Read fon Ezayíi 5 Bible Online

Ezayíi 5 - fon bible

Ezayíi 5

¹ Un ná ji han dó mlá xɔ́ntɔn ce ná; han ɔ́ ɖɔ xó dó xɔ́ntɔn ce kpó vǐwungbo tɔn kpó wú. Xɔ́ntɔn ce ɖó vǐwungbo ɖokpó; vǐwungbo ɔ́ ɖo kpó ɖé jí, nǔkún nɔ́ nyɔ́ ganjí ɖo kpó ɔ́ jí.

²Xɔ́ntɔn ce lɛ gle ɔ́, bó cyán awǐnnyaglo sín gle ɔ́ mɛ. É tun vǐwuntín e nyɔ́ ganjí ɔ́ ɖ'é jí, é bló atɔxwɛ ɖokpó ɖó gle ɔ́ tɛ́ntin, bó kun do e mɛ è nɔ li vǐwun ɖe ɔ́ ɖokpó. É ɖo nukún ɖó wɛ ɖɔ vǐwungle émítɔn ná ná sínsɛ́n ɖagbe, lo ɔ́, é ná sínsɛ́n ɖagbe ɖěbǔ ǎ.

³Énɛ́ ɔ́, xɔ́ntɔn ce ɖɔ: “Din ɔ́, mi mɛ e nɔ́ nɔ Jeluzalɛ́mu lɛ́ɛ, mi mɛ Judáanu lɛ́ɛ ɔ́, mi wɛ ná gbo hwɛ nú nyi kpó vǐwungle ce kpó.

⁴Étɛ́ ká kpo bɔ un ɖó ná bló nú vǐwungle ce bó má kó bló ǎ? Étɛ́wú wɛ hwenu e un ɖó nukún ɖɔ é ná ná sínsɛ́n ɖagbe ɔ́, é sɛ́n sínsɛ́n gblégblé ɖé lɛ́ɛ? Étɛ́wú ká wɛ?

⁵Din ɔ́, un ná ɖɔ nǔ e un ná wa xá vǐwungle ce ɔ́ nú mi: un ná hɔn kpá e un dó lɛ́ lɛ̌ dó é, bɔ kanlin lɛ́ɛ ná ɖu. Un ná mu dǒ e un mɛ lɛ́ lɛ̌ dó é, bɔ aligbɔntɔ́ lɛ́ɛ ná gbídí i.

⁶Un ná jó e dó bɔ bǐ ná nyí gběhan; mɛɖé ná xwa ǎ, mɛɖé ná kpé nukún d'é wú ǎ, wunkan ná vun blá ɛ bǐ; un ná gbɛ́, bɔ akpɔ́kpɔ́ ɖěbǔ ná ɖó, bɔ jǐ ná ja d'é jí ǎ.”

⁷Mawu Mavɔmavɔ Nǔbǐwúkpétɔ́ ɔ́ sín vǐwungle ɔ́, akɔta Izlayɛ́li tɔn wɛ. Vǐwuntín e nyɔ́ nukún tɔn mɛ ɖésú ɔ́, Judáa togun ɔ́ wɛ. Mawu Mavɔmavɔ ɖó nukún yě ɖɔ yě ná nɔ nyi sɛ́n, lo ɔ́, sɛ́n wɛ yě nɔ́ gba; Mawu Mavɔmavɔ ɖó nukún yě ɖɔ yě ná nɔ́ xwedó hwɛjijɔ, lo ɔ́, alě e ná wɛ mɛ e táfú wɛ yě ɖe lɛ́ɛ kɛ́ɖɛ́ wɛ è nɔ́ se.

⁸Heelú yě mɛ e nɔ ɖo xwé sá dó xwé jí wɛ, bó nɔ́ ɖo gle kán dó gle jí wɛ, káká bó nɔ́ yí tɛn lɛ́ɛ bǐ, bɔ yě ɖokpónɔ nɔ́ nɔ to ɔ́ mɛ lɛ́ɛ.

⁹Mawu Mavɔmavɔ Nǔbǐwúkpétɔ́ ɔ́ zin alɔ dó akɔ́n bó ɖɔ nú mì ɖɔ: “Xwé tobutóbú énɛ́ lɛ́ɛ bǐ ná gba dandan; xɔ ɖaxó ɖaxó ɖagbe ɖagbe énɛ́ lɛ́ɛ bǐ ná jɛ vɔ̌; mɛ ɖěbǔ ná nɔ xɔ énɛ́ lɛ́ɛ mɛ ǎ.

