú yí gbe bɔ è sɔ nyǐkɔ ce xo kɔ́ ǎ; susu e nyí ce é ɔ́, un jló ná sɔ́ nú mɛ ɖěvo ǎ.”

¹² Mawu ɖɔ: “Togun Jakɔ́bu tɔn, ɖǒtó mì; Izlayɛ́li, hwi mɛ e un ylɔ́ ɔ́, ɖǒtó mì. Mɛ ɖokpó ɔ́ nyí wɛ jɛ́n un kpo ɖe tɛgbɛ; nyi wɛ ɖo bǐbɛ́mɛ, bó lɛ́ ɖo vivɔnu.

¹³Nyi ɖésú wɛ sɔ́ alɔ ce dó ɖó ayǐkúngban ɔ́ ayǐ, nyi wɛ vlɔ́n jǐnukúnsin ɔ́ avɔ ɖɔhun; un ylɔ́ ayǐkúngban kpó jǐnukúnsin kpó lě kpowun ɔ́, tlóló jɛ́n yě nɔ́ wá.

¹⁴Mi kplé miɖée, mi bǐ ɖótó: Un ɖó xɔ́ntɔn ɖokpó, bɔ nǔ e lin dó Babilɔ́nu wú wɛ un ɖe ɔ́, é ná bló, é ná ɖe hlɔ̌nhlɔ́n ce xlɛ́ Babilɔ́nunu lɛ́ɛ. Mɛ̌ ká ɖo mi mɛ bó kó ɖɔ nǔ énɛ́ ɔ́ ná jɛ?

¹⁵Nyɛ wɛ ɖɔ xó, nyɛ wɛ; nyɛ wɛ ylɔ́ ɛ, nyɛ wɛ ɖɔ bɔ é wá. É sɔ́ nǔɖé bó ná bló ɔ́, un ná bló bɔ bǐ ná nyɔ́.

¹⁶Mi sɛkpɔ́ mì bó ná se xó élɔ́: Sín bǐbɛ́mɛ ɔ́, un ko ɖɔ xó sɔ́ nyi wɛn. Sín gbe e gbe nǔ énɛ́ lɛ́ɛ bɛ́ ɔ́, un ɖo fínɛ́.” Din ɔ́, Aklúnɔ Mavɔmavɔ wɛ sɛ́ mì dó, bɔ yɛ tɔn ɖo kpɔ́ xá mì.

¹⁷Xó e Mawu Mavɔmavɔ, Mɛhwlɛ́ngántɔ́ towe, Mɛ Mímɛ́ Izlayɛ́li tɔn ɖɔ ɔ́ ɖíe: “Nyɛ Mawu Mavɔmavɔ ɔ́, nyɛ wɛ nyí Mawu towe; nyi wɛ ná ɖɔ nǔ e ná nyɔ́ nú we ɔ́ nú we. Nyi wɛ ɖo ali xlɛ́ we wɛ ɖo ali e a mlɛ̌ ɔ́ jí.

¹⁸Ényí a ko wlí tó nǔ e un zɔ́n we lɛ́ɛ wú wɛ ɔ́, nyɔ̌ná sín tɔ ɖé ná kó sa wá gɔ̌n towe; hwlɛngán ɔ́ ná kó xo wá gɔ̌n towe xu ɖɔhun.

¹⁹Vǐ towe lɛ́ɛ ná sukpɔ́ wɔɖɔɖɔ xuta kɔ́ ɖɔhun, nyǐkɔ yětɔn ná ɖo nukɔn ce tɛgbɛ.”

²⁰ Izlayɛ́li ví e mi, mi tɔ́n sín Babilɔ́nu, mi yá wǔ, mi gosín fínɛ́. Mi jlá xó énɛ́ ɔ́ kpódó awǎjijɛ kpó, káká yi fí e gbɛ ɔ́ kponu ɖó é. Mi jlá, mi ɖɔ gbɔn fí bǐ ɖɔ: “Mawu Mavɔmavɔ hwlɛ́n mɛsɛntɔ́ tɔn Izlayɛ́li ɔ́.”

²¹É nɔ́ xlɛ́ ali mɛ e nyí étɔn lɛ́ɛ gbɔn gbětótló mɛ, bɔ sinnugblá ká nɔ sin yě ǎ. É nɔ́ dɔn sin sín só lɛ́ɛ mɛ nú yě; é nɔ́ zɛ só ɔ́ bɔ sin nɔ tɔ́n bó nɔ́ sa.

²² Amɔ̌, Mawu Mavɔmavɔ ɖɔ: “Nyɔ̌ná énɛ́ lɛ́ɛ nyí mɛdídá lɛ́ɛ tɔn ǎ.” Xó lómílómí wegɔ́ ɔ́