Read fon Ezayíi 51 Bible Online

Ezayíi 51 - fon bible

Ezayíi 51

¹Mawu Mavɔmavɔ ɖɔ: “Mi mɛ e ɖo hwlɛngán ba wɛ nukún myámyá lɛ́ɛ, mi mɛ e ɖo biba ná tunwun mì wɛ lɛ́ɛ mi, mi ɖótó mì. Mi kpɔ́n só e mɛ è kun mi sín é, mi kpɔ́n awǐnnyakan e mɛ è dɔn mi sín é:

²Mi kpɔ́n tɔ́ mitɔn Ablaxámu ɔ́, bó kpɔ́n Sala e ji mi é. Ablaxámu ɔ́, é ɖó vǐ ɖě cóbónú un ylɔ́ ɛ ǎ. Lo ɔ́, un kɔn nyɔ̌ná dó jǐ tɔn, bó sɔ́ ɛ dó ɖó tɔ́ nú togun wɔ̌buwɔ́bú ɖé.”

³Sinyɔ́ɔ sín nǔ blá wǔ nú Mawu Mavɔmavɔ. Lě e to ɔ́ bǐ gba gbɔn é blá wǔ n'i; fí énɛ́ e nyí akúgbéjí ɔ́, é ná zé dó húzú jikpá Edɛ́ni tɔn. Ayǐkúngban xúxú énɛ́ ɔ́, é ná zé dó húzú jikpá Mawu Mavɔmavɔ tɔn, bɔ xomɛ ná nɔ́ hun mɛ ɖo fínɛ́, è nǎ nɔ́ j'awǎ ɖo fínɛ́, bó ná nɔ́ ji han dó kpa susu nú Mawu, bó ná nɔ́ xo nǔ tɛnmɛ tɛnmɛ.

⁴Mawu ɖɔ: “Mi togun ce e mi, mi ɖótó mì. Mi akɔta ce e mi, mi ɖótó ganjí: nyi wɛ ná ná sɛ́n e è nǎ xwedó e, bɔ nǔ wa ɖó sɛ́nxwi jí e un ɖó ayǐ ɔ́ ná nyí wěziza nú togun lɛ́ɛ.

⁵Zaanɖé din ɔ́, un ná hɛn hwlɛngán wá; mɛ bǐ ná mɔ hwlɛngán e un hɛn wá é; un ná kpa acɛ nú togun lɛ́ɛ bɔ é ná syɛ́n ɖésú. Togun e gbɔn zɔzɔ lɛ́ɛ ná ɖo nukún ɖó mì wɛ, yě ná ɖeji dó hlɔ̌nhlɔ́n e un nɔ dó hwlɛ́n mɛ ná é wú.

⁶Mi kpɔ́n jǐxwé aga dɔ̌n sɛ́ dó; mi kpɔ́n do, bó kpɔ́n ayǐkúngban ɔ́; jǐnukúnsin ná kɛn azizɔ ɖɔhun, ayǐkúngban ná gbi avɔ ɖɔhun, bɔ mɛ e ɖo ayǐkúngban ɔ́ jí lɛ́ɛ ná kɔn nyi ayǐ sukpɔ ɖɔhun; amɔ̌, hwlɛngán e un ná hɛn wá ɔ́ ná nɔ ayǐ káká sɔ́yi; hwɛjijɔ ce ná ɖó dogbó ǎ.

⁷Mi ɖótó mì, mi mɛ e tunwun nǔ e nyí nǔ wa ɖó sɛ́nxwi jí lɛ́ɛ, mi mɛ e hɛn sɛ́n ce dó ayi mɛ lɛ́ɛ, mi ɖótó mì. Mi ma ɖi xɛsi nú zun e gbɛtɔ́ lɛ́ɛ ná zun mi é ó; mi ma nú zun yětɔn ɖɔ nǔɖé nú mi ó.

⁸Đó nǔ e gbo sɛ́davɔ e kɔ́súkɔ́sú ɖu ɔ́ wɛ ná gbo yě. Amɔ̌, hwlɛngán e un ná hɛn wá ɔ́ ná nɔ te káká sɔ́yi, hwlɛngán ce ná nɔ te káká yi gbɛ mavɔ mavɔ.”

⁹Mawu Mavɔmavɔ, fɔ́n, yǎ wǔ fɔ́n! Đe hlɔ̌nhlɔ́n towe xlɛ́! Fɔ́n lě e a fɔ́n gbɔn ɖ'ayǐ é, lě e a fɔ́n gbɔn xóxó hwenu é! É má nyí hwi wɛ hu Hlaxávu a? É má nyí hwi wɛ hu nǔdábaɖa xu mɛ tɔn ɔ́ a?

¹⁰É má nyí hwi wɛ ɖe gbe bɔ xu mɛ a? É má nyí hwi wɛ ɖe gbe bɔ agbetawoyó mɛ a? É má nyí hwi ɖokpó ɔ́ wɛ ɖe ali gbɔn xuzan mɛ, bɔ mɛ e a hwlɛ̌n gán lɛ́ɛ gbɔn mɛ a?

¹¹Mawu Mavɔmavɔ ná hwlɛ́n mɛ e nyí étɔn lɛ́ɛ gán, bɔ yě ná lɛ́ kɔ wá Jeluzalɛ́mu, yě ná byɔ́ toxo ɔ́ mɛ kpó awǒbóbó kpó, yě ná ɖo awǎjijɛ mɛ tɛgbɛ, yě ná ɖo xomɛhunhun kpó awǎjijɛ kpó mɛ hwebǐnu, bɔ azɔnwinwɛn kpó nǔ linlin kpó ná gosín gbɛzán yětɔn mɛ.