¹⁰È zě vǐwungle ɛtáa atɔn ɖó te ɔ́, é ná ná vɛ̌ɛn lǐtli kanɖé wǒ (50) ǎ. Mɛ ɖé dó blěe kilóo kanwe ko (100) ɔ́, kilóo wǒ jɛ́n é ná ya.”

¹¹Heelú mɛ e nɔ fɔ́n zǎn dó ahan syɛ́nsyɛ́n wú, bó nɔ́ ɖo vɛ̌ɛn nu wɛ káká bɔ zǎn nɔ sɛ yi lɛ́ɛ.

¹²Yě nɔ́ nu ahan mú, bó nɔ́ dó hǔn gbe, bó nɔ́ j'awǎ; yě nɔ́ xo kanhún, bó nɔ́ xo gbǎhún, yě nɔ́ kún kpete. Lo ɔ́, yě nɔ́ tunwun ɖɔ Mawu Mavɔmavɔ ɖo azɔ̌ wa wɛ ǎ; yě nɔ́ mɔ azɔ̌ e wa wɛ é ɖe ɔ́ ǎ.

¹³Énɛ́ ɔ́ wú wɛ Mawu ɖɔ: “È nǎ wlí togun ce yi to ɖěvo mɛ, ɖó yě tunwun nǔ e wa wɛ un ɖe é ǎ. Tonukún lɛ́ɛ ná kú adɔ. Toví tɔn lɛ́ɛ bǐ ná kú bo.”

¹⁴Énɛ́ ɔ́ wú ɔ́, kú ná hun nu nyi wɛn gblagada, bó ná vlɔ́n vɛ̌go tɔn; gǎn kpó ahwanvú kpó e ɖo Jeluzalɛ́mu lɛ́ɛ ná ɖo agɔ̌ ɖu wɛ mɔ̌ bó ná jɛ mɛ.

¹⁵Énɛ́ ɔ́ wú wɛ gbɛtɔ́ lɛ́ɛ bǐ ɖó ná jɛ kpo bó dó nu do. Gbɛtɔ́ e nɔ ɖo kɔ tɛ wɛ ɔ́ ná dó kɔ do.

¹⁶Mawu Mavɔmavɔ Nǔbǐwúkpétɔ́ ɔ́ ná ɖó nǔ wa ɖó sɛ́nxwi jí ayǐ, dó ɖe susu tɔn xlɛ́. Mawu mímɛ́ ɔ́ ná lɛ́ hɛn hwɛjijɔ wá, dó ɖe lě e é nyí mɛ mímɛ́ gbɔn ɔ́ xlɛ́.

¹⁷Gbɔ̌ lɛ́ɛ ná wá ɖu ama ɖo nǔ e gúdú ɖo toxo ɔ́ mɛ lɛ́ɛ mɛ, amagbo mɛ wɛ yě ɖe ɖɔhun, gbɔ̌ví e è ɖo nǔɖuɖu ná wɛ ganjí lɛ́ɛ lɔ ná wá ba nǔɖuɖu yětɔn ɖo fínɛ́.

¹⁸Heelú yě mɛ e nɔ sɔ́ adingban dó ɖó kan lɛ́ɛ, adingban nyí kan, bɔ yě nɔ́ dó dɔn hwɛhuhu kpó nǔwanyido kpó.

¹⁹Yě nɔ́ ɖɔ: “Nǔ e Mawu Mavɔmavɔ ɖo nǎ wa wɛ ɔ́, é ní yá wǔ bló nú mǐ ná kpɔ́n. Nǔ ɔ́ ní yá wǔ jɛ nú mǐ ná kpɔ́n. Nǔ e bló gbé Mɛ mímɛ́ Izlayɛ́li tɔn ja ɔ́, ní bló. Mǐ jló ná tunwun nǔ e bló gbé é ja é.”

²⁰Heelú yě mɛ e nɔ ylɔ́ nǔ nyanya ɖɔ nǔ ɖagbe, bó nɔ́ ylɔ́ nǔ ɖagbe ɖɔ nǔ nyanya lɛ́ɛ é! Yě mɛ e nɔ zé zǐnflú dó ɖó wěziza, bó nɔ́ zé wěziza dó ɖó zǐnflú lɛ́ɛ é. Yě mɛ e nɔ zé nǔ e vlɛ́ ɔ́ dó ɖó nǔ víví, bó nɔ́ zé nǔ e víví ɔ́ dó ɖó nǔ e vlɛ́ lɛ́ɛ é.

²¹Heelú yě mɛ énɛ́ lɛ́ɛ e nɔ́ mɔ yěɖée dó mɔ nǔnywɛ́tɔ́, bó nɔ́ ɖɔ émí bí lɛ́ɛ.

²²Heelú yě mɛ e mɛɖé má nɔ́ nu ahan hú ǎ lɛ́ɛ é, yě mɛ e nyɔ́ ahan syɛ́nsyɛ́n tɛnmɛ tɛnmɛ cáká hú mɛ bǐ lɛ́ɛ é!

²³Yě nɔ́ yí nǔ ɖu ɖo mɛ e kú hwɛ ɔ́ sí, bó nɔ́ ɖɔ hwɛ tɔn nyɔ́; xomɛvɔ́nɔ ná bo nyɔ́ hwɛ ɔ́, yě nɔ́ kpɔ́n énɛ́ ǎ.

²⁴Énɛ́ ɔ́ wú ɔ́, yě ná cí nǔywɛ́ e myɔ ɖíɖɔ́ é ɖɔhun, yě ná cí gběhan xúxú e ji kɛn ɖo myɔ mɛ é ɖɔhun; yě ná nyɔ dó ɖɔ, bɔ jɔhɔn ná d'alɔ folówa yětɔn mɛ afúntúntún ɖɔhun, ɖó yě hɔn Mawu Mavɔmavɔ Nǔbǐwúkpétɔ́ ɔ́ sín sɛ́n nyi gbě, yě gbɛ́ wǎn nú Mɛ Mímɛ́ Izlayɛ́li tɔn ɔ́ sín xó.

²⁵Énɛ́ ɔ́ wú wɛ Mawu Mavɔmavɔ sin xomɛ ɖaxó ɖé dó togun tɔn. É dlɛ́n alɔ bó dó nǔ i. Só lɛ́ɛ dán wǔ, cyɔ gbɔn ali jí ali jí zunkɔ́ ɖɔhun. Énɛ́ ká kó fá xomɛ nú Mavɔmavɔ ǎ, alɔ tɔn kpo ɖo dlɛ̌ndlɛ́n.

²⁶Mawu Mavɔmavɔ zé ahwansyá dó jǐ nú togun e ɖo zɔ é[2]; é kún kwín, bó ná dó ylɔ́ ɛ sín fí e gbɛ ɔ́ kponu ɖó é. É ɖíe fyá jǎwe e!

²⁷Mɛ ɖěbǔ ɖo togun énɛ́ mɛ bɔ nǔ cikɔ n'i ǎ, mɛ ɖěbǔ sɛ afɔ dó ayǐ ǎ, mɛ ɖěbǔ sa kɔmlɔgɔ́ ǎ, mɛ ɖěbǔ dɔ́ amlɔ ǎ; gǒjíblánú mɛ ɖěbǔ tɔn tún ǎ, afɔkpakan mɛ ɖěbǔ tɔn wɛ́n ǎ.

²⁸Gǎ yětɔn lɛ́ɛ ɖá nu káká, da yětɔn bǐ ɖo dlɛ̌ndlɛ́n, sɔ́ yětɔn lɛ́ɛ sín afɔ xú káká, è nǎ ɖɔ awǐnnya wɛ; kɛkɛ́ví yětɔn lɛ́ɛ sín afɔ ɖo lǐlɛ́lílɛ́ wɛ, bɔ a nǎ ɖɔ axásáxásá jɔhɔn wɛ.

²⁹Yě nɔ́ dó gbe kinnikínní ɖɔhun, yě nɔ́ dó gbe kinnikínníví lɛ́ɛ ɖɔhun, yě nɔ́ ɖo adǎn jí; yě zɔn kanlin e ná ɖu wɛ yě ɖe ɔ́ jí, bó zé yi bɔ mɛ ɖěbǔ sixú yí sín yě sí ǎ.

³⁰Gbe énɛ́ gbe ɔ́, jǐ ná dó gbe dó Izlayɛ́li togun ɔ́ jí xu ɖo adǎn jí ɖɔhun; ablu gɔngɔn ná gɔ́ to ɔ́ bǐ, bɔ è kpɔ́n to ɔ́ lě ɔ́, è sɔ́ ná mɔ nǔ ɖěbǔ hú mɔ̌ ǎ. Akpɔ́kpɔ́ ɖaxó ɖé ná cyɔ́n hwe e tɔ́n é, bɔ fí bǐ ná dó zǐnflú.