¹²Mawu ɖɔ: “Nyi wɛ nɔ dó wǔsyɛ́n lanmɛ nú mi; nyi wɛ nɔ bló mɔ̌; togun ce, étɛ́wú a ka nɔ ɖi xɛsi nú gbɛtɔ́? Gbɛtɔ́ bǐ wɛ nɔ́ kú; gběhan gbɛ mɛ wɛ yě ɖe.

¹³A wɔn nyɛ Mawu Mavɔmavɔ e bló we é; nyɛ Mawu Mavɔmavɔ e vlɔ́n jǐnukúnsin ɔ́, bó ɖó ayǐkúngban ɔ́ ayǐ ɔ́, a wɔn mì. A nɔ ɖo sísɔ́sísɔ́ wɛ hwebǐnu, ɖó adǎn e jí mɛ e ɖo acɛ gannaganna kpa nú we wɛ lɛ́ɛ ɖe ɔ́ wú, ɖi nǔ yě kó sɔ́ nǔ bó ja gbɛ gblé dó nú we gbé ɖɔhun. Adǎn e jí yě ɖe ɔ́, fítɛ́ adǎn ɔ́ ká ɖe?

¹⁴Đo malín málín mɛ din ɔ́, gantɔ́ e dó tagba ná wɛ è ɖe ɔ́ ná jɛ te. É ná kú dó gankpá mɛ ǎ; é ká sɔ́ ná ba nǔɖuɖu kpo ɖě ǎ.

¹⁵Nyɛ Mawu Mavɔmavɔ ɔ́, nyɛ wɛ nyí Mawu towe. Nyɛ wɛ nɔ sɔ́ xu sí te; nyɛ wɛ nɔ ɖe gbe bɔ xu nɔ dó gbe. Nyǐkɔ ce wɛ nyí Mawu Mavɔmavɔ Nǔbǐwúkpétɔ́.

¹⁶Nyɛ wɛ sɔ́ xó ce dó nu towe mɛ; nyɛ wɛ cyɔ́n alɔ jǐ we; nyɛ wɛ vlɔ́n jǐnukúnsin; nyɛ wɛ ɖó ayǐkúngban ɔ́ ayǐ; nyɛ wɛ ɖɔ nú Jeluzalɛ́mu ɖɔ é wɛ nyí togun ce.”

¹⁷ Jeluzalɛ́mu, fɔ́n! Fɔ́n, sí te! Mawu Mavɔmavɔ ná xomɛsin tɔn we dó kɔ́fu mɛ bɔ a nu; a nu káká bó lólwé nu. A nu káká bɔ nukún towe mɛ gbá zǐn.

¹⁸Vǐ e a ji lɛ́ɛ ɖě xlɛ́ ali we ǎ. Vǐ e a hɛn bɔ yě su lɛ́ɛ ɖokpó hɛn sɔ we ǎ.

¹⁹Awě lɛ́ɛ xo we webɔ webɔ: è gba to towe bó bɛ́ nǔ e ɖ'é mɛ lɛ́ɛ bǐ. Adɔ kpó ahwan kpó hu mɛ e ɖo to towe mɛ lɛ́ɛ. Adǎn lɛ́ɛ nɛ́ gbo we nɛ́, bɔ mɛ̌ ká ná dó gbɔ nú we? Mɛ̌ ná dó wǔsyɛ́n lanmɛ nú we?

²⁰Vǐ towe lɛ́ɛ ɖo ayǐmlɔ́mlɔ́ gbɔn ali kpá ali kpá; yě cí agbanlín e ɖo fɛ́ca mɛ é ɖɔhun; yě sɔ́ ɖó hlɔ̌nhlɔ́n ɖě ǎ; xomɛsin Mawu Mavɔmavɔ tɔn wɛ ɖo nǔ wa xá yě wɛ; adǎn e Mawu gblɔ́n nú yě ɔ́ wɛ ɖo nǔ dó sin xá yě wɛ.

²¹Din ɔ́, ɖǒtó, Jeluzalɛ́mu gbɛbláwǔnánɔ, hwi mɛ e ma nu ahan ǎ, bɔ ahan ka mú we é.

²²Xó e Aklúnɔ towe, Mawu Mavɔmavɔ, Mawu towe e nɔ́ jɛ hun dó togun tɔn jí ɔ́ ɖɔ ɔ́ ɖíe: “Un ná yí kɔ́fu e ɖo alɔ towe mɛ, bɔ nukún towe mɛ nɔ́ gbá zǐn é sín así we; kɔ́fu e mɛ xomɛsin ce ɖe é, bɔ a sɔ́ ná nu ɖě ǎ.

²³Un ná sɔ́ kɔ́fu ɔ́ dó alɔ mɛ nú mɛ e ɖo ya dó nú we wɛ lɛ́ɛ, mɛ e nɔ ɖɔ nú we ɖɔ: ‘Mlɔ̌ ayǐ nú mǐ ná gbɔn jǐ we.’ Bɔ a nɔ sɔ́ nɛgbé towe dó húzú ayǐkúngban bɔ yě nɔ́ gbɔn jí lɛ́ɛ; a nɔ sɔ́ nɛgbé towe dó húzú ali bɔ yě nɔ́ gbɔn jí.